(A chungtunu -Sangsangi piancham pualin.)
"In thil neih ah in lungawi loh chuan thikna leh awhna sualin a rawn bei vat dawn che u a ni...Hausakna hi sum hmanga in teh dawn anih chuan, he khawvelah nangni aia hausa an tam lutuk, thinlunga in teh erawh chuan khawvelah pa hausa ber in ni dawn a ni..."
Tunhnaiah Mizo film ṭha tak tak a chhuak nual mai a. Hun ka neih loh em avangin ka en ve mumal hman meuh ṭhin lo. Mahse, hei, tun ṭum hian "Pa Hausa - ka aim in life" tih film chu a bul aṭanga a tawp thlengin uluk takin ka en chhuak ve tlat mai. Duhthusam lo leh sawisel hlek hlek tur nei ve khanglang mah ila, chu lam chu ka sawi lang lovang.
Problem play tha zet chhungah thesis play leh propaganda play mawi chungchuang lutuk mai kan hmu thei a, a va han lawmawm em!
A thawnthu ziaktu fakin awm se:
Lemchana pawimawh em em mai chu a thawnthu ruangam hi a ni. He lemchan thawnthu ziaktu hian zan khat thil thu lekah a ziak fel mai lovang tih a chiang hle. A tir lamah a hlimawm lam hmuh tur a chhawp hmasa a, harsatna/buaina neuh neuhin a chhunzawm zui a, chu an buaina chuan lemchan thawnthu a tawp mai dawn emaw tih hnuah mawi leh nalh zetin he lemchan thawnthu hi a her tawp thiam a ni. A va hmuhnawm em!
A technical lam thil zawng zawng pawh a fuh vel vek a, heti lam buaipuitute pawhin fak an phu hle mai. He lam chu sawi thui lo teh ang. A changtupa lema chang Papuia hi chu Mizo film industry lamah a mikhual lo hle a; chutih laiin, a changtunu lema chang Sangsangi hi Mizo film-ah a hmel ka vawi khat hmuhna a ni a, a la naupan hmel tehlul nen film chan erawh a thiam chiang kher mai. Film dangah kan hmuh chhunzawm zel i beisei ang.
A film thawnthu chu le.
A kimchang veka kan tarlan chuan a la en ve lote'n an hre thui ve lutuk dawn a, a tlangpui zawr zawr aw..
Thingtlang pa pathum - Chhinga (Ani hi nupui fanau nei lai), Thawma leh Hunga te chu retheihna lak ata pa hausa nih ngei tumin, thingtlang aṭangin Aizawlah sumdawng turin an kal a, khawpui daifema in hlui tawh tak luahin awmhmun an khuar a ni. An sumdawnna - kawnghren zawrh chu an buaipui nghal char char.
An in luah chu a hrâng pek a, engnge maw chen chu an buai phah zek asin. Mahse, retheihna avangin chutiang thil pawh chu an pal thiam a ṭul tlat. An in luah neitu nu thi tawh leh an in luah chuan inzawmna riau a nei a, chumi hre tur chuan lemchan tawp lam thlengin en a ngai tlat mai.
An ṭhian zinga mi Hunga hian ṭhian pakhat a chhar a (Ti tawh mai ang)- chu chu Tetei a ni. Tetei hi a hmel en mai pawhin mi hausa fanu tih a hriat a, college kal lai ni bawk, mihring kum lamah lah la naupang tak tih a hriat bawk. Mak tak maiin, ani hian thingtlang pa pathum, hmel ro bim bem leh sum nei tehchiam lote hi a kawm ngeih zui phian a, an zingah an zawlpui anga hlim taka khawsak ve zel chu a lungkham hle tih a hriat.
Thingtlang mi pathum te zinga awm nuam ti a, hlim ve tak; he khawpui tleirawl nalh leh chhungkaw ṭha tak hnuaia sei lian hian, a rukin harsatna namen lo a tawk reng chu lo niin, vawi leh khata buai leh mualpho hle thei tur dinhmunah a lo ding reng mai a lo ni. Chu a harsatna ngei chu a hmakhua ngai em emtu - Hunga chuan a tihbosak hlauh mai, helaia lemcham thawnthu kal kual vel dan hi a mawi hle.
An in luah (A hrang kan tih kha) neitupa chuan, a in chu an luah zel duh anih chuan a huanah lei lai turin a ti a, chutia a sawi lai chuan thuruk ni deuh si, an lei laih tur nena inzawm, han ngaihruat theih deuh tur thil a sawi Iang zeuh pek a. Thil dang thlan tur nei hek lo, in neitupa huanah lei an lai tlauh tlauh ta mai.
Chutia huana lei an laihnaah chuan thil hlu ṭha leh tam tham tak an lai chhuak ta nge nge. An buai chho tan ta. An zinga roreltu ber leh puitling ber tura ngaih Chhinga ber chu, chu an thil hlu laih chhuah chuan a tibuai ta ber emaw tih tur a ni. An in luah neitupa bak lekin a buai bawk, anni ṭhian pathum an buai bawk; an ṭhiannu - tleirawl duhawm tak Tetei a buaina zawnah a buai ve tulh tulh bawk, an va buai tlang tak. Lemchan thawnthu a hmuhnawm tulh tulh thung.
An thil laih chhuah leh an in neitu nu ber bakah an in hrâng te chuan inzawm kualna an nei pek a; kan sawi lan vek chuan a la en ve lote'n an hre palh ang.
Tunhma Savdhan India kan en ṭhin lai a, buaina bulpui awm ngei ni si, a buaina bul tak hriat nghal mai si loh, chumi hriat chhuah tuma an beih lai hmuhnawm leh rilru pe taka en loh theih loha lemchan thawnthu a kal vel ang kha a ni ber e.
A lemchan thupui tifiahtu ber chu - Chhinga'n a hnuaia thawk tlangval pahnihte a zilhna thu hi a ni a, a mawiin a ril hle a ni.
Buaina hmangin an tawp dawn emaw tih hnuah hlimawm chiang lutuk takin lemchan thawnthu a tawp leh ang lawi si a ni.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: