Aizawl | May 3, 2023: Ni hnih chhung awh tur Dengue natna chungchang inzirtirna chu vawiin May ni 3, 2023 hian Chanmari YMA Hall, Aizawl-ah tan a ni.
Data-a tarlan danin, 2019 atanga kumin paril 27 thleng khan Mizoram-ah Dengue Positive 2292 an awm tawh a, heng zinga 5 hian nunna an chan tawh!
.jpeg)
Nunna chante hi nikum chhunga thi vek an ni a, nikum khan Mizoram-ah dengue Positive 1868 an awm!
Dengue Positive 2292 zinga 1868 hi nikuma vei niin, a bak hi 2019-ah 131, 2020-ah 67, 2021-ah 83 an ni a, kuminah 143 an tling tawh bawk!
Vawiina bul tan Dengue natna chungchang inzirtir hun hi State Vector Borne Disease Control Programme (SVBDCP) buatsaih niin Aizawl Municipal Corporation (AMC) hnuaia Local Council, MHIP leh MUP te nen hun hmanho a ni a. Mizorama Dengue natna hluar zel tur laka inven nan leh Dengue awm lo tura hma lak dan te inzirtir hona hun atan hman a ni.
He hunah hian Dr. Vanlalsawma, Director of Health Services chuan kalkhawm te lawmna thu sawiin, Mizoram a Dengue natna pun chhoh zel dante a tarlan bakah Dengue laka inveng tura khawtlang, kohhran leh pawl hrang hrang te nena thawhho that a tulzia a sawi a. “Natna do hi Health Department hna a ni a, natna tuartu erawh chu mipui te kan ni, chuvangin natna do kawngah kan tan rual a, kan thawhho a tul hle a ni," a ti.
Dr Chawngthanchhunga, State Prog Officer pawhin chipchiar zawkin Dengue natna in Mizoram a nghawng dan sawiin hun a hmang bawk.
Programme thawktuten Dengue natna nihphung te, natna enkawl dan te bakah Dengue vei lo tura invendan kawng hrang hrang te zirtirna hun an hman bakah, Local Council, YMA, MHIP, MUP leh kohhran te nena hmalak ho dan tur sawihona hun neiin, hlawkthlak takin he hun hi an hmang a ni.
Dengue hi India ram hmun hrang hrangah a hluar hle a, hetih rual hian Mizoramah pawh kum tin he natna vei zat hi pung chho zelin, nunna chan hial kan nei ta a ni. Kum 2021 ah Dengue vei hmuhchhuah zat 83 niin, kum 2022 ah Dengue vei zat hi pung chho in, mi 1868 vei hmuhchhuah a ni a, vanduaithlak takin mi 5 laiin nunna an chan a ni. Kum 2023 Jan atanga April 27 thleng khan Dengue vei hmuhchhuah mi 143 an awm tawh bawk. India ram pumah kum 2022 Jan – Oct thla chhungin Dengue vei mi 110473 (nuaih khat sing khat zali sawmsarih leh pathum) awmin, mi 86 in nunna an chan a ni.
INDIA RAM PUM:
KUM POSITIVE ZAT NUNNA CHAN ZAT
2019 157315 166
2020 39419 56
2021 193245 346
2022 (Jan – Oct) 110437 86
MIZORAM: Year Wise
KUM SAMPLE LAK ZAT POSITIVE ZAT NUNNA CHAN ZAT
2019 853 131 -
2020 623 67 -
2021 420 83 -
2022 5252 1868 5
2023 (Jan-27th April) 1247 143 -
Mizoram ah Dengue natna hi Malaria tlukin mi tam takin kan la hmelhriat loh natna a ni a. Khawvel lo changkang chho zel ina a ken tel, mipui zin veivak pung leh ram leh ram intlawhpawhna tha te avang hian Mizoram ah ngei pawh Dengue natna vei kan pung chho ve zel ni. Khawvel hmun hrang hrang ah Dengue hi natna hluar chak ber te zinga mi niin Mizoramah pawh tunhnaiah Dengue natna vei an pung chho mek a, Aizawl District ah leh Lunglei District ah a hluar bik a ni. Natna pung chak tak anih avang hian inven kawngah tan kan lak reng loh chuan Malaria natna tluk zet a buaipui awm a nih mai a hlauhawm hle a ni. He natna vei zat pun chhohna atanga teh in kumin 2023 ah pawh hei aia nasa zawkin he natna hi pung chho zel thei anih avangin khawtlang, kohhran leh pawl hrang hrang te tangkawp a, tun aia nasa leh zuala he natna tibo tura tan lak a tul hle.
He Awareness meeting hi naktuk May ni 4, 2023 hian neih chhunzawm leh a ni.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: