Room aṭanga ka va chhuak chu hmai lei nawr zawngin a lo tlu a, a thi phung a. A rit si, thei leh thei lovin ka va tung tho a, "Ngatinge min hnek ngawt a," a lo tia. A manganthlak thei a nia!
MZP-a ṭum hnih ka din ve ṭum khan MZP Kolasib Hqrs. khan min support thei viau a. An chungah pawh ka lawm tak zet a ni.
A bik takin an President ṭhin Lalṭhakima (Muangin min chawlh san ta) nen khan kan inkawm ngeihin kan inzui nasa em em a. Michael-a te pawh kha ka lam ṭang, nasa taka ṭang an ni.
Kolasib President Lalṭhakima phei kha chuan ka Scooter a chhiat lutuk avang khan, inthlan campaign chhung atan a bike RXZ pawh kha thla 1 dawn min kawl tir hial a.
Kum 2005 emaw vel kha a ni ang, ka la hriat reng chu ṭum khat Reieka kan campaig kan haw lam chu chiang em emin ka tlu ringawt mai a. Ka kalpuite khan, "Kawngkawi pawh ni lo ngatinge kawng sira thing chu i sut ringawt a?" min tia. "Ka hre bik lo," ka ti ringawt a. Ka hre bik lo tak tak a.
Ka tlan tawrh tawrh a, kawng metal loh chinah ka tlan a, kawng sir a thing chu ka su ringawt mai a nih chu. Inthlan boruak vel nen ka rilru seng nasa lutuk kha a ni ber awm e. Ka na lova ka vannei tak tak a ni.
Upper Republic-a kan in luahah khan mihrang hrang khan min bawhbuai ve angreng a. Ṭum khat chu Kolasib lam mikhual ka nei diah a. Pali panga vel an ni ta awm e.
An zingah hian Akima leh Michael-a kha chu an tel ngei a. Tin, a changtupa ber kha a tel bawk a.
Ka plastic chaw eidawhkanah chuan kan ṭhu bial a. Kan titi laih laih a. Kan dawm pah zel bawk a. An ni khan an la duh tawk si lo, ka mut a chhuak tawh si khan ka mut san ta a.
Ka mu chu ka harh hlawl a. Ka harh chhan ka hre mai lo a. Ka pindan aṭang chuan choka lamah chuan ka penchhuak a. Ka mikhualpa pakhat chu chair aṭang chuan a lo tla a. Hmai nawr zawngin a lo awm a, a lo thi hnung mai a. Kaihthawh mai ka tum a, a lian angreng si, ka buai hle a.
Chutih lai chuan kan ṭhiante ho chu an mutna hmun ṭheuh (a then chhuatah, a then thuthlengah, a ṭhen dawhkan bawha lo la muhil tawk an awm bawk a) aṭang chuan an rawn tho khawm ta a.
Kan han kai tho fel chu, "Ngatinge min hnek ngawt a," a ti ta mai a!
"Ka hnek lo che, i tlu thawm ka hria a, ka rawn kai tho che a nih kha"
"Min hnek, ka hria alawm"
Ka hnekah a ngai tlat mai bawk sia, ka hnek lo che, ka tih leh a awih si lo.
Kan ṭhiante dang kha chuan ka mu hmasa tih an hriat avang khan ka hnek an ring lo vek a. Amah khan min puh tlat mai bawk si.
Tichuan, kan inah pawh chuan a riak duh ta lo a. Khawvar dawn hnaihah chuan a lainate ina riak turin an thlah ta ringawt a.
A buaithlak thei ṭhin a nia!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: