Railway Station 554 ram tana hlanna hunah Minister Vanlalhlana leh Lok Sabha MP C Lalrosanga tel

Aizawl | Feb 26, 2024: Ramchhung hmun hrang hrang 554 Railway Station leh Flyover hawnna leh lam tana hlanna Prime Minister Narendra Modi an a neih chu Mizoramah pawh he hun hi Sairang Rail Station ah hman a ni. He hun hi PWD Minister Vanlalhlana leh C. Lalrosanga MP (Lok Sabha) telpuiin thu an sawi.

He huna thusawitu PWD Minister Vanlalhlana chuan Prime Minister Narendra Modi-a' 'n railway project hrang hrang 2000 bawr, vaibelchhia 41,000 hu a hawnna programme, Sairang station-a kan chhim thei chu lawmawm a tih thu a sawi.

Km 51.38-a thui Bairabi-Sairang Broad Gauge Line siamna tur lungphum hi November ni 29, 2014 khan kan Prime Minister Pu Narendra Modi-a'n phumin, a hna tak tak hi December ni 15, 2015 atang khan thawh tan a ni a. He BG Line-ah hian railway station pali - Sairang, Mualkhang, Hortoki leh Kawnpui ah te siam mek a ni. Tun dinhmunah he 'national project' hi 100-ah 92 zawh tawh a ni a. Kumin October 2024 hian thawh zawh hman beisei a ni.

He project bakah hian Sairang atanga Hmawngbuchhuah chu, nikum July ni 24 khan Ministry of Railways-in km 223-a thui, Sairang to Hmawngbuchhuah atan Final Location Survey a rawn sanction leh a, he project chungchang hi sawrkar pawhin a ngaihtuah chhunzawm mek a ni, a ti bawk.

Rel lo luh hunah insakna bungrua leh bungraw dang dang pawh man tlawm zawkin kan chawlut thei tawh ang a. Khualzin veivak tan pawn awlsam leh man tlawm zawkin a lei theih tawhnga. He hun pawimawh hi hmang tangkai turin kan lo inpeih a, heng hna te hi thawh ve ngei kan tum tur a ni a, hnamdang thawh atan kan dah a nih chuan kan ram leh hnam in a tuar pawh a rinawm a, kan lo in buatsaih that a ngai a ni, a ti bawk.

India leh South East-Asia ramte insumdawn tawnna kawng pawimawh tak pakhat kan ni dawn a, he thil lo thleng tur dawngsawng turin Mizoram mipuite kan inpeih a ngai hle a. Mipuite kan theihna kan tahhriam lohva, hmathlir (vision) leh tihtur inchhawp (mission) nei lova kan lo nghah liam ve mai mai chuan opportunity lian tak kan hloh dawn a ni. He sumdawnna kawngthar rawn inhawng tur hi hmang tangkai ngei tura kan inbuatsaih a hun hle a. Industry lianpui pui kan siam thei lo a nih pawhin industry te reuh te te tal lo siam i la. Chutiang zelin, farm lian pui pui kan lo buatsaih thei lo a nih pawhin te reuh te te tal kan lo siam a tha dawn a ni, a ti.

PWD Minister Vanlalhlana chuan, He lai hmuna railway bungrua a bo foa, a zahthlak hle, hnamdang lakah kan hnam hmelhmang lanna ani a. Rel bungrua enkawlna kawngah mawh kan phur a ni, a ti bawk.

Pu C. Lalrosanga MP LokSabha pawhin thu sawiin, Rel lo thleng tur ui a hlawk thei ang ber a chhawr bawk hi ka duh a. Railway bungrua reng reng vawnhim hi a pawimawh a, bungrua leh rel kawng tih chhiat te hetiang hi thleng tawh lo se ka duh, a ti.

Hnamdang lo lut nasa ltk hi an hlau hle. Kan ram in khuahkhirhna dan kan neihte kan kenkawh angaia, kan khawtlang leh sorkar te hemi kawngah dan kengkawh leh zual turin ka chah duh a ni, a ti.

He hunah hian, PM Narendra Modi chuan delhi aṭangin online-in India ram puma Railway statuin 554 leh Flyover leh overpass 1500 chuang a hawng a ni.