BO HMANG KA NI!

- Dikteii Hnamte

Sept 4, 2023

Kar hmasa khan Mumbai lamah ka hnathawh avanga ka tel ve theihna, India ram pawn atang pawha he hun hmang an kat nukna leh ‘Enga?’ tih pui tur awm miah lohna hmunah hun ka zuk hmang ve a. Hetiang ang deuh chi hi chu ka tel ve zeuh zeuh tawh a, Mumbai pawh vawi engemaw zat chu ka kal ve tawh thin. Tun tum zet chu a behbawm ka thil tawn nuihzatthlak deuh deuh ka sawi chak tlat mai!

Tun tum kan hun hman tur hi tum dang aia lian leh pui deuh anih vang a ni maithei, nidanga min thlen tir thinna hmun ni lovah thlenna an lo ruat a. Mumbai airport atangin mahni a taxi lak mai tur anih thu leh a hnua bill leh mai tur anih thu min hrilh lawk thlap a. Pre-paid taxi ka la a. Nidangah chuan basement lamah kan chhuk thin kha maw tiin pan ka tum ngawt a. A lo ni ta hauh lo mai a - bo vawikhatna ka tawng nghal pang mai!

Kan hotel thlenna tur chu ka thleng a, 2nd floor maiah min dah a, room 209 ah. Lo han chho tur leh ka bungrua chu an tirhkahten an rawn dah tur min hrilh a, mahniin ka chho a. Ka room chu a kil berah a awm tih banga inziak atang chuan ka hre thei a, pan turin ka hawi phei a. A thim phei ruih mai. Corridor tawn tawnah ah chuan light hmeh enna tur ka zawng, a awm si lo, hlau ru ang reng takin ka kal chhet chhet a. Chutah, ka ke pen rual deuh chiah chuan ka hma feet 2 vel zel chu a eng ta zel a, a en hmasak ber chuan ka phu nasa asin aw…… ka bo vawi 2na ka ti a hei hi.

Ka bo vawi 3na hi a ropui lo hle. Inbual turin bathroom ah ka lut a. Khu’ng laiah chuan keini bathroom te angin bucket leh no lian leh thutna te an dah ve ngai lo tih chu in hre vekin ka ring. Shower, chung lam atanga phuh chi hi an hman uar em hi. Vawi tamtak, vairamah pawh hetiangah hian ka inbual ve tawh a, Mizorama kan hman lar ang hmang lem lovah pawh ka inzawng hmu ve mai thin kha a nia…. Tun tum chu ka buai teh e! Tui herh hawnna pangngai chu kual deuh pap, te chhe lo tak hi a ni a, inbual tura inpeih tak mai chuan kan tikual vel ta alawm le. Hnuai lama tui hawnna pangngaiah hlir a hawng a, ka kuai dak, ka nem lut, vei zawng, ding zawng ka herh kual, a theih loh thlenga tih ka tum, tihchhiat ka hlau bawk si, mang a ang takzet. A changin tui vawt, a changin lum pip pep, a chang leh sa zet tih ang rengin ka tihawng hum hum a (Aizawl chu ni se ka thawm hre phak apiangin “tui i va ren lo ve” min ti tuarh tuarh ngei ang). Chutah tui herhna hnuaiah chuan lang mang lovah hian pawh zeuh theih hi a lo awm tih ka dap fuh ta a, ka’n pawt a, chunglam atangin a rawn phuh ta tlawrh mai chu ka va phu chiang tak em! Ka intithei hman viau a, mahse ka thlah veleh hnuai lamah bawk a chhuak leh tur tur thin. Rei ngial ka thlek kuala ka beih hnuah chuan pawt kau chunga herh zeuh tur tih ka zir chhuak ta hram a. Inbual tur mai mai ka hah pherh erh a ni ber mai.

Kan room chu a hawnna pawh card hmanga deh zeuh chi kha a nia (hei hi chu a hmaa ka thiam kha a lo la tangkai hlauh a), a chhungah pawh chu card chu a dahna turah thiah zeuha light pawh rawn enga fan pawh in on nghal mai kha a ni a, duh lai tih thima fan pawh duh anga vir chak/muan tir leh mai kha a ni. Bangah chuan AC controlna a awm bawk a, ka luh lai hian degree 20 ah a awm a, fan a lo in on nghal bawk avangin tawk ka ti fu a, chutiang ah chuan mut zai ka rel ta a. Engemaw chen ka mut hnuah lum ka tih avangin AC chu 16 ah ka dah a, puan sinin ka mu leh a, zinga ka harh chu ka thlan deuh chap a, puan pawh ka lo leng hlim vek a lo nia, mak ka ti angreng hle. Nilengin ka chhuak a, zan a lo nih leh chuan ka room lum chhan chu hriat chhuah ngei tumin ka en kual a. AC controlna chu tarmit vuahin ka en kual a, hmeh theih zawng zawng ka hmet a, a danglam lo hle. Beidawng angreng takin a chunga hmeh tur tetakte chu awmzia a neih pawh ring lovin ka’n hmet a, a rawn eng zeuh va, a thaw vawt ta sawng sawng mai! A zan 2na chu vawt nuam takin, rizai sinin ka muhil ta bawrh bawrh mai. Ka bo vawilina hi duhaiin ka bo rei a, hrehawm ka tuar phah khawlumah!

