ZPM MLA Candidate-te'n chhungkhat laina leh mi dang duhsak bikna laka inthiar fihlim turin an intiamm

Aizawl | Oct 25, 2023: Nizan khan ZPM MLA Candidate-te Valum Upa Council in rinawmna  intiamtir a, chhungkhat laina leh mi dang duhsak bikna laka inthiar fihlim turin an intiam.

Nizan October ni 24, 2023 (Thawhtanni) khan Dawrpui Multipurpose Centre-ah kum 2023 MLA inthlanpui awm turah Val Upa Council te ruahmannain ZPM Candidate-te rinawmna thutiam hun hman a ni a. He hun hi Rosila Tlanthianghlimi chuan Host niin a kaihruai. 

 VUC chairman Pu Lalfakzuala, IAS (Rtd) chuan, " Kum 2018 inthlanpui kan neih dawn khan vawiin ang hun October 24-ah kan Candidate-ten rinawmna thu an lo tiam tawh a, hun in angah ropui zawka hetiang hun kan hmang thei hi a lawmawm takzet a ni. Zanina candidate thutiamna hun hmangtute hian VUC hmaah thu an tiam mai a ni lova, ram mipui hmaah rinawmna thu an tiam avangin a pawimawh takzet a, hun hlimawm a nih rualin a pawimawh em avangin VUC-te chuan urhsun takin hun kan hmang a ni. Zaninah mi 31-in hming an ziak phawt dawn a, chhim lama candidate mi 9, campaign leh tuldang avanga zanina inlan thei lote pawh hun hranah rinawmna thutiam kan neihtir ve leh dawn a ni," tiin Candidate-te rinawmna thutiamtirna hun a hmang a ni.  

  

Pu Rinsanga, IAS (Rtd) VUC member chuan VUC kalphung leh ZPM tana an hnathawhte sawifiahin, " Val Upa Council chungchang hian sawi a hlawh thin a, ZPM dan buah a hnathawh dan tur leh kalphung chiang taka tarlan niin inkaihhruaina dan pela kalsual tur vengtute kan ni. Hlemhletna (Corruption) a hluar chuan ramin a tuar thin a, zanina thutiam kan neih chhan pawh hi chumi laka fihlim tura intiamna a ni a. Kan dan buah chuan VUC chu ZPM party uaptu leh khalhngiltu mai ni lovin phuarkhawmtu a ni a, tul a tih huna thurawn petu leh zilhhau ngaite zilhhau theitu leh thutawp thleng pawh siam theitu a ni" a ti. 

Prof.Thangchungnunga, Secretary, VUC chuan VUC (Val Upa) member-te inhmelhriattirna hun hmangin Pu Lalliansawta, President, ZPM chuan Candidate-te mipui hmaa inhmelhriattirna hun a hmang bawk a. Pu Bualhranga, VUC member chuan fuihna thu sawiin Leader Pu Lalduhoma pawhin thusawina hun a hmang bawk. Rev.Darchungnunga, VUC member chuan candidate-te tawngtaisakna hun hmangin hun tawp an khar a ni.

ZPM MLA CANDIDATE-TE INTIAMNA -

1. Zoram People's Movement hian Kalphung thar mipui sawrkar, ram leh hnam damna, langtlang leh hlemhletna laka fihlim sawrkar siam a tum a, chuvangin Candidate ka nih lai leh MLA ka nih hunah pawh ZPM thuthlungte, Election Manifesto leh vawiina rinawmna thutiam hi ka vuan tlat ang.

2. Candidate ka nih laiin Mizoram People Forum (MPF) kaihhruaina leh Election Comission Model Code of Conduct ka zawm ang.

3. ZPM Candidate ka nih angin MLA-a thlantlin ka nih chuan ka chunga thuneitute thu chu engkimah ka zawm ang a, ka dinhmun atana an ruat apiang pawmin ka mawhphurna chu rinawm takin ka hlen zel ang.

4. Nomination ka file a, ka sum leh pai leh ro thil dang ka ziahna (Declaration of asset) ka thehluh copy chu kar khat chhungin Val Upa Council Secretary hnenah ka thehlut ang a, hei hi hlemhletnaa inhnamhnawihna kawnga rinhlelh leh puh ka nih thulhah leh tul danga hman ka remti e.

5. Chhungkhat laina leh midangte, tute pawh duhsakna bik lakah ka inthiarfihlim ang.

6. Pawl dang nena thawhho leh inzawm chungchangahte, nihna leh dinhmun chungchangahte, ZPM thuneitute thutlukna apiang ka pawm ang.

7. Eng dinhmunah pawh ding ila, danin hamthatna min pek chhungah ka nung ang a, ka dinhmun avanga hamthatna siamchawp theih thildang reng rengah ka inhnamhnawih lo ang.

8. He rinawmna thutiam hi hriatdan in ang lo a awm palh a nih chuan Val Upa Council hrilhfiahna chu ka zawm ang.

.