Zoram mipuiten ZPM sawrkar chungah rinna an nghat, beiseina nen min thlir reng

Zoram mipuiten ZPM sawrkar chungah rinna an nghat, beiseina nen min thlir reng - Minister C Lalsawivunga, Art & Culture..etc

Aizawl | February 12, 2024: Vawiin khan ZPM Party chhung inkhawm hmannaah Pu C.Lalsawivunga, Minister chuan thu sawiin, "Pathian leh hotute duhsakna a, Mizoram sawrkar hnuaia dinhmun pawimawh tak Minister nihna hial min chelh tir hi lawmawm ka ti hle a, kan party sawrkarna min petu mipuite chungah lawmthu ka sawi bawk a ni,” a ti.

Pu Sawia chuan, "Zoram mipui ten ZPM sawrkarah mipuiin rinna sang tak an nghat mek a, kan ti beidawng thiang lo a ni. Kan ram tan kan tih theih zawng zawng ti turin hma kan la mek a, ka department chan - Local Administration Department, District Council & Minority Affairs, Art & Culture leh Animal Husbandry & Veterinary Department te hi direct-a mipuite rawngbawlsakna pawimawh tak a nih vangin, ralkhat atanga mipuite mamawh en lova, a hmun ngeia kala an mamawhte enpui leh sawipui a ngai thin a, Vawk vulhna hmunah te, Bawng leh ran dang vulhna hmunahte kalin mipuite mamawh leh harsatna te a takin a hmun ngeiah kan hmuhpui mek a ni. Mipui leh party worker te pawhin kalphung thar hi min thlawp tha hlein ka hria a, tha taka kan thawh ho zel ka beisei," a ti bawk.

AH&Vety Minister chuan, "Mizoram hi saah kan intodelh lova, artui leh bawnghnuteah pawh kan la intodelh lo, he mi atan hian hmalakna tur pawimawh tak tak a awm a, a bikin ran chaw siamna kawngah hian hma kan lak hmasak a ngai hle a ni. Thil reng reng a bul thut atanga hma lak a nih loh chuan hlawhtlinna leh intodelhna tluantling a awm thei lo a; kan ramah hian ran chaw siamna atana tangkai vaimim leh thlai dangte pawh a thar tha duh hle a, chutih laiin vawiin thleng hian phai lam atangin ran chaw kan la chaw lut reng mai te hi, kan hmalakna tur leh intodelh kawngah ke kan penna hmasa tur a ni," a ti bawk.

Minister chuan, "Tun hnaiah social media hmang thiam lo kan pung nasa hle a, mipuite kan fimkhur a ngai hle. Social media hi mimal tin leh pawl dinhmun ti chhe vek thei leh chawikang dawrh thei a ni a, a tha zawng leh a chhe zawngin mipuite min nghawng mek a ni. Thu tling lo leh thu dik lo vawrhdarh nan social media hi i hmang lo ang u. Zirlaite pawhin tangkai takin an zirlai atan hmang thiam se la, chutiang bawkin mimal, pawl leh kohhran te bakah politic huangah pawh a tha zawnga hmang theuh turin mipuite ka chah a ni," a ti bawk.

Vawiin ZPM Party chhung inkhawm hi Pu Haukhuma Hauzel, IAS (Rtd), Mizoram Resource Mobilization Committee Vice Chairman-in a kaihruai a, Rev.Lallawmthanga’n hunserh a hmang a ni.