2005 vel kha a ni ta awm e, MZP inthlana ka chuh ve duh avang khan Varṭian chanchinbu aṭang khan ka chawl a. Min ui der ve khawpin ka hria.
MZP inthlana ka din ve dawn avang chuan khatih laia Minister Pu ZH Ropuia hnenah khan ka kal a. A ni hi min duhsak tu a ni a, ka chipui a ni bawk. "Hna chhete tal min tihsak ve rawh, sing li nga vel tal hlawhna tur, inthlan campaign nan ka mamawh," tiin hna ka dil a.
Min lo khawngaih a, hna min siam sak a. Tuirial Airfield-a building hlui pakhat repair hna chu min pe a. Ka theih ang tawka ṭhain hna pawh ka thawk a. Singnga chuang lai chu ka hlep ve awm e.
Kha ka hnathawhna bill kha ka la mai thei lo a. Mi pawisa ka lo puk lawk a, bill lak huna rulh turin!
Tichuan, MZP chu kan inthlang ta a, tlin inring em emin (confi takin) ka tling zo ta lo a. Campaign laia ka ṭang vak lo kha result a chhuah hnuah ka ui em em a. Vote tam lo takin ka tla a ni.
MZP inthlan kan zawh hnu, ni e'ngemaw zat hnuah chuan kan contact thawh ve bill chu ka la ta a. Ka ba zawng zawng ka pe fel ta tih chuan sing chuang lai mai pawisa ka la nei ve a. Ngah ka inti ve hle mai.
Bill lak zan hian ka ṭhianpa pakhat nen kan in man fuh a. Bill lak zan a ni bawk a, neih chen turin ruahmanna kan siam a. Duh aia kan tam hret avangin kan unaupa pakhat chu an inah kan thlah haw sauh sauh a. A Condom kawl kan lak sak a, neih chen turin kan chhuak ta a. Chen nasat tum ve tak kan ni!
Kan chim chin a hniam bawk a, neih han chen vak dan kha kan hre lo hle a. A bike-in Rangvamual lamah kan tlan thla dun a. Rangvamual kan thlen chuan ka ṭhianpa nen khan kan kal duhna a inang tlat lo a. A buaithlak fu.
Keiin Nu VLi te ina kal ka duh a, ka bat theihna a nih bakah duh duha ka tal ngamna a ni a. A ni lah kha kei ang bawka a duh duha a tal ngamna Pa Zova samsei te ina kal kha a duh tlat a.
Mahse, a buaithlak tam lo. Nu VLi te in thlen hma, kawng an hnuai mai kha Pa Zova te in a ni a.
A pawisa nei zawk ka ni bawk a, Nu VLi te ina kal chu ka rawt tlu thei ta a. Pa Zova te in tlawh loh kha a ngai ngam lo a, a zu kal zawk a, Nu VLi te inah chuan kan dawm dun ta a.
Zan rei lam a ni tawh ang, kan haw dawn chuan Nu VLi inah chuan nula tla hlang, chhe vak lo kan chhar a. Kan bula lokal kha a duh ve mai bawk a, kan in trible ta a. Haw kan la tum mai lo a nih hmel, Phunchawng lam kan la pan.
Phunchawng khaw tawp lam, tuikhawthla thlen hma deuh kawngsir zau laiah chuan kan ding a. Zu kan in leh a.
Kan han in belh tam deuh hnu chuan kan nula phurh chu tu ta tur zawk nge, tihah kan inhnial ta a. A buaithlak hle. Kei kha pawisa nei zawk ka nia, engkim tumtu, a ni kha bike neitu! Phu zawk kan inti ve ve a.
Chutia kan inhnial buai vel hnu chuan, "Chho phawt ang" kan tia, chhoh kan tum ta a.
Ka ṭhianpa chuan bike chahbi a hmu zo ta reng reng lo mai a. Kan han zawng ṭhin, eng kan nei si lo, kan buai hle a. Kan zawng kan zawng a, kan beidawng kan ṭhukhawm leh ringawt ṭhin a.
Light dil turin a thlang deuh leh a chhak deuha In te kha kan han kik ṭhin a. Zan a rei tawh bawk nen an mu nghet sauh emaw tih tur a nia, kan kai tho zo lo.
Chutia chabi buaia buai zual ber kan ṭhianpa buai lai chuan finrawl ka chhuah a. Kan nula chu ka hruai hrang ta a.
Kan ṭhianpa kan pawh leh hnu chuan a lawm lo hle mai a. A titau titih a. "Light kan zawng a nih kha?" ka tia, a awih lo hle mai!
Hetia kan buai lai hian motor rawn tlan a awm leh zauh ṭhin a, kan phar a, ding duh an awm lo. Suam kan tum emaw an ti nge, kan phar veleh khan an tlan chak sauh zel a.
Khawvar dawn hnaiah truck pakhat kan phar ding thei hram a. An eng neih ang ang chuan chabi chu kan han zawng leh thuak thuak a. Kan hmu lo.
Kan nula chu vai truck-ah chuan kan thawn haw ta ngawt a. Kan beidawng chu kan ṭhu hle hle tawh a. Khua kan nghak var ta ringawt a. Khaw nghah var pah chuan kan inhnial kan inhnial a!
Khua a lo var chuan bike kan dahna sir mai, phul hnuaiah chuan chahbi chu kan hmu ta a. Ni deuh luk chungin kan inphur haw ta a.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: