3rd May 2023
Zu do ber, haw ber State a langah chuan vengkhat NGO lian berin Sunday leh chhiatni ah zu hralhchhuah loh tur tiin thu an chhuah a, Sunday leh mitthi an neih loh ṭum chuan duh tawkin ZU hralh phal a ni tihna tluk a ni a, chu chu YMA thuchhuah a ni!!
ZU KAN DUH :
A huho angin, Kohhran leh tlawmngai pawl ang hi chuan kan do khawp a, kan ten!! Mahse a tak ramah chuan mo lawmna ah, lunphunah, ṭhian ho Picnic ah, YMA Social ah, Party thil tih punkhawm, ruaiṭheh ah, ṭhian ho chaw eikhawmah chuan Zu tel lovin kan ti hlei thei hlawm lova, tlawmngaia khawtlang tana zu do a thawkchhuak ṭhin JAC hruaitute zingah harhfim, felfaia zu in hreh lo an awm a, Branch YMA hruaitu zu manto kawl reng an awm bawk. Bawlhhlawh paih Motor khalhtu ṭhenkhatte chuan hausa in aṭangin zu manto Bottle ruak paih tur an neih reng thu an sawi fo bawk.
Zirtawp tlai a ni a, Rangvamual kawng chu Traffic a Jam lo chauh a, rawksai ipte ak chungin ke hnih nei hmangin an de thla in an de chho thluah thluah a, thil dang ti an ni lo. ZU lei kal lam haw lam a ni. Police Uniform leh Traffic Police Uniform ha thlengin kan kim vek an ti!!
Hei hian a lantir chu ZU KHAP BURNA State ah hian Zu a zalen em em a, khap bur tak tak tumin Excise Force tih len a ni chuang lo. "Halleluiah a hmingin" tih ang velin kan do taih taih mek a nih ber hi.
KHAP HRINCHHUAH :
Rangvamual zu chhiat zia chu Excise Department meuhin an vawrh darh a, a chhe tak a niang. A inmi ho ka kawmkualnaa ka hmuhchhuah ka tarlang tawh. Sam tla nasa, chaw ei tuilo, hmel/vun thim, Nerve ṭha lo, kawṭhalo reng mai, hlauhthawnna rilru neih phahna thlengin an neih phahin an sawi.
Mahse Zu duh, duh loh tak anga lang kan nih avangin an tlân lo thei chuang lova, kum naupang tetein kan in chân mek a nih hi.
SORKAR LEH PARTY :
Te hian inthlan kum a ni tawh a, zu chungchanga an Policy hi puang ngam tawh se a lawmawm ngawt ang. Tun hnaia Party hrang hrang kawmkualnaah khan PC leh AAP Party te chuan zawrh an duh thu huai takin an sawi a, Congress leh MNF in huai takin zawrh an duh loh thu an sawi thung. ZPM leh BJP chuan uluk taka zirchiana thutlukna siamna chi ah an ngai thung.
Dik takin Kohhran leh NGO awm rûn lo se kan Political Party te zingah hian khap beh tlat duh an awmin a rinawm loh!! Vote duh vanga a ṭha ber, Zoram tan ti ngam lovin a dawttu hmangin khuahkhirh si lovin Zu Quality chhe lutukin kan ṭhalai kan hrai hlum mek a tih theih ang.
ZIRCHIAN A HUN TAWH LO :
Zu kan zuar tawh a, kan khap tawh bawk a, kha chen zirchiang duh tan hun tam a liam tawh hnu a "Kan zirchiang phawt ang" tih hi chu thatchhe mawngrit zia, Vote chân hlau laklawh, Principle lantir ngamlote dinhmun a ni tawh.
Zirchianna hun tam a liam tawh a, kan ṭhalai ten zu chhe fahran an tlân a, a hausa ten ualau takin zu manto an lei thei reng bawk si. Party thiltihah kan leklam hreh chuang lova, inthlanna ah kan sem dur dur duh tho bawk si. Kan hun tawn tawh aṭang khan zawrh tur nge zawrh loh tur tih hi Party tin tan zirchian chhek chhek tum mek lova thutlukna mumal neih hun a ni tawh.
TLIPNA :
Pharisai taka lan a hun tawh lova, kan nihna dik tak, zu duh tamna State kan ni tih pawm a ngai a, lem taka zu chhia ti pung tawk leka han do buangbar vel hi tu hian nge hlawkna têl chuang le!! Chakma Zu Check anga zu man lo hian a Quality a ṭha em tih hmanga Check hian kan mi leh sa kan hum rei thei zawk lo maw.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: