Mipuite hmakhaw ngaiin South Tuipui Bialtu MLA-in office hawng

Aizawl | Feb 12, 2024: South Tuipui Bialtu MLA Pu Jeje Lalpekhlua chuan a bial chhung mipui ten awlsam zawka amah an dawr theina turin vawiin khan Hnahthial Bazar JJ12 Inn first floor ah MLA Office a hawng. MLA Office hi Primary School a kal laia an Headmaster Pu H. Lalpawla'n ribbon chep chatin a hawng a ni.

Hawnna inkhawm Pu K. Zaliana, Vice President Block I ZPM kaihhruaiah thu sawiin MLA Pu Jeje Lalpekhlua chuan, inthlan campaign laia kan intiam angin Pathian kaihhruaina zarah Hnahthial ah MLA office hawn a ni ta hi a lawmawm hle a, hei bakah hun remchang hmasa berah ZMC pantute tan Falkawnah South Tuipui bial Mipui In tur kan hawng leh dawn a ni. Kan bial chhungah hmasawnna hna thawh a awm thin a, a then phei chu an sum sen nena hnathawh inmil lo tak tak a awm tih mit ngeiin ka hmu a, ka rilru a na hle a, tunah sorkar thar kalphung thar, mipui sorkar a piang ta a, hetiang hi a thleng tawh lo turah ka ngai a, mipuite pawh kan thikthu a chhiat a, hmasawnna hnathawh kan vil a tul a, thawktute hnena kan thlen a hmalakna a awm lo a nih chuan ka hnenah in rawn thlen ang a, keinin hma kan lo la zel dawn a ni, a ti.

MLA chuan Hnahthial district chhungah ruihhlo a tam zia sawiin hei hian rukruk thlengin a tihluar damdawi tlem theih nana hmalak pui turin SP sawipui a tum thu leh ruihhlo dona kawngah police ring ringawt lova, Kohhran, NGO, khawtlang tan rual atul zia uar takin a sawi a, ZPM party tan bika MLA ni lovin South Tuipui bial mipuite tana MLA anih thu sawiin, ram hruaitute tawngtainaah hre reng turin bial mipuite a chah. Office hawn takah hian a office nghaktu an awm tur thu leh complaint leh suggestion box dah a nih tur thu sawiin, hetah hian Hnahthial bial hmasawnna tur atana rawtna thlen thin turin mipuite a ngen bawk a ni.

He hunah hian Rev. TC. Vanlalmalsawma, BCM Hnahthial South bialtu Pastor chuan hunserh a hmang a, Pu J. Ramthianghlima, President South Tuipui Block-I ZPM pawhin thu a sawi bawk a, inkhawm zawh hian Hnahthial khawpui chhunga veng hrang hrang atanga amah hmu duh te tan hun hawn chhunzawm a ni bawk.