Upper Republic-a ka inah khan ka nau nen chauha awm kan ni bawk a. Ngamtlak ṭhiante khan min bawh buai nasa hle a. Nula rawn hruai nan te, zu rawn in nante leh chaw ei nante an rawn hmang ve chawt zel a. Nupui ruk nan te pawh an rawn hmang tak e! An innei tluang zek lehnghal a, hei!
Krismas dawna kan unaua kan khaw lama kan haw dawnte hian kan chabi kawltu nih kha an inchuh laih laih ṭhin a. Han ui hleih theih ni hek lo, haw chhoh leh hnu hian thin a rim lek lek ṭhin! A lo hnawk kawi nuai zel.
Chabi kan dah phal loh tum pawhin tala lo chhu thla ve ringawt ngam kha an awm a. Tala thar an lo vuah a. Ṭhenawm te inah chahbi chu an lo dah ve leh thlap zel tho a.
Kan kawmthlang mai kha T Romana College a ni a, ṭhianṭha ngam tlak zual zing class kal chaw rawn ei nghal kha kan nei thei hle bawk. Retheih nak alaiin!
MZP office aṭang khan kan in kha kea kal pawha hnaite a ni a. MZP kha tun angin kan la fel fai chiah lo a. Zu in mi kha kan awm nual a. Ka in kha in nan ber an hmang a.
TKa leh LTa bik phei kha chuan tlai tin (a ni ber e) an rawn in ṭhin a. Kei tleirawl fel tak, zuk leh hmuam tak ngial pawh ti lo kha ka ina tlai tin an rawn in takah chuan zu ngawlvei ka lo nih phah ta a hial a ni.
TKa hnenah hian ṭum khat chu, "Nangmahni avanga zu ngawlvei ka nia, ka in duh chhung chu ka zu man tur hi tum tur in ni," ka tia... engah tehchiam a ngai lo.
Ṭum khat chu kan ṭhianpa pakhat Rihdil kalin Burma officer choice min rawn hawn hi phur takin kan inho a. Kan ṭhiante pahnih nen kan nia!
Zu harsat lai kha a ni bawk a, khatiang a sen chi in tur kan han nei kha kan phur hle a. MZP office-a kan awm chu kan inmitmei zauh zauh a. Kan inah chuan zu in tur chuan kan chho ru ta zal zal a.
Officer Choice half bur thum a ni a. Ka la hrereng. Kan va han phur tak!
Tichuan, kan in ta a. Bur khat kan in zo a, engtin mah kan la awm lo a. Bur hnih kan in a, engtin mah kan la awm chuang lo a. Kan ṭhianpa pakhat chuan, "Burma zu hi a thawh dan a dang deuh aniang, nghak phawt ang u, a rawn thawk thut dawn aniang," a tia. In zawm lovin ka nghak ta a.
Rei fe kan nghah hnu pawh chuan engtin mah kan la awm chuang lo va. Kan han inhnim a, lipovitan rim kan nam rum rum hian kan inhria a. Bur khat dang kan la neih pawh chu in zawm duh tawh lovin kan dah a. RV lamah kan kalsan daih a. Kan thin a rim tlang hle a, min hawnsaktupa thlarau chu kan ankhum kan ankhum a.
A hnua kan hriat leh danin kha zu kha Burma zu cheng 15 man a lo nia. A chhe hle a ni!
Chutiang vel chuan kan in kha kan hmang ṭangkai hle a.
Ṭum khat chu ka awm loh laiin ka ṭhiante pahnih hian kan inah chuan zu an lo in a. Kan Room-ah kher khan an in duh lehnghal a. Ka nau khan a lo hnial ngam si lo!
He mite pahnih hi an han sual khawp a. Pindan bang vela ka thawmhnaw khai chu an en kual a. Thawmhnaw aia zu ka thlan tlat avang khan thawmhnaw kha ka nei tam lo reng a. Room bangah khan perek-ah ka khai tlar ve dal ṭhin lah tak a.
Ka thawmhnaw chu an han en dan dan a, kim vekin an hria a, "He pa hi ruakin a leng a nih hi," min tia, an pahnih chuan an lo nui vak vak a! An va sual tak!
Ṭum khat pawh ka thawmhnaw fai lo lutuk leh inthlahdah lutuk kha min zilh laih laih a. Kei khan kal puat pahin, "It's my life," ka tia. Muanpuia Punte hian, "I life kan sawi lo, i kekawr bal a nih chu kan sawi," tiin mi rawn au zui a!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: