PATHIAN THU CHU I THUKRU NGE I THINLUNGAH I VAWNG ZAWK?

_I Nundan Thlirlet La_

Rick Warren

Jan 31, 2024

"I chunga thil ka tihsual loh nan i thu chu ka thinlungah ka khawl khawm a.” Sam 119:11

I thinlungah Pathian Thu i khawl tam poh leh, thlemna i tawh changin lo inven dan i thiam zual ang.

Dik tak chuan, Bible hi thlemna kan tawh pawha rang taka kan tlukluhna tur a ni. Bible chuan “Pathian Thu chu thinlunga thukru” turin min duh a. Hetiang hian kan hmu, "I chunga thil ka tihsual loh nan i thu chu ka thinlungah ka khawl khawm a.” Sam 119:11

Pathian Thu chu vawngin emaw i thinlungah i thukru thei ang. Tichuan, Setanan a thlem che chuan, ”A tha lo vang, a chhan chu Pathianin hetiang hian a sawi,” i ti dawn a ni. Thlalerah Isua thlem tura Setana a lo kal khan, kawng thum lianpui puiin a thlem a. Setanan a thlem apiangin, Isuan Bible thuin a chhang let zel a ni. Hei hi Isuan Setana thlemna a do let dan a nih chuan, nang pawhin chutiang chuan i ti ve thei ang.

Setana thlemna i tawh changin, i phone a mi Bible zawng kual pah a, “Khawi laiah emaw chuan hetiang hi ti lo turin a sawi,” i tih mai chuan a tangkai nep hle ang. Nimahsela Pathian Thu chu i vawn tlat chuan, Thlarau Thianghlim chuan thudik chu a hriattir nawn leh ang che.

I nunah Setana thlemna do hneh tura hmanraw tangkai tak neih i duh chuan Pathian Thu vawng thin ang che. Thlem i awlna lai te i hriat chuan, Bible-ah a chhanletna inziakte i zawng hmu thei dawn a ni. Chung a bung leh changte chu ziak chhuak la, i vawn hma chu chhiar tlauh tlauh ang che.

Bible vawng tur hian pumpelh kawng a awm chuang lo. Bul ṭan tawp la, chhunzawm zel la, thlarau lama i thanlen theihna tura i hriatreng ṭul leh mamawh chu nei turin Pathian ring tawp rawh.

I lehkhabu dahnaa i dah mai mai chuan Bible chu i tan hlutna nei lo a ni ang. Nimahsela Pathian Thu chu i thinlungah i vawn tlat chuan, Setanan thlemna hmanga a beih hunah che pawh hmanraw thiltithei takah i hmang thei ang. Vawiin atang hian i chaklohna lai pui thei che Bible bung leh chang zawng ṭan rawh le.       

Chutichuan i thinlungah khawlkhawm ang che.

Ngaihtuah zui atan

* Pathian Thu i vawn theih nan Bible chang lehkhabua ziahchhuah bakah kawng dang eng te nge tangkai ang ? 

* Bible chang i vawn theih nan tuin nge pui thei ang che?

* Sual i dona kawngah hian engvangin nge Pathian Thua a thutiamte chu lakchhuah fo a pawimawh?

*[Lettu: Sangpuia]*