MZP leh Zo Event Management in raltlan ṭanpuina hlan

Aizawl | Sept 5, 2023: Vawiin ni 5th September, 2023 (Thawhlehni) hian MZP leh Zo Event Management ten raltlan ṭanpuina tura charity concert an buatsaih aṭangin Darlawn leh Ratu khuaa Manipur raltlante tanpuina a hlan.

Ṭanpuina hi MZP President Pu Lalnunmawia Pautu chuan a hlan a; Ratu khuaa raltlan chhungkaw 11 te chu chhungkaw tin tan Buhfai Bag-1 leh Rs. 500/- theuh an hlan a. MZP Sub Headquarters Ratu hruaitu ten MZP General Headquarters President hi an tawiawm.

Heng bakah hian, Darlawn khuaa raltlan chungkaw 40 velte chu a an mamawh leh tul apiang lei nan Joint YMA Darlawn leh MZP Headquarters Darlawn te kutah Rs. 33,000/- hlan a ni bawk.

MZP President Pu Lalnunmawia Pautu chuan, raltlante tanpuina pek pah hian MZP Sub Headquarters Ratu buatsaih Teacher's Day lawmna hun a hmanpui nghal a ni.