Aizawl | Feb 14, 2024: LPS Cup Inter Village Football Tournament-in thla khat chuang a awh dawn a, February 20-ah tanin March 22-ah Rajiv Gandhi Stadium, Mualpuiah final a ni dawn.
Zirtawpni zanah Chanmari YMA Hall, Aizawlah Mizoram Youth Commission Chairman Pu Malsawmzuala Ralte chuan tournament pet hawngin a tir lam round of 16 thlenga an khelh chhoh dan tur fixure a tlangzarh nghal dawn a, a hnuah quarterfinal atanga final thlenga an khelh zui dan tur pawh that leh a ni ang.
A tirah 1st MAP Ground, Armed Veng leh MFA Ground, Sairang Dintharah round hmasa khel tura ruahman ni mah se, kalkawng chungchangah harsatna awm thei a nih avangin MFA Ground aiah Ramhlun Sports Complex-ah khelh a ni zawk dawn a ni.
Khelh zawn chhoh ngar ngar a ngaih dawn avangin player-ten hun awl an nei tam tawk dawn lo va, an himna tur ngaihtuahin round of 16 atanga final thlengin inkhel apiangah first half leh second half-ah chawlh lailawk 'cooling break' minute thum hman thin a ni ang.
A thiam 16 inelna atangin Rajiv Gandhi Stadium-ah vek inkhel vawi 17 a awm dawn a. March 5-8 chhungin round of 16 khelh a ni ang a, March 12 leh 13-ah quarterfinal, March 15 leh 16-ah semifinal first leg, March 18 leh 19-ah semifinal second leg, March 22 (zirtawpni) zanah final a ni ang.
Tual chhung football tihnun thar zel a nih theih nan Aizawl District Football Association leh LPS Vision chuan hlawhtling taka tournament kalpui an duh a, a hmuna inkhel en turin mipui an sawm bakah media kal tlanga a tam thei ang berin an ena an hriatpui theih nan hma lak an tum tel a ni.
LPS Vision chuan round of 16 atangin LPS 1-ah inkhel zawng zawng live-in a pek chhuak dawn a, hemi hma zawng inkhel a awm ni apiangah report siamin zanah LPS 1-ah a tichhuak thin bawk ang.
Tun tumah hian team 62, Aizawl chhung 41 leh Aizawl pawn 21 an tel a. Tournament neih tawh vawi sariha champion thei team pali - Ramhlun South (vawi thum), Armed Veng (vawi hnih), 2016 champion Bethlehem Vengthlang leh 2017 champion Chhinga Veng an tel kim a, district dang atanga sawm bik pali - Sialhawk, Keifang Joint, Thenzawl Joint leh Kawnpui Joint an tel dawn bawk.
LPS Cup : Round of 16 atangin inkhel 17 live-in pe chhuak dawn
Round of 16 atanga final thlengin LPS Cup Inter Village Football Tournament-ah inkhel vawi 17 a awm dawn a, LPS Vision chuan live-in a pe chhuak vek ang.
Vawiinah LPS Vision Director Pu Lalsawmliana Pachuau office, Zarkawtah LPS leh Aizawl District Football Association-in ruahmanna an siam fel a, round of 16 atangin zanah vawi 11 leh tlaiah tum ruk inkhel a awm dawn a ni.
Round of 16-ah inkhel pariat awmin tlai dar 4 leh zan dar 8-ah pali ve ve, quarterfinal-ah inkhel pali awmin tlai dar 4 leh zan dar 8-ah tum hnih ve ve khelh a ni ang.
Double leg-in semifinal khelh a ni dawn a, zan dar 8-ah vek inkhel vawi li awmin zanah final a ni dawn bawk. A thiam 16 inelna atangin player of the match thlan a ni dawn a, inkhel tum 17 awmin mipui tam zawkin an en theih nan tlaiah vawi ruk awmin a bak zawng zanah vek a ni dawn.
Round of 32 thleng khaw en laia khelh tur a ni ve thung dawn a. February 20 atangin 1st MAP Ground, Armed Veng leh MFA Ground, Sairang Dintharah khel tanin, LPS chuan round of 16 hma zawng, inkhel a awm ni apingin report a siam ang a, zanah a tichhuak thin dawn a ni.
Inter Village Football-ah hian team 62 inziak lutin Aizawl chhung 41 bakah district dang atanga sawm bik pali nen Aizawl pawn atangin 21-in trophy an chuh dawn a; champion tawh team pali - Ramhlun South, Armed Veng, Bethlehem Vengthlang leh Chhinga Veng an tel kim vek.
Zirtawpni zan khian Chanmari YMA Hall, Aizawlah Mizoram Youth Commission Chairman Pu Malsawmzuala Ralte chuan tournament a pet hawng dawn a ni.
- T-a
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: