Tuikual lui lianin a lak Lalhmingmawia ruang hmuh a ni

Aizawl | September 16, 2023: September 12 zana Tuikual Lui lianin a vawk nena a lak Lalhmingmawia (56), Dinthar Veng, Aizawl ruang chu vawiin (16.9.2023) khan hmuh a ni. 

Vawiin chawhma dar 11 vel khan Buichali bul Tlawng Luia R Mala huan kai (Sairang Dintharah) to tih hriat loh ruang hmuh a ni. Lalhmingmawia a nih leh nih loh finfiah turin a chhungte ruang hmuhnaah hian hruai an ni. 

Ruang hi uluk taka enfiah a nih hnuah Lalhmingmawia ruang ngei a ni tih finfiah a ni  tiin Bengvarna.com chuan a tarlang. 

Lalhmingmawia hi ni 12.9.2023 zan inkhawm banah Tuikual Lui lian avanga an kawmthlanga an vawk harsatna tawkte buaipuia a kal chu tuilianin a la a ni. Tuilianin a lak zan atang hian a zawn hna ngawrh taka thawh niin, vawiinah hmuh a ni ta a ni. 

Ruang hi Sairang Dinthar YMA Hall panpui niin, chumi hnuah an vengah lak a ni.

A ruang hawpui lai hian Aizawl Two Wheeler Taxi Association (ATTA) member te'n a hma an hruai a, two wheeler taxi khalhtute an inṭawiawm ṭha hle a ni.