Aizawl | May 3, 2023: Manipur Hill district hrang hranga tribal hnam hrang hrang te chuan vawiin khan All tribal Students Union, Manipur (ATSUM) buatsaihin, Meitei hovin ST dinhhmun an dil leh pek tur duh lohna lantirnan 'Tribal Solidarity March' hming chawiin kawng an zawh.
Boruak muanawm leh remna nena kawng zawh chu intibuaina, intualcuakna leh kangmei chhuahnaah tlai lam khan a chang ta ani.
Zanin dar 10 thleng khan hliam eng emaw zat an awm tawh niin thu dawn a ni a, a zat chiah hi hriat mai theih a ni rih lo. Nunna chan awm tawh anga thu thang erawh thu chiang hriat theih a la ni lo.
In bakah biak in hrang hrang beih a ni a, hal leh lung den/vawm a ni nasa hle.
Churachandpur phairuama Zohnathlak te a tuartu an ni a, Zohnahthlak hnam hrang hrangte chenna khua-ah Meitei nia hriat ten buaina tichhuakin kut an thlak a, in tam tak an hal tawh niin thu dawn a ni.
Vawiin-a Peace rally an neih chhan hi Manipur sawrkarin an ram tam zawk reserve forest, Wildlife sanctuaries, Wetland leh a dang dang hmangin lak a tum a, tin, Meitei ho ST (schedule tribe) nih theihna tur lehkha Manipur High Court-in a lo recommend an duh loh vang niin taerlan a ni.
Chutia rally an neih lai chuan Meitei thenkhat kalin Tollen khua thlen hmaa Anglo Kuki War Centenary Gate chu an hal a, chuta tang chuan buaina duhawm lo zet hi a rawn chhuak ta niin thudawnna chuan a tarlang bawk.
Anmahni lam hian silai te hmang in tribal ho hi an bei a, Kangvai khua Zohnahthlak zinga hnam Vaiphei khua chu luhchilhin an in te an hal sak a, Imphal a tribal ho a bikin Zohnahthlakte awmna veng leh khua an bei bawk.
An motor te halsakin an veng an suasam a, mi kut tuara hliam zat hi hriat theih an la ni lo.
Manipur Home Commissioner chuan, thu dik lo, huatna thu leh video leh thlalak te thehdarhna laka inven nan leh buaina a chhuah zel loh nan vawiin tlai atang khan Manipur-ah Mobile Internet tihtawpna thu a chhuah a, he thuchhuah hian ni 5 chhung a awh dawn a ni.
Imphal-ah pawh Zohnahthlak te'n hnam dang kut an tuar nia hriat a ni. Meitei lam hian Naga leh Zohnahthlak hi an hriat hran loh a kut an thlak tel chuan, buaina nasa zawk thelg thei reng niin thudawnna chuan a tarlang a. Naga leh Zohnahthlakte an inkawp vaih chuan Meitei ho awmna biala chak lakna an dang vek thei niin thudawnna chuan a tarlang bawk.
Manipur state chhunga Zohnahthlak hnamte leh Tribal te chuan mahni hmun țheuhah ram leh hnam chhan nan kawng an zawh.
Buaina kaikuang!
Manipur BJP sawrkar Biren Singh kaihhruai chuan Manipur tlang ram Zohnahthlakte chenna hi zau takin Reserved Forest/Protected Area-ah rin lut turin survey neih an tum a, hma an la mek bawk. Hei hi an hlawhtlin chuan Zofate chenna hmun tam tak hi Reserved Area a ni ang a, mihring chên reng a rem dawn lo tihna a ni a. Thiam taka Zofate um chhuah an tumna a ni tih hi hai rual a ni lo.
Tin, Meitei hnam hian Tribal nihna hi India dan hnuaiah neih leh tumin hma an la mek a, Tribal (ST) te tana hamțhatna ang hi an chang ve thei lo hi an ngaimawh hle a, hei vang hian Zofate chu hnawksak an ti hle a ni.
Hetianga Manipur sawrkar leh Meitei te hmalakna hi dodalin Manipura Tribal te chuan țan an khawh ve ta a ni. Tribal ten Meitei-te dodala kawng an zawh tur hi Meitei lamin an helh hle a, nimin Imphal leh Churachandpur inkara Moirang khuaah nasa takin Meitei hoten kawng an zawh ve bawk a, Tribal ten Meitei dodalna kawng zawh an huaihawt hi kan duh lo tiin Meitei lamten kawng an lo zawh ve bawk a. Imphal - Churachandpur inkarah Tlangmi tan fimkhur a țul hle niin tarlan a ni.
Tharum thawhna thleng ta mai hi a pawi tak zet. A tu lam lam tan pawh boruak muanawm hnuaiah an awm thei lova, a pawi tak zet a ni.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: