MSBA-in National Pool Championship 2023-a Mizoram aiawhtu Playerte hmuak

Aizawl | September 16, 2023: Vawiin chawhnu dar 2 khan Mizoram Snooker & Billiards Association (MSBA) chuan Indian National Pool Championship ( 9 & 10 Ball) 2023 a Mizoram aiawhtu Player pathumte Lengpui Airport-ah hmuak.

Vawiina Player hmuahte hi PB Liansangzuala, Dawrpui, Aizawl, Lalrina Renthlei, Tuikhuahtlang, Aizawl leh Laltlansanga, Lunglei te an an ni a. Lalrina Rentlei hian 9 Ball-ah Bronze a lo hawn a ni.

Vawiin hmuahnaah hian MSBA hian an President Vanlalnghaka hovin Lengpui Airport-ah an hmuak.

9 ball bika hian Lalrina Renthlei-in Bronze a hlawh chhuak. 10 ball-ah Quarter final a thleng thung.

Laltlansanga, Lunglei chuan 10 ball-ah round of 16 a thleng pha bawk a ni.

September 9, 2023 Inrinni khan 9 ball Semi Final match an khel a, Delhi lam mi Sundeep Gulati nen inkhelin, 10 - 4 in Lalrina Renthlei hi a vanduai zawkah a ṭang a. An match hi race to 10 a khelh a ni. (Vawi 10 chak hmasa sa. ) Bronze nen a rawn haw ta a ni.

September 14 khan 10 ball quarter final khelin, Lalrina Renthlei hi a vanduai ta a ni.

9 Ball Semi final-a a hneh loh, champion ta Sundeep Gulati chu 10 Ball Pre Quarter-ah a hneh a, mahse, Quarter final-ah a chak zo ta lo a ni. 

September 1, 2023 aṭanga neih Indian Pool National Championship (9 & 10 Ball)-ah hian Mizoram state aiawhin Mizoram Snooker & Billiards Association (MSBA) Player pathum;  PB Liansangzuala, Dawrpui, Aizawl, Lalrina Renthlei, Tuikhuahtlang, Aizawl leh Laltlansanga, Lunglei te an kal.

Indian Pool National Championship (9 & 10 Ball) hi Daly College, Indore, Madhya Pradesh-ah nghah a ni a. September 15 khan a hmawr bawk a ni.

Lalrina Renthlei hi Snooker-ah 2010 - 11 khan National Junior Champion a lo ni tawh a, Snooker-ah India aiawhin Senior-ah vawi 2 leh Under 21-ah vawi 2 a lo khel tawh a. Pool-ah hian tum hnih senior-ah bronze a lo la tawh a, India aiawhin vawi hnih a khel tawh bawk.

Basketball lamah pawh player pawimawh tak a ni a. Basketball-ah hian India Senior tean-ah player pawimawh tak niin a lo tel tawh a, South Asia Basketball Championphip (Sr) ah Champion 2021 an lo ni tawh a ni. Hemi bakah hian FIBA 3x3 world tour tum hnih a lo khel tawh a, FIBA 3X3 No 1 a lo ni tawh bawk a. Mizoram Basketball Association (MBBA) buatsaih Mizoram Super League-ah vawi 5 a zawna champion niin, Vikings ah MSL 1-3 a khel a, MSL 4 atangin tun thlengin Zarkawt BCA -ah a khel a ni.

Hawla Indoor Stadium, Republic Vengthlang-ah hian Mizoram Snooker & Billiards Association (MSBA) leh Mizoram Basketball Association (MBBA) in hall an neih ve ve avangin, Hawla Indoor Stadium-ah hian Lalrina tana zoram denchhuahna tham game a kim, an ti fiam thin.

.