Sakhaw zalenna nei tûrin tuna kan hun tawn mek hi kan siamṭhat a, a siamṭhatu kan nih a ngai

Aizawl | August 21, 2023: MPCC President Lalsawta chuan, "Sakhaw zalenna nei tûrin tuna kan hun tawn mek hi kan siamṭhat a, a siamṭhatu kan nih a ngai," a ti.

He thu hi 'Sakhaw Zalenna leh Ram leilung fate hamthatna humhalh' inkhawm Vanapa Hall-a August 18, 2023 a neih-ah a sawi.

Mizorama Secular Alliance kan thawhho hi kan hnam damna a ni a. India ramah Hindu Lalram buatsaih tumtu BJP leh a thawhpuite hi Kristian anga kan dodal a ngai a. Political Party, Kohhran leh NGO ang pawha kan do a ngai a ni. India ramah leh Mizoramah sakhaw zalenna a awm a ngai a. Chuvangin, MNF Party leh ZPM Party te pawh 'Mizoram Secular Alliance' zawm ve tûrin ka sawm a ni, a ti a. Mizorama Kohhran hrang hrang leh NGO hruaitute pawh ram leh hnam humhalhna kawnga hma kan lakho zelna atan Mizoram Secular Alliance zawm turin ka sawm vek che u a ni.

'The End of India' tih lehkhabu ziaktu Khushwant Singh chuan ti hian a lo sawi a. 'India ram hi pawn lam atangin an rawn ti chhe dawn lo. A chhung atangin, a chhunga chêngte inepna leh intihbuaina avangin a tawp thei a ni,' a lo ti a. Chumi hun a thlen loh nan leh Sakhaw zalenna nei tûrin tuna kan hun tawn mek hi kan siamṭhat a, a siamṭhatu kan nih a ngai a ni.

Pu Lalsawta chuan, India ramah hian Missionary-te an chep takzet tawh a. Thil hlu leh tangkai ram pawn atanga tanpuina pawh an dawng thei tawh lo. He BJP hian Mizote Sihhnipna lai an man em em a, an fing a ni. Mahse, he ramah hian Congress Party, sakhaw zalenna duhtu kan la awm a. Missionary ten thlamuang taka Pathian rawng an bawl leh theihna tûrin lungrual taka 'Thawhhona' (Alliance) a tel hi a hun takzet a, chuvanga thawhona siam kan ni, a ti a. Pu Lalsawta'n tunah hian a sawm lo che u a, Pu Vanlalruata'n a sawm hek lo che u. Pu H. Lalrinmawia pawhin a sawm lo che u a, Ramin a ko che a, a sawm zawk che a ni.

Congress Party hi India ram leh Mizoramah Sakhaw Zalenna kulhpui a ni reng dawn a. Ram mipuite thlamuanpui tham nih zel kan tum bawk a ni. Kan ram, kan hnam, kan sakhaw humhim turin Mizorama Party hrang hrang te, Kohhran leh thlarau mi te, NGO leh Mizoram mipui zawng zawng ka sawm che u ni.

Date: 18th Aug.2023 @ Vanapa Hall