Kolasib districtah Manipur raltlan 750 chuang chhinchhiah tawh

Aizawl | May 8, 2023: Kolasib district chhungah Manipur buai avanga raltlan mi 750 chuang chhinchhiah an ni tawh. 

Kolasib Bawrhsap Pu John LT Sanga hova DRDO Conference Hall-a Manipur atanga raltlan te dawnsawn dan tur leh chhawmdawlna pek chhunzawm dan tur rela an thutkhawmnaah raltlan zat hi tarlan a ni a. He hunah hian Kolasib District chhunga Manipur atanga raltlante dinhmun ngaihthlak niin Saipum, Saiphai, Pangbalkawn, Phainuam, Vairengte leh Rengtekawnahte hian raltlan hi an thahnem zual a. Raltlan mi 750 chuang chhinchhiah tawh niin an lo la luh belh mek zel bawk a ni.

Raltlan zingah chhungte leh hmelhriat belh tur nei an awm laiin, Community Hall-a riah tir chhawngkaw thahnem tak an awm thu tarlan a ni a, khaw thenkhatah chuan Relief Camp sak tum an awm mek thu thutkhawmah hian sawi a ni a. Raltlan te eitur leh mamawh hrang hrang ruahman sak chu a rang lam a ngaihtuah a tul thu thutkhawmnaah hian sawi niin hemi kawnga hma la tur hian President, Village Council kaihhruaina hnuaiah ‘Village Level Refugee Relief Committee’ din lailawk ni se tih rel a ni a, Branch YMA President chu Vice Chairman a ni dawn a ni.

Kolasib District khaw hrang hranga Manipur atanga raltlan te mamawh zualpui phuhruk nan Sub Headquarters, Kolasib kaltlangin khaw tinah vehbur khawn tum a nih thu he hunah hian tarlan a ni a, hetih rual hian Pawl leh mimal inphal, raltlan te tan a tanpuina pe duh tan DC Office kaltlang a pek dan tur ruahman ni se tih a ni bawk.

Tukin khan Manipur buaina avanga Mizoram mi leh sa, Guwahati atanga Aizawl lam pan mi 34-te DC Circuit House, Kolasib-ah Minister Pu K.Lalrinliana leh Kolasib DC Pu John LT Sanga te chuan tukthuan an lo buatsaih sak bawk a ni.

- AIR Aizawl

Share it with your friends!

 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