- David Sailo
19th August 2023
Delhi ah khuan helama kan VIP te hi Term khat chhung an vakvai chiang hle a ni.
HEALTH CARE:
Vaibelchhe sing tel tling ṭhelh teh meuh min bat sak a, "A dam lova piangin nuai 2 an Bill theihna" Assembly House lalpa meuhin chil per chhuaih chhuaiha a sawi chu mumang ram mai a ni. Delhi tlangah "Khawi Bank in nge min puk sak thei ang" tiin kan Health Minister a hmanhlel a, vawiin thlengin Health Care Bill tang chuan min bawh buai a, tun Term ah hian kan in rul seng dawn lo tih a lang reng tawh!! A dam lo apiang tana Nuai 2, SEDP a dah vek kha chu MUMANG ram a chang mek a nih hi. A mangang vek vek te chu mangang tak an ni. Delhi tlangah hei hi kan sawi fel thei lo phawt.
RAN HRI LENG:
Vawk pûl hri a leng tak tak a, thingtlang deuh zawkah vawk 50 chuang sûn an awm fur a, Aizawl dai Lengte rama Vawk Farm ah mimal vawk 700 chuang chân an awm bawk a, an tan vanpui a chim a, ṭah leh ha ṭhialna hmunah an leng a ni.
Central ah Delhi dawrin kan chhuk zur zut a, chengkhat pawh Insurance la thei an awm lo. An Delhi dawr haw lam chu an in sawi Bawra ṭhin khawp a, a tak ramah erawh NIL a ni ringawt mai. Kum 2 dawn an ṭap tawh a, kut hnathawkte beidawnna khua hi kan ti sei lua a ni!!
An kel semte chuan Mizoram kel awmsa chu hri chhe tak hmangin a ei zo zawmah a nih kha!!
RALTLAN CHUNGCHANGAH:
Bangladesh aṭangin, Myanmar aṭangin, Manipur aṭangin kan dawngsawng mawlh mawlh a, Central chuan Naia SEN pawh min pe duh lo. Kan chhuk thla fo a, hawn kan nei thei lo.
SASCI sum puk te, Smart City Project kan hman dik loh zia te hi min hmu kur a, Kristian Politician, Politician Kristian ni lo ten duh duh a kan ram kan sawngbawlna hian ringlo mi, Politics lama Fair tak tak te thinlai mu hnu a kaitho zo lova, Delhi aṭangin hawn mumal, Sanction uanpui tham hawn map lovin kan Minister te khup zawi leh ban uaithla hnupin an rawn haw hlawl hlawl fo a nih hi!!
DELHI SENSO:
Heng Issue avanga Minister leh Official zinchhuakte senso, mipui pawisa hi uiawm tham a tling tawh a, Samagra ten thla 3 hlawh an lak theih loh hnu a Official ten an hlawh tur buaipuia Delhi a la zin chhur chhur thawm hriat phei hi chuan bei an ti dawng ngawih ngawih!!
An chhukthla ve sek a, sum sengin, hlawhtlinna, Sanction liantham hmuh tur an rawn hawn ngai lova, kan State harsatna liantham su eng hawk turin engmah sawi chhuah an nei meuh lo. Lengpuiah ropui takin parṭhi nen kan lo hmuak a, Manipur lam buaipui zawk, Mizoram tana bengchhenna hlawhtling sawitur awm si lo MP thlengin kan kawl kumtluan dawn a nih hi!!
ISSUE A ZIRIN:
"Issue a zirin NDA kan thlawpin kan thlawp lo" te kan ti vel ta mai mai a!! Manipur thil thlengah Mizo hnuk (Sentiment) a khawih tih hre ranin BJP hnualsuat ang lek lekin kan lang vel a. Kan thutna chu TREASURY BENCH (BJP leh a thawhpuite ṭhutna) a ni reng si. Issue Base a thlawptu chuan NDA emaw NEDA emaw hi a changin a thlawp anga, achangin a thlawp lo ang. Parliament ah pawh a ṭhutna a thlak fo ang tihna tluk a ni. Mahse kan Lok Sabha MP chuan Treasury Bench (Ruling BJP) thlawptu ṭhutna aṭangin a Seat vawikhat pawh a la chhuahsan lo!!
A LAN DANAH:
BJP leh a thawhpui intelkhawm (NDA) hian MNF hi eng ualah an ngai tawh lo tih a lang reng a, Delhi tlanga khumbeu leh Tawlhloh Puan vai tan phalrai viau mahse, Mizoramah BJP Support tu nih an zak leh si a, Central lam Politician te hi mawl tak, bum theih, duh duh sawi hnan ngamah an hmu a, an ti sual!! An rêp châr mek a nih hi mawle!!
Central Sorkar thawhpui thiam thiam, kan ram hmasawnna tura ke chhep thiam thiam thiam hian intodelh miah lo Mizoram hi rilru nei takin Intodelhin an siam thei zawk ang. Central ah BJP an Sorkar emaw, Congress leh a thurualpui an Sorkar emaw pawh nise, Central thawhpui lovin kan State, kum 30 liam tawh, Politics hri chhia in kan Politician te a man laklawh tawhna, chuti chunga SEM POLICY tawktarh ngam Party la awm rengna hian awmzia hi kan nei lul lova, thawhpui thiam chiah hi kan tih theih tawk a ni!!
TLIPNA:
Delhi tlanga liamthla fo kan Minister te hian eng hlawhtlinna nge an rawn hawn tih hi chîk a hun tawh a, CM liamthla meuh pawhin "Tun ṭumah chuan eng Sanction mah ka rawn hawn lo" a tih tawl tawh chinah chuan Minister, Mizo mipui sum hmanga liamthla zut te hian kan mu tân berah eng ual an sawi chhuak thei lo tih hi kan ram sum dimhmun enin a chiang a ni lawm ni?!! NDA viau, khulama intih NEDA viau ai chuan OMB (Open Market Borrowing) hmanga sum puk hi kan State tih theih tawk a ni rih e.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: