SUM LEH PAI CHUNGCHANGA THURAWN PATHIAN DIL RAWH

 _Ni 50 chhung Rinna_

By Rick Warren 

— Sep 6, 2023

“Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u.” Philippi 4:19

Philipi 4:19 ah hian Pathianin thil tinreng min pe thei a ni tih kan hmu a: “Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u.”

Thil pahnih chhinchhiah tur a awm: “Pathianin min pe dawn” tih a sawi a, “min pe maithei” a ti lo a ni. Chuvangin, i mamawh Pathianin a pe dawn che. Dik takin a inziak a. Pathian chuan a nihna leh a tih theih chiang takin a sawi a ni.

Kan en chhunzawm zel chuan, “In tlakchhamna tinreng pawh a phuhruksak ang che u,” a ti a. “In tlakchhamna thenkhat hi chu a phuhruksak ang che u,” a ti lova. Thil engkim a huam zawk a ni.

Heti hian en leh ang, “Pathian chuan i duhamna thlengin a phuhruksak zel ang che,” a ti lo va. Mamawh leh duh hian danglamna a nei a ni.

Nu leh paten, in fate an duhzawng apiang in pe ngai em? Ka ring lo. I pek lohna chhan chu i hmangaih vang a ni a - in Pa vana mi pawhin a hmangaih che a ni. In duhzawng apiang a pe bik lo che a, a pek che u chuan in thih phah ang - chuvang chuan i duhzawng thenkhatte hi chu i tan a tha lo vang a ti a ni.

I duhzawng apiang a pe lo vang che, i mamawh zawng erawh chu a pe thung ang che. 

“A nih chuan engvangin nge sum leh pai mamawhna ka la neih fo?” i ti maithei.  Pathian chu a hlawhchham em ni? A daw em ni? A uar mah mah em ni?

Ni lo e! Thutiamnaah chuan, dan leh dun, hlenchhuah ngai a awm thin. Pathianin thu a tiam khan, a beisei fo thin chu, ”Ka tih tur ka ti ang a, i tih tur i ti ve thung ang.” Pathianin sum leh pai chungchanga inkaihhruaina a siam chu a Thu-ah chiang takin a tarlang a. Bible-in thil tam tak a sawi a sum leh pai enkawl dan te, inkhawl dan te, hmanchhuah dan te, pekchhuak dan te, peipun dan te, vawnhim dan te a tarlang a ni. Sum leh pai lama i lo ngelngheh theihna tura i mamawh zanwg zawng a pe vek che a ni.  

Chu inkaihruaina a siam chu i hriat theih nan i dil a ngai a ni. Isuan, “Tun thlengin ka hmingin engmah in la dil lo; dil rawh u, tichuan in hmu ang, in lawm a kimna turin,” a ti. Johana 16:24

Mi thenkhat chu Isua Krista aiin an Credit Card-ah an innghat tawh zawk a. Hei hi dan tha chu a ni: I lei hmain tawngtai la. I kalchhuah hmain Pathian chu hun remchang siamsak thin rawh. Sum leh pai chungchanga thutlukna dik i siam theih nan finna dil thin rawh.

Eng vangin nge Pathianin dil turin a duh che? Pe theitu a nih avangin. Eng vangin nge pek che a duh? Dawng theitu i nih avangin.

Eng vangin nge dawng turin a duh che? Hlim taka i awm theihna turin.

Sum leh pai chungchanga Pathian thuawih hian hlimna min pe a ni. Dil tawp la. Pathianin engkim a ngaihtuah ang.

Ngaihtuah zui atan

* Sum leh pai chungchangah eng kawngah nge Pathian hnena inhlan harsatna i neih? Eng vang nge?

* Sum leh pai enkawlna kawngah hlim takin mawhphurhna i hlen thei a, chu chu mi dangte tan engtin nge entawn tlak a nih ang?

* Thil lian tham lei i tum em? Vawiinah hian thutlukna dik i siam theih nan Pathian finna engtin nge i neih theih ang?

*[Lettu: Sangpuia]*