Mizoram hi Anti-BJP kan nih a ngai a. Hei hi kan Ram, kan Hnam, kan Sakhua a himna atan a tul a ni

Aizawl | August 21, 2023: PC Party President Vanlalruata chuan, "Mizoram hi Anti-BJP kan nih a ngai a. Hei hi kan Ram, kan Hnam, kan Sakhua a himna atan a tul a ni," a ti.

He thu hi 'Sakhaw Zalenna leh Ram leilung fate hamthatna humhalh' inkhawm Vanapa Hall-a August 18, 2023 a neih-ah a sawi.

Mizoram hi Anti-BJP kan nih a ngai a. Hei hi kan Ram, kan Hnam, kan Sakhua a himna atan a tul a ni. BJP hian Hindutva kalpui a tum mekah leh UCC (Uniform Civil Code) din an tumnaah hian Mizoram hi min rawn rin lut ve ṭalh suh se. Kristian te'n he thil hi kan duh lo a, kan do tlat dawn a. Do ve duh rih lo Party te pawh Mizoram Secular Alliance a tel ve turin ka sawm nghal bawk a, Kristian kan nih anga lungruala do tûrin ka sawm a ni.

Kan ram sum dinhmun chhiat avanga hrehawm ti thalai an ṭhahnem em em tawh a. Thalaiten thil tak tak an ngaihtuah tan tawh a ni, a ti a. Tun hnaiah kan hnam dinhmun chu Burma, Bangladesh leh Manipur boruakah hian a chiang hle a, kan buai zual zel a nih hi! UCC leh India Danpui atanga ‘sakhaw zalenna’ paih avangin kan buai zual zel thei a. Mizoram hi a tuar theih dinhmuna ding mek kan ni bawk. Forest Conservation (Amendment) Act avangin kan ram kan chân thei a, Assam laka ram zau tak chân thei dunhmunah kan ding mek bawk a ni.

BJP chu sum hmatheha che – MNF pawh sum hmatheh bawk. ZPM lah chu sum hmachhuan tumin an buai (Moral degradation) mek bawk a. He'ng zawng zawng lak atang hian talchhuah theih a ni. Sum dinhmun thalo te hi a siamthat theih bawk a. Mipui hnena chanvo tha zawk pek hi sorkar tha tih tur a ni a. Nang leh kei hi kan pawimawh em em a ni. Tun huna kan awmdan siamtha tura hmala turin Pathianin min duh vang a ni ang, vawiinah pawh Mizoram Secular Alliance a lo pian tiin, kan Pathianin min pui ang a, kan tanrual phawt chuan kan siamtha vek thei ang.

Kristianna hi a tha bik a ni tih kan lantir a ngai a, kan Pathian chawimawi tur te; kan chhehvel hnamte aia ropui zawk kan nih lan tir tur te; Zohnahthlakte inpumkhatna atana kan unaute hipkhawm tur tein Pathianin ram min siamṭhat tir dawn a. Chumi atan chuan Rorelna Dik leh Sorkar Tha - Ram leh Hnam humhalh ngam, thalai leh thang thar zelte chhawr tham, Sorkar ruhrel leh inawpna siamtha ngam, Dan dik taka lekkawh ngam, Langtlang, Eiru (Corrupt) hrem ngam, Mipui nawlpui hamthatna pe thei, Ram hausakna leh hmasawnna ruhrel dinsa hmang tangkai thiam, Hmasawnna ruhrel din thei, Sumdawnna awmze neia kalpui tura theihtawp chhuah tûrin leh Mizoram Secular Alliance thlawp vek turin Mizoram mipuite ka sawm che u a ni.

Date: 18th Aug. 2023 @Vanapa Hall