Tata SK 612 LPS Pro Fight a hmawr bawk hnai; Zotea'n WBC India super bantamweight champion kawnghren a hreng

Aizawl | November 11, 2023: TATA SK 612 LPS PRO FIGHT 2023 chu nizan khan LPS Arena, Falkland Veng-ah khelh leh a ni a, mipuiin an hlut hle.

Zaninah a hmun ngaiah a tawp khar a ni ang.

RESULT - TITLE FIGHT

Zan 27-na : November 10, 2023 (Zirtawpni) : Bout 4

MIDDLEWEIGHT

C Lalhruaitluanga (Chawngtlai) bt F Lalthanliana Junior (Lunglei Electric Veng)

= Unanimous Decision (40-36, 40-36, 40-36)

* 2022 welter champion, kum 25 mi Hruaia'n a vawi hnih nan title a hnek chhuak a, Pro Fight weight hrang pahniha champion thei zingah a hming a nem kai. Professional boxing ṭum sarih a khelhna niin a chak vek. Kum 23 mi Thanliana'n inven leh hnek dikah a pha lo va, Pro Fight-a a tel hmasak berah Lunglei Electric Veng boxer hian champion kawnghren nena haw a tumna a tihlawhtling zo lo va, professional bul a ṭannaah hnehna a chang zo lo tel bawk.

SUPER BANTAMWEIGHT (WBC INDIA TITLE)

F Zoramchhana (Cherhlun) bt Adil Rajesh Kumar Singh (Mumbai)

= Unanimous Decision (80-72, 80-72, 80-72)

* Phu takin kum 24 mi Zotea a chak a, hnukulh chungin WBC India super bantamweight champion kawnghren a hreng. Pro Fight title fight-ah 2017 aṭanga 2022 chhungin vawi thum a tlawm zawn a, WBA Asia title chuh tawhin a chak zo lo bawk. Title Fight-a ṭum nga a inlannaah hlawhtlinna a sual chhuak a, professional boxing-a vawi sarih a chakna ni nghalin ṭum thum a tlawm tawh. Kum 24 mi Adil chuan round riat tlu lova a khelh tluan hnuah a lawm hle tih a sawi a, professional-ah ṭum kua chak tawhin a vawi nga nan a tlawm a, Mizo mipuiin boxing an ngainat avangin nuam a ti hle.

BANTAMWEIGHT (WBC INDIA TILE)

Laldingliana (Tuipui) bt Pradish A (Chennai)

= Technical Knockout (Round 1, 2:53 min)

* Kum 24 mi Dinga'n vawi hnih a hnek tluk hnuah tho leh mah se vawi sarih hnek fuh zawnin lehlam a talbuai zo vek a, referee Ajay Salvi chuan round khat a zawh hma lawkin a titawp. Tuipui tlangval hian November 26-ah WBC Asia title chuh a tum a, inbuatsaihna ṭha tak a ni tih sawiin, professional a luhchilh aṭangin boxrec-a a inhnek chhinchhiah tawh vawi liah a chak vek a, knockout-a a chak ṭum thumna a ni. Pradish erawh professional huangah vawi li a inlanna niin a ṭum khat nan a tlawm.

BANTAMWEIGHT - Round 4

Laldinsanga (Lunglei Ramthar) bt Ramdinthara (Pangzawl)

= Unanimous Decision (38-37, 39-36, 40-35)

* 2022 best boxer Dinsanga'n derthawng takin inlehthalna a pumpelh hram a, a beisei tihlawhtlingin Pro Fight weight hrang pahnihah a champion. Nikumah a bitum apiang knockout vekin flyweight title a la a, Pro Fight a khelh tawh vawi riatah chak vekin, professional a luhchilh aṭangin vawi ruk a chak zawnna a ni tel. Mahse, Ramdina'n round khatnaah nawr hnehin chiang tak takin a hnek a, round hnihna aṭangin inhawngin chawl lovin an inhnek tluan. Round lina tawp nan second 27 a la awm tihah ama thuin Ramdina a chawl ringawt a, referee Malsawmsanga'n chhiarin point paihsak a nih phah a, inbeihna nasa takah Pangzawl fighter-in tawn hriat a tlakchham a tuar.

GIG Motors Fighter of the Night (Rs 3,000)

- Laldinsanga (Lunglei Ramthar)

----------------

TATA SK 612 LPS PRO FIGHT

@ LPS Arena, Falkland Veng

TITLE FIGHT - FIXTURE

Zan 28-na : November 11, 2023 (Inrinni) : Bout 4

WELTERWEIGHT - Round 4

Lalruatzela Hauzel (Mission Veng) v Vanlalruatpuia (Saikhamakawn)

LIGHTWEIGHT - Round 4

C Lalhruaitluanga (Cherhlun) v HC Lalramfela (Chawngtlai)

WBC INDIA SUPER LIGHTWEIGHT CHAMPIONSHIP - Round 8