MZP-in Zirlaite exam chhunga kawlphetha a khaihlak loh nan thuneitute ngen

Aizawl | Feb 26, 2024: Mizo Zirlai Pawl (MZP) General Headquarters chuan Zirlaite tana hun pawimawh pawl sawm(10) exam, High School Leaving Certifcate Examination (HSLC) vawiin ni 26 February, 2024 (Thawhtanni) a tan a ni ta chu lawmawm a ti hle a. Higher Secondary School Leaving Certifcate Examination (HSSLC) pawh ni 28 February, 2024 (Nilaini) hian tan tum a ni. Zirlaiten an zirlai tha taka an zir theih nan leh tha taka an pass theih nan duhsakna a hlan a ni.

Heng zirlaite an exam hun chhung hian, an zirlai tibuai thei power supply khaihlak lova pekchhuah a nih theih nan Power & Electricity department hotute theihtawp chhuah turin MZP chuan a ngen a. Zirlaite zirna tibuai thei zawnga ri bengchheng leh zirlaite rilru tibuai thei programme huaihawt lo turin Mizo mipuite MZP chuan a ngen tak meuh meuh a ni.

Vawiin tlai dar 4 khan, MZP General Headquarters chuan HSLC leh HSSLC Exam lo awm turah, Power supply mumal taka a awm theih nan Pu F. Rodingliana Power & Electricity Minister chu a chenna inah a hmu nghal a. Zirlaiten an zirlai ṭha taka an zir theih nan theihtawp a hmala turin ngen a ni. Minister chuan hma a lak nghal tur thu MZP hruaitute a hrilh a, khua a lum chhoh zel avangin Power supply a indaih lohna pawh a ziaawm chhoh a beisei thu a sawi a ni.