'Mizoram Politics Bihchianna' lehkhabu tlangzarh

Aizawl | Sept 5, 2023: Mizoram Legislative Assembly Speaker Pu Lalrinliana Sailo chuan vawiin chawhnu khan a office chamber ah Tv. K. Remruatfela lehkhabu ziah "Mizoram Politics Bihchianna" tih chu a tlangzarh.

Speaker chuan District Council, Union Territory leh State puitling Mizoram a nih thlenga ministry tin hnathawh chik taka zirchianna leh British in Mizoram a awpbeh laia inrelbawlna leh India union chhunga rin luh a nih dante kimchang tak lehkhabu ziah a ni chu lawmawm tiin, mi tam takin an tangkaipui ngei a beisei thu a sawi.

He lehkhabu tlangzarh inkhawm hi Pu R. Lallianzuala, Mizo Writers Association President in a kaihhruai a. Tv. C. Lalnundika, Mizo Reform Movement chuan lehkhabu thlirlawkna neiin, Prof. JV Hluna, Mizo Writers Association Adviser kaihhruaiin Mizoram politics sawihona neih a ni a.

He lehkhabu ziaktu, Tv. K. Remruatfela hi eizawnna lamah chuan Advocate niin vawiina tlangzarh tak 'Mizoram a Politics Bihchianna' hi a lehkhabu tihchhuah 20-na a ni. He tlangzarh inkhawmah hian thuziakmi, politician, ukil, research scholar, entrepreneur leh academician tam tak an tel a ni.

Vawiina lehkhabu tlangzarh hi phek 200 a chhah niin, thuziak hrang hrang 25 a awm a, Cheng 300 in lehkhabu dawr hrang hrangah lei theihin a awm dawn a ni.