Aizawl | May 8, 2023: Tunhnaia Manipura buaina chhuak avanga Mizoram mi leh sa tangkhang, Mizoram sawrkar hmalakna a hruai haw mi 52 ten vawiin chhun dar 12 :00 khan tluang takin Lengpui airport an rawn thleng a. Lengpui airport-ah hian Mizoram sawrkar aiawhin Social Welfare & Tribal Affairs minister Pu Lalrinawma hoin lo hmuah a ni.
Lengpui Airport-ah tangkhang lo haw te puala inkhawm buatsaih a ni a. He inkhawmah hian Pu Lalrinawma chuan Manipur-a chi leh chi inkarah buaina chhuak hian Mizoram mipuite a barakhaihin an rilru a tina hle a, buaina chhuah tantirh khan sawrkarin theihtawp chhuahin hma a la nghal a, Mizoram sawrkar chuan Mizoram mi leh sa Manipur a awmte lakchhuah dan tur nasa takin a ngaihven nghal a ni, a ti.
Minister chuan Home Department hotuten theihtawp chhuahin office chawlh pawh nei lovin Mizoram mi leh sa te rawn haw theihna turin tan an la tih sawiin tangkhang rawn haw duh in report mi 196 te thlawhtheihna ticket laksak an ni a. Nimin zing lam dar 1: 40 khan Imphal chhuahsanin tluang takin zirlai 50 chu thlawhna hmangin Guwahati hruai thlen an ni a, Guwahati a Deputy Resident Commissioner in a tul ang angte a lo buaipui a, heng mi 50 te hi Guwahati Mizoram House ah an chawlh hahdam hnuin Pathianni vek, tlai dar 5 khan zirlai 25 te chu Mizoram lam panin bus in an rawn chhuak leh a, Zirlai 25 dangte chu kawng dangin Mizoram an rawn pan ve leh a ni, a ti.
Tangkhang rawn haw te aiawhin AMSU President Immanuel Lalngaihmanawma, , RIMS a MBBS Final Year zirlai chuan thu a sawi a, Mizoram sawrkarin a ngaihvennaah leh a buaipui danah thinlung taka an lawm tih a sawi a. Social media thenkhatah Mizoram sawrkar che muang leh hma la tha tawk lo anga demna awm chu a dik lo tih sawiin pawi an ti tak zet tih a sawi a.
RIMS zirlaite zingah phei chuan state dang zirlaite nen an chhuak rual reng a, Mizoram sawrkarin chak taka hma a laksaknaah lawmawm an tih thu a sawi a ni.
Vawiina Mizoram rawn thleng te hi RIMS a zirlai mi 37 leh chhan hrang hrang vanga Imphal-a tangkhang mi 15 an ni a. Nimin tlaia Guwahati atanga bus hmanga rawn haw mi 25 te pawhin Aizawl tluang takin an rawn thleng tawh bawk a ni.
Sawrkarin ruahmanna a siam dan chuan vawiin hian Indigo, Air Asia leh Air India thlawhna hmangin mi 37 te Imphal chhuahsan in Guwahati an pan leh ang a, naktuk thawhlehni hian Indigo, Air Asia leh Air India thlawhna hmangin mi 28 te Imphal chhuahsan in Guwahati an pan leh bawk ang.
Manipur mi leh sa, an himna zawnga Manipur chhuahsan a lirthei hmanga Mizoram a rawn tlante chu Sawrkar chuan theihtawp chhuaha lo dawngsawng turin DC te hnenah hriattirna a chhuah tawh bawk a ni.
- AIR Aizawl
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: