(Ka pa thihcham vawi li-na pualin..)
📒Remmuana Chawngthu✍️
*Thuhma:*
Hun a liam zel a, 2024 India Republic Day (26 January) kan lo thleng leh ta. Hun rei lote liam ta kan thlir kir a; Ni 26 Jan. 2020 (Sun), Covid lo luh hma deuh, khami zana kan chhungkaw chunga thil thleng te chu, suangtuahna thinlungin a fang let leh rang ṭhin khawp mai a, *India ramin a mi-ropui kal tate a hriat tharna ni-ah hian keini chhungkua pawhin 2020 Jan. 26 zana kan in chhunga thil thleng hi kan lo hre chhuak thar ve leh ṭhin a ni.*
Damdawi in aṭangin, *"Hei, i pa hi a ṭha lo riau mai"* tih thu kan dawn chu, *"I pa chu a kal chiah e..."* tih thuin a rawn chhunzawm nghal a nih kha. Mahse, Pathian awmpuina zarah lunglen hrehawm lutuk avanga indawm kun tlawk tlawk kan nei thui lem lo a, *harh vang taka hringnun kawng kan zawh zui theihna tura min veng a, min ṭanpui a, min enkawltu- kan Pathian hnenah lawmthu ka sawi leh tak meuh a ni.*
*Aw, thihna...*
Ka pa khan tunhma aṭangin damsam loh neuh neuh nei ngun viau ṭhin mahse, chuti em em a bawihsawm ngaiin a awm tam hran lo a; han enkawl deuh viau ngaia a awm chu thla nga (5) vel a ni. Ka han sawi tum deuh tak chu, thla nga kan inenkawl chhung kha ipik deuh mahse, a rei lo takzet hian ka hria a. Chutih laiin, keini inenkawl hun chhung aia rei lo fe fe, a ṭhen phei chu inenkawl hman eih lo, dam loh lawk pawh awm lo a in-liamsan ta te, ṭhenkhat chu rei lote tak meuh in-enkawl hnua in-liamsan ta mai hi ka va hre hnem tawh tehlul em! Ka lainat hlawm takzet a ni.
Ka ṭhian ṭhenkhat leh hmelhriat ṭha bakah chhung leh khat hnai vai tak tak zingah ngei pawh, *"A va mak teh thut ve mawle...!"* han tih tura mual liam ta sawi leh hriat tur an tam tawh kher mai. Kum khat chhungin kei tehlul pawh hi dam lo kan, mitthi vui leh râlna hmunah hun ka hmang tam viau mai.
Engpawhnise, a ni thut emaw, thut lo emaw pawh nise, thihna zet hi chu a thawm thangri, a kaihhnawih leh a nghawng chhuah hi thil duhawm lo tak chu a ni chiang khawp mai.
Thihna chungchangah tute pawh hian, ngaihtuahna tam tak lo sen lawk ngai hi awm vein ka hria a,kan dam ṭhat lai tak hian. Chung zingah chuan, *he thihna hian kan in chhung (Kan chhungkua), kan taksa (Nunna) ngei hi engtik lai pawhin a rawn fang ve thei reng a ni tih hi theihnghilh lo hram ang u.*
Kan ṭhian te emaw, midang tu te emaw chunga thleng kan hmuh hian, *anni chungah pawh a thlen theih chuan, keini chungah pawh a thleng ve thei reng a ni tih hi kan hriat thar fo a va ṭul tehlul em!*
_*Pangpar mawi te hma takah..*_
Nikum (2023) khan kan vengah naupang pakhat a thi a, a thih dan kan ngaihtuahin khawtlangin a chhungte kan tuarpui angreng hle. A ruang tlaivarpuinaah hla pakhat kan sa a, chutih lai chuan pawnah ka ṭhu a,
_"Pangpar mawi te hma tak a,_
_An ṭhat lai ni a liam hi...."_ tih kan sak lai takin, ka bul lawka pangpar pakhat hi ka en reng a; ka ngaihtuahna heti zawng hian thui deuhin a kal kual a. Pangpar tam tak hi chu mawi takin a par a, rei lo te hnuah a uai thla a, a par a vuai a, a tawp mai ṭhin a ni. Mahse, a kungpui emaw, a zung a thih loh chuan, a hnu lawkah engtin tin emaw a rawn chawrno ṭha a, a kuhmum a, par a lo chhuah leh thei mai ṭhin a ni.
He hringnun ve thung erawh hi chu vawi khat a chuai tawh hnuah a vul nawn thei tawh lo a, thihna ruamah a luh tawh phei chuan he khawvelah hi chuan nung damin a awm leh thei tawh lo chiang takzet a ni.
*"Lunglen ah hian khawvelah ka champion"* titu - Damhauha chuan,
_"Aw, ka vul lai hringnun hi pialleiah,_
_A la zal ang maw, dairiala chang turin,"_ tiin, thihna nunrawngin a taksa a thunun hun tur a thlir a, khawvel thil chi tinrengin lunglennain a bual khat a ni. Engpawhnise, engtik lai pawha tawp thei reng, he kan nunna hi - ṭha leh mawi, hlim leh nuam bawk si a hmang zel turin, min vengtu leh kan nunna siamtu - chung Pathian zahngaihna kan chungah lo thleng mawlh rawh se.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: