THLARAU THIANGHLIM THILTIHTHEIHNA CHU ENG NGE A AWMZIA?

I Nundan Thlirlet La

*THLARAU THIANGHLIM THILTIHTHEIHNA NEIH CHU ENG NGE A AWMZIA?*

Rick Warren

Jan 26, 2024

"Krista Isuaa Nunna Thlarau dan chuan sualna leh thihna dan ata chu mi tichhuak tawh si a.” Rom 8:2

Tu mah hian sual kan kalhlen thei lo va. A then chu thinrimna nen, a then chu lungngaihna, phunnawina leh tisa chakna hmang te’n sualin a bei a ni. 

Sual atang chuan engtin nge i tal chhuah ang?

Isuan i tana a tihsak tawh che kha i hria e. Kraws ah Isuan i sual man zawng zawng a tlak vek tawh a, pek tur engmah i nei tawh lo a ni. I sualna zawng zawng leh i tihsual tur thlengin a man chu Kraws ah tlak a ni tawh a ni.

Isuan i sual man chauh a tlak lo, i nuna sual hnathawh lo thleng tur man pawh a tlak tel vek a ni. Tunah chuan tun hmaa i neih ngai loh thiltihtheihna i nei ta - sual ti lo tura thiltihtheihna thlengin. Mihring chakna aiin a nasa zawk a. chu chu Thlarau Thianghlim thiltihtheihna a ni!

Bible-in Rom 8:2 ah, "Krista Isuaa Nunna Thlarau dan chuan sualna leh thihna dan ata chu mi tichhuak tawh si a,” a ti.

Kristian i nih chuan, Isuan i sual man a tlak tawh tih i hria ang. Chu chu Chanchin Tha a ni. Chu chu a la pangai reng avangin khawvela chanchin tha ber a ni. Nimahsela Isua kraws a  a thih khan, i mihring hlui chu a thai bo va, mihring thar a pe tawh che a - chuvangin sualah chuan i awm reng thei tawh lo a ni. Bible chuan, “Heng hi hria ila: kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tun achinah sual bawiha kan awm lohna turin,” tiin min zirtir a ni. Rom 6:6

Mihring chakna chu sual hnathawh dodal nan chuan a tawk zo lo vang. Nimahsela, Isua hnenah lawmthu awm rawh se, sual hnathawh hrang hrang te leh thihna te dodal turin Thlarau Thianghlim thiltihtheihna nasa tak i nei ta zawk a ni.

Ngaihtuah zui atan

* Kristian i nih hnuah hian nangmahah eng sual nge la awm cheu? 

* Thlemna i tawhin engtin nge Thlarau Thianghlim thiltihtheihna i neih theih ang?

* Kan mihring hlui chu kraws ah Krista ruala khenbeh ni tawh reng chung siin engti zawngin nge “sual bawih” ah chuan kan la tan reng?

*Vawiinah hian Isua i zui angem?*

Pathianin a thatna chu Fapa, Isua Krista kaltlangin a ti lang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ringturin i inpeih em? I inpeih anih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian emal min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*