Thlawhnaa thutna tur hi mahnia lak lawk theih leh mahni duhna taka thutna tur a lak theih tawh tih pawh hi kan hre furin ka ring. Hei hi chu ka bo lo. Ka bo loh chhan pawh ka fapa in min laksak vang a ni. Kal lam leh hawn lamah seat hma deuh min laksak ve ve a, hawn lamah 2C ah ka thu a, Kolkata kan thlen hian ka hmaa thute an hmanhmawh loh em avangin ka chhuak hmasa ber a, ka intithei hle. Aerobridge a chhuak ka ni bawk a ka hnunga mi tumah an lo la chhuah ve hmain thla te ka la vel a, ka kal vei nal nal a. Ka kal ka kal a, ka hnungah lah tumah an lokal lo! A tawpah, airport chhawng chung ber kawngkhar ka thleng hlawl a, chain leh tala-in chhung lamah a lo inkalh a. Chhung lama awm ten mak tih hmel zetin min lo en a, ka hnungah lah tumah an la awm chuang lo. Ka let leh hnak hnak a, ka chhuah khalh, intithei ru taka ka kalsan te kha a hnuai chiah chhawngah an lo chhuak phei dam dam tawh a, a then chuan mak tih hmel takin min en bawk a. Ka bo vawi 5na chu!

Ni 4 chhung leka ka bona chi hrang hrang ka ngaihtuah hian, ka bo chhan hi thil chi hrang hrang, a bul ber chu, keimah vang a ni tih hi a chiangin ka hria.

Engmah hi thiam bel em em a awm theih loh tih sawi fotu hian thiam bel emaw ka intih avanga ka bo kha a awm tlat. Midang zawha hriat mai tur, taxi dinna te kha intihre tak khan ka pan sual chat kha a ni si a. Ka kal hma khan tuemaw kha zawt ni mai ila ka bo lo thei reng si. Inti hria, hre si lo ka lo ni reng mai.

Ka bo vawihnihna kha chu ka hriat loh thil takzet a ni a, dem tur emaw, puh tur emaw ka nei lem lo. Hmasawnna mi rama zuang ang kha ka awmna hmunah a la awm ve lo miau a, a awm anih pawhin ka hmuh phakah a awm ve lo tlat hi ka bona chhan kha chu ni berin ka hria.

Bo vawithumna leh vawilina hi chu, tawng in awm ve zeuh zeuhvin ka ring tlat! Hriat loh na na na chuan bo loh ngaihna awm hek lo le! Thiam loh avanga tawrh a ngai anih pawhin tlanchhiatsan mai lovin kan zir chhung tal chu tuar han huam tlat mai ila, hriat fuh hun a lo awm mai dawn a lo ni, beidawng lova kan beih phawt chuan.

Bo vawingana ber mai hi! Chiang hauh si lova hre ber awma awm bona a ni ka ti lo thei lo. Ka hnunga awmho an lo lan loh khan kan chhuahna tur kawngka hawn a la nih loh avanga lo chhuak lo an nih kha ka ring leh hnuhnawh a. Kei lah inti hmasa ber khan ka kal tak vawh vawh a! Ka let leh ta hna hna kha a nia… min nuih vak vak awm mahse a mak lovang.

Kan dam chhung hun kan hmanna kawngah hian bona tur hi a va tam tehlul em.

Mahnia hre tawk leh thiam tawk nia kan inhriat chiah hian bo hi a lo awlsam hle a ni tih hi a takin ka tawng tlat. Kan thuhnuaia awm lo kan chheh vela thil awm hi inthlaka hmasawna danglam thin a ni tih pawm duh lova ‘hmânah pawh ka thiam tawh’ kan tih ngawt hi hun danglam leh mihring changkang zelah kan mualphona thlen theitu a ni tih hriaa hmasawn tura rilru siam reng hi a va pawimawh em.

Mi hmakhalh thei nih avanga chapote hi thil awlsam tak, a tawpa kan chetsual phah theihna a ni tih hi, inti hmasa ber rilru pu-a ka chhuak nal nal ve ngawt, ka bo lo ni reng si te atang khan ka hrethiam thar ve leh bawk a. Midang ngaihchan nachang hriat miah loh te hi min timualphotu a lo ni thei reng mai.

Bo lo tur tawka mahni inhmakhua leh hmasawnna ngaihven te hi ching ila. Thiam nal leh thiam zawh tak tak hi kan damchhung hian kan nei thei lo a ni tih pawma inngaihtlawm hi a lo va pawimawh em.

Bo loh a pawimawh em em lai hian pawimawh zawk nia ka hriat tak chu - kan bo anih pawha bo nih inhriata zir thar ngai anih pawha zir tura beih talh talh leh kan bona hmuna kir leha bul tan tha leh tura inhmuh chhuah hi a ni awm e.