MZP-in Meitei nula lakah FIR thehlut

Aizawl | Jan 30, 2024: MZP chuan Meitei nula lakah FIR an thehlut a. Manipur University Students Union chuan Meitei nula hi rawn chhanin, MZP hmalakna hi an rawn chhang let thung.

Hetihlai hian, MZU hnuaia pawl hrang hrangin Meitei nula demna thu hi an chhuah ve bawk a ni.

Mizo Zirlai Pawl (MZP) General Headquarters, Aizawl chuan Meitei hel Arambai Tengol tana pawisa khawntu leh kan Zo hnahthlak unaute that vek tura ti tu Teresa Ningthoujam chu a zirlai chhunzawm theih tawh lohna turin Mizoram University (MZU) thuneitute a ngen a, Chi leh chi inkara buaina chawkchhuak thei zawnga a tawng avangin, MZP President Pu. H Lalthianghlima hmingin Vaivakawn Police Station-ah First Information Report (FIR) a thehlut.

MZP chuan Meitei hel tana pawisa khawntu Mizoram University-ah Ph.D zirlai an awm hi tha lo a ti hle a, hemi kawng a hma latu ber Teresa Ningthoujam chu a zirlai a chhunzawm theih tawh loh nan nimin January 29, 2024 khan MZU thuneitute hnenah a rang thei ang bera hma la turin a ngen.

Manipur a chi leh chi inkara inhmuh thiam lohna hi reh thuai tura a duh laia, a ti punlun zawng a inhnamhnawih MZU a zirlai an awm hi MZP chuan a dem takzet a ni. Hetiang thil hi a thlen nawn tawh loh nan Meitei hel (Arambai Tengol) tan a pawisa khawntu leh hlantu Teresa Ningthoujam MZU a Ph.D zirlai mek lakah vawiin 30th January 2024, chawhma dar 11:00 khan MZP General Headquarters chuan Vaivakawn Police Station-ah First Information Report (FIR) a thehlut a Officer In Charge in a lo dawng a ni.

Manipur University Students Union lamin MZP hmalakna hi an lo chhang let.