Khatia ka fa u ber tur kan nuin a pai takah khan Pathian chungah kan lawm em em a. Kum thum dawn kan nu a rai loh hnuah khan kan buai ve hman viau a. Doctor thiamte kan rawn a, ṭawngṭai mite kan pan bawk a.
Chutia kan nu rai ka lawm em em rual chuan hlauhthawnna lian tak ka nei tel a. Rilruah helkam nei rengin ka awm chho ta a.
Tlangval laiin zu nen ka inchiahpiah nasa si. Zu nena tlangval han tal takah chuan tih loh loh tiin kan hun kan hmang nasa ve a. Zu hmunah chuan duh tui loh ṭum a lo awm nual bawk si! Hei bakah hian inrinhlelh zual em em chhan ka nei a, a chhan erawh ka sawi lo mai ang!
Khatih hunlai, 2013 chho vel khan naupai zawng zawng HIV/AIDS test vek tur, an tih ṭan chho lai a ni a. "Sub Centre-ah nu naupai zawng zawng HIV test tur," tih kha an au cham chi a. An au chhen mai bawk si a, ngaihthlak a hreawm ṭhin.
"Test a ngai rih lo," tiin kan nu kha ka khap ṭhin a. Ka thu a awih ve mai bawk a. Sub-Centre-a in test tura kal luih a tum bik lo a. Hlauhthawn ka nei, tih erawh a hre kher lovang!
Chuti chuan hun a kal zel a, a rai lian tulh tulh a. A neih hun a hnai tulh tulh a. Ngaihtuahna a buai tulh tulh a, hlauhthawnna a nasa tulh tulh.
Zanah te hian rui viau ṭhin mah ila, ka muhil hlei thei lo fo ṭhin a. "Keimah chu keimah ka ni a, ka tlatdah man ka tel a ni mai a, a pawi lo. Tladah ve lo leh pawi khawih ve lo ka nupui duh tak leh ka fa lo piang turin ka sual tukhum pawn zara natna rapthlak tak an tuar ve tur chu a dik lo a ni," tiin ka ngaihtuah nasa thei hle a. Khumah pawh mu duh lova ṭhutthlenga TV en chunga tlaivar ka ngah hle.
February thla tir lam a lo thlen chuan 7th Day Hospital Dr Rinpuii chu kan nu chuan a rawn leh a. Zai a ngaih tur thu leh an inzai hun tur atan February ni 11, 2013 chu an ruat ta a. Chumi hma ngei chuan HIV/AIDS test chu a ngai a, "HIV test lovin tumah kan zai thei lo," tih a ni bur mai si!
Tichuan, February ni 10 chu a lo herchhuak a. Hemi ni hi kan inneih cham a ni a. Inneih cham a ni nen, nau nei mai tur kan ni nen hlim taka awm awm tak ka nih vei nen ka hlim lo hle.
7th Day Hospital-ah chuan HIV/AIDS test turin kan kal a. A thisen chu an la ta a. Raipuar dang kha chu ṭum thum tal test nawn tur, tih a nih laiin keini khan kan lo la test miah loh avang khan vawi khat test kha min pawm sak hram a.
Test result kan nghak chu ka awm hle hle thei lo. Ka vei tawn chhen a. Hla angreng tak tak thleng kein ka kalpui a. Ka thaw leh hak hak ṭhin a.
Kan nu lah khan a'n hlauthawng lo nasa mai si a. "Engmah kan ti lovang," a ti tlat a.
"I va hlauhthawn hmel ve," min ti ta a. Kei chuan, "Hlauthawng ve deuh e. A nuam lo ve a," tiin ka chhang mai a.
Mitthlaah nunhluia hmeichhiate an lo lang zut zut a. "Kha kha chu a ngaihṭhat awm, kha kha chu risk a sang thei a ni, kha kha chuan AIDS a vei a nih pawhin a awm lo hran lovang," tiin ngaihtuahna a vak zut zut a. Ka chalsam ka tuai ka tuai a, ka thaw leh halh ṭhin a.
Hun e'ngemaw chen kan nghah hnuah chuan 'result a lam theih e' an rawn ti ta a. Result lam turin counter lam chu kan pan ta a.
Ka khur ta a. Counter lamah chuan amahin kan nu chu a phei a. Result chu a va lam a. Muang changin result bih chung chuan a rawn phei a.
"E'nge result?"
"A ṭha e,"
Ka pan phei sawk sawk a, result chu ka lak sak a, ka en a. "Negative" a lo intia!
Ka kuah chung chung a, ka zuang a. Au vak ka chak! Mahse, ka insum a.
AIDS ka vei lo!
Hlim em emin In lam panin kan inkai haw ta!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: