MARCH 27, 2024 :
Kum 22 mi chauh ni mahse Ananya Singh hi a tumah a chiang a, a rualpui țhalai tam takin an hma lam hun atan pawimawh leh țulna chhe te pawh nei lo, incheina chhuak thar ber ber leh social media hrang hrang khawiha darkar tam tak hman chu hnawlin IAS nih tum ranin a naupan lai ațangin zirna lamah a insawrbing tlat a, he a tum ruhna hian hlawhtlinna duhawm tak chu mi dangin an tlin zen zen theih hma kum 22 chauh a nih laiin hlawhtlinna chu a hmuh phah ta a ni.
Ananya Singh hi Prayagraj (Allahabad) lam chhuak a ni a, January 28, 1998 ah a piang a, a pa hi District Judge pension a ni a, a nu hi ICRT-ah lecturer a ni a, nuța pakhat chauh neiin Kanpur khawpui Chief Metropolitan Magistrate thawk hi a u a ni.
Naupan lai ațanga a tum a ni
Ananya hian naupang a nih lai ațangin IAS nih hi a tum a ni a, mahse IAS ni tura a inbuatsaihna hi chu BA final year a zir lai ațang chauh a nih thu a chhungte hian an sawi.
Zirna lam
St Mary's Convent School, Prayagraj ațangin zirna bul a țan a, Class 10 ah mark 96% hmuin an awmna District-ah mark hmu sang ber a ni (ICSE - 2013). Class 12 ah 98.25% mark hmuin district topper tho a ni (ISC - 2015). Sri Ram College of Commerce, Delhi University ațangin BA Economics a zir a, final year a zir lai ațangin UPSC civil services examinations a inbuatsaih țan a ni. Vanneihthlak takin a vawi khat exam-naah hian a tling chho zel a, final result a chhuah hian All India Rank 51-na kum 2019 khan a ni ta a ni.
Prelims exams
Ananya Singh hian UPSC Preliminary Examinations inbuatsaihna atan thla 3 chhung ngawrh takin a hmang.
Current Affairs
Ananya ngaih dan chuan Prelims exams a pawimawh ber chu Current Affairs hriat hi a ni. Chumi avang chuan Newspaper a chhiar nasa a, thil pawimawh nia a hriat chhinchhiahna Note Book inchhawpin, nakina la zir leh turin aziak nghal zel țhin.
Mock Test
Mock Test hi thil dang teh vak a ni lo, zawhna hlui hmanga tih tak zeta mahnia exam chhin hi a ni. Ananya chuan Prelims exam-na atan pawimawh tak chu exam tak tak anga ngaia zawhna hlui hmanga exam (mock test) țhin hi a ni. Hetianga tih hian mahni ngei pawhin kan thiam leh thiam loh lam hre chiang turin a takin min țanpui a, kan chak lohna lai inbuatsaih kan thiam sawt bakah zawhna chhang zo thei tura inbuatsaihna atan a țangkai hle a ni, tih thu a sawi.
Mains exams
Prelims ang thoin Mains exams hma chhawn tur hian Ananya hian kum kal tawh lama Mains zawhna hlui chu exam pangngai hma chhawn ang chiah thoin a chhang țhin a, a chhanna chu chumi kuma chu subjects-a ti țha ber chhanna nen a khaikhin țhin.
Optional subjects
Ananya hian Mains Examinations-a optional subject atan Economics a thlang a, Economics subject zir tan Economics thlan hi țha ka ti a ti. Mains exam-ah hian thui deuha chhan ngai a tam a vangin kan ziak chak tawk tur a ni. Zawhna mahni duh dana chhan chiam ai chuan zawhnain zawh a tum tak (central idea of the topics) chhang thiam turin mahni kan inher rem ang a, ngun takin zawhnain a zawh tak hre turin zawhna kan chhiar uluk a pawimawh hle a ni, a ti.
Engmah ka pianpui lo
Ananya Singh chuan kum 22 mi lek anih laia IAS exam vawi khat a hma chhawn țuma tling nghal mai a nih chungchangah engmah a pianpui a neih loh thu leh danglam bik a nih loh thu te, a nu leh pa leh a u thiamna engmah chhawm leh inhlan chhawn a theih loh thu bakah mi dang ang thoin engmah thiam sa lo, a hăngin a lo piang ve tho a, IAS tling turin tu puihna mah a theih loh avangin amah leh amah a inpui a ni a ti.
Ni khatah darkar 7-8
A tir lamah UPSC exam UPSC exam inbuatsaihna atan ni khatah darkar 7-8 chhung a hmang țhin a, a hnu lamah chuan darkar 6-ah a tla hniam leh a ni. UPSC prelims leh mains exams atan a inbuatsaih kawp nghal a ni.
UPSC syllabus a awm lehkhabu te a lei khawm a, mahniin note a insiam a, chu chu a zir țhin. Mahni kut ziak ngeia note siam hian țhatna a nei a— mahni hriat thiam dan zawnga kan ziah avangin a fiahin a chiang a, chu chu zir a awl bik a, ennawn leh pawh a nuam bik a ni. Mahni ziak ngeia note kan siam hian kan thinlungah a intuh a, kan mitthla thiam bik bawk.
Ananya Singh hi kum 2019 khan UPSC CSE exams-ah All India rank 51 a ni a, kum 22 mi chauh a nih laia IAS officer a inziak tling a nkt. IAS Ananya Singh hi West Bengal cadre a ni.
Source :
UPSC Pathsala
June 12, 2021
India Masterminds
June 2, 2023
ZEENEWS
August 22, 2023
=======27032024
Huna Kawlvawm
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: