~ Lena Jongte
%20(1).jpeg)
Kum 13 vel bawr Journalism khawvelah khan ka tal ve a. Chumia ka thil tawn hrang hrang tlem azawng, ziaka dah tlak ka'n thairang mai mai teh ang. 'Ziaka dah tlak' ka'n tih kher chhan chu ziaka dah tlak loh, a awm ṭeuh vang a ni awm e.
Inkokichhuana Inbual:
Mizo Express nitin chanchinbu office, Congress Bhavan chhukthlaah khan chanchinbu mi junior deuh ho kha kan ri ve laih laih ṭhin a. News naran kan tih ang chi kha chu kan inpe chhawng mai zel a. Exclusive news erawh kan neih chuan kanin 'khilai' lem lo.
Ṭum khat chu news a vang viau mai a, tui van lai tak a ni bawk a. 2006 emaw bawr vel kha a ni ta awm e.
 |
| Lena Jongte |
Keia uang thuang khan Mizo Express office computer-ah khan news ka lo ziak a. News pangngai ka ziah tur ka hriat tawh loh hnu khan uangthungin, "Tui harsa: Tunlai Aizawlah tui a harsa hle a, Pu Joseph Lalnuntluanga te chhungkua pawh tui an harsa lutuk a, tui ren thilah an chhungkua in-koki-chhuanin an inbual ṭhin," tih kha ka ziak a. Joseph Lalnuntluanga hi kan ṭhianpa Zonet-a thawk, Tuikual Tuichhunchhuah bula awm an ni a.
Ṭhainte thenkhat hmanhmawh khan enchiang hlei lovin ka news ziah kha endik nawn lovin an chanchinbuah an lo chhuah chu niin!
Kan ṭhianpa Zonet News Reporter Pu Joseph Lalnuntluanga te chhung chu PHE lamin an lo zu zawngchhuak niin! "Kan inah PHE tui sem an lokal a, 'kan puten zu zawngchhuak ula tui zu pe rawh u, an ti, ka pu tui in harsa viau a ni maw' an tia. A inthlahrunawm duh hle mai," tiin a hnuah min hrilh leh!
Hei hi kum 13 vel journalist ka nih chhunga ka thuziak awmze neia action lak tlemte zinga mi a ni ta awm e a!
Khawvela ka thil hlauh ber ka tawng:
Septea (Joseph Lalrammawia), Romei nen khan kan inzui nasa khawp a. A leather bag phuai tawh lam kha a ak a, keiin savun ipte uk ka ak bawk a, a hunlai khan tlai tin Rangvamual kan kal ṭhin a.
U Mama of Vanglaini bike hlui, a leisak dum tle zak mai 789 kha kan inkhalh chhawk ṭhin a.
Ṭhiante dang duh ve ho khan min thawn tliar tliar ṭhin a, kan haw lam chu kan inak puar ṭhin hle.
2006/7 vel kha a ni ta awm e. Ṭum khat kan RV kal tur chu ruah nasa mang khengin a sur a. Kan nghak a. A han har nek a.
Kan zu chak tawh kha vawt ti ni mang silovin kan khur beuh beuh a, kan in uak chhawk tuar tuar a.
Chutih lai tak chuan thuthar lan hre ta. "Ngei ngei kawi bul ruam kha a mual minin a min a, a tlang hun tur a hriat loh," tih a ni ta. Bei a va dawng tak!
Tichuan, Septea nen chuan ruah la tla siar siar hnuaiah chuan RV lam pan chuan kan tlan thla lui a. A hnungah chuan ka chuang a. "A va buaithlak tak em aw, min bawih laklawh tawh si a, kal phawt mai ang," ka tia, a nui nasa mai a.
Kan tlan thla zel a, khua a thim ruai tawh ang tih chuan leiminna bawr chu kan thleng thla a. Khualzin tangkhang an lo tam khawp a. A chhak feah bike hungin kein leiminna hmun chu kan pan thla ta a.
Ruah a la sur cherh cherh a. Khua chuan min thim hnan ta a.
A hmun kan zuk thlen chuan kan ral rin aiin a lo nasa a. Lung lian pui pui kawngah chuan a lo khat hmuk a. A mual chim deuh thawin a chim tak tak a lo nia.
Ngaihtuahna a bing map mai.
Leiminna thlang lawk, kawi khat maiah chuan kan chak em em RAKZU in sen loh a awm tih kan hria a. Keini lah a chhak lawkah chiri lo chauhin, zu chakin kan uak tuar tuar si. Han kal tlang mai ngaihna a awm bawk si lo! Rilru a buai map map hle.
Patlingin zu nghei ngawt thu a awm lo, tiin kan inpet ruh a. Keini ang tho a, zu chak ve em em pawlpui tur kha an lo awm ve nual bawk a. Leiminah chuan a rem dan danin zan thim hnuaiah chuan chirh kan dai thla ta alawm.
Lighter eng thei bak kha êng kan nei lo a. A thim khup mai bawk si. Ruah a la tla reng bawk si!
Lei a rawn min belh leh ang, tih mawlh kha ka hlau a. Hemi ṭum hi ka damchhung nia ka thil tawna ka hlauh ber ṭum a la ni ta awm e!
Tichuan, kawng zawn sa awm miah loah, zan thimah, chu leimin chhah em em mai chu kan pal ta a. Leimin huam chin chu rin aiin a lo zau nasa mai bawk si! Chirh chu malpui thleng thlengin kan dai a, tluk leh tlak fawm tak meuh meuhin kan dai tlang a.
Thlang lamah pawh chuan chhak lam aia tam daih kualzin an lo tangkhang a.
Kan regular ṭhinna Ka Nu VLi In pawh thleng hman lovin a hnai hnaiah chuan kan lut a. Kan lam sawk sawk a, rakzu ngei mai chu kan han khiat khawlh khawlh a! Hah a dam huai huai mai!
A tukah kawng a la tlang dawn lo tih hre ranin kan ah theih tawk ve ve rakzu ak chuan kan zu inna chu kan chhuahsan leh a.
Leiminna hmun kan thlen chhoh leh chuan midang pawhin leimin chu an lo paltlang ve ta nual a. Ruah tla pawh a lo ziaawm ta a, kan lo lem nual tawh nen, kal lam ai chuan a zuamawm ta deuh.
Khualzin tangkhang zinga haw ṭuah zual pawhin an lo daikai ṭan mek tawh a. Rual khat hnungah chuan leimin chu kan dai chho leh ta a. Kan ak rit si, chirh a thuk si, ava manganthlak tak!
Kan hmaa kal ve nula pakhat hlau leh mangang chirha penchhuak thei tawh lo tang chu a ṭap ta chiam mai a. A lua suitcase a chhipchhuan chu ka va lak sak a, Septea nen chuan kan zawnpui a, kan chhawm ta a.
Ruah sur tawh lo mahse, tuihawk a luang ri hum hum a, a thim mup a. Indapchawp tak meuh meuh a, thing tlu leh lunghmuna diak kara kal kan ni bawk a, a hlauhawm hle.
Kan ṭhian dun chuan Zu kan ak rit nen, a buaithlak thuahhnih hle.
Thi lova ruangin kan dai kai leh ta a.
Heng hunlai hi Zozam Times-a News Editor ka nih lai a ni a. Ka la hre reng, Pu Sangzela Tlau-in America ram aṭanga a rawn haw a leather jacket min pek ngei kha ka ha a. A berh hneh hle.
Tichuan, kan in, Upper Republic LZ Colney-ah chuan berh em em, zu ak bawr em em chuan min thlah ta a.
Kan khua aṭanga ka Pu T Thangliana lo zin lai a ni a. Ka pu ka zah si, zu ka hawn tam si, thurukna tur a vang duh hle mai.
Septea hian min chawlh san tawh a. Ka ngai ṭhin!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: