Zoram Thar-in Manipur Zofate tanpuina hlan

Aizawl | September 6, 2023: Zoram Thar Zofate Lairelna Inpui hruaitute chuan Manipur Zofate ṭanpuina hlan turin Thawhṭan zan dar 9:30 khan Lamka an thleng. Zoram Thar Zofate Lairelna Inpui hruaitute hi an hruaitu Rev. Dr. Zaichhawna Hlawndo (Hruaitu) hovin, Upa Zosangliana (Hruaitu Chhangdawl), Pu Lalremsiana (Hruaitu Chhangdawl), Nl. Lalruatfeli Hlawndo (Ziaktu Lian), Tv. Lalawmpuia Ralte (Ziaktu Puitu), Tv. Daniel Lalruatfela leh Nl. Lalropuii an kal.

Nimin khan ITLF hruaitute leh Lamka Joint Artistes te nen Front Line leh Relief hmunte tlawhin tanpuina Dal, Chana, Sa leh damdawi hrang hrang te an sem. Relief centre leh Front Line paruk Chingphei, Sehping, P. Geljang, Pangjang, S. Lonphai leh Khousabung an tlawh. Zan dar 6:30ah Rayburn Presbyterian Kohrannah thusawina hun an hmang.

Vawiin September ni 6, dar 11:00 khan martarte hriatrengna hun an hmanna Wall of Remembrance ah Rev. Dr. Zaichhawna Hlawndo leh Nl. Lalruatfeli Hlawndo ten thu an sawi bawk. Ṭawngṭai, zai leh thusawiin hun hman a ni a, dawr leh office khar vekin mipui tam tak an pung khawm. Zofate kan party, pawl leh chibil indaidanna ṭhiat zelin, Krista tan kan inpumkhat a ṭul takzet thu an sawi a. Zofate zawng zawng Pathian remruat ang zela kan independent tur thu leh Manipura Zofate tawrhna a thlawn dawn loh thu te sawiin mipuite an thlamuan. Zaninah leh naktukah rawngbawlna an chhunzawm dawn niin Zoram Thar chuan an tarlang.