HSLC | Sikul 107-a zirlaite an pass vek, zirlai fail vekna sikul 14 awm!; keini aia Exam tan hma zawk te aiin result kan peih hma leh thei a, a lawmawm hle - MBSE Chairman

HSLC exam 2023 hmachhawn mipa aiin hmeichhia 1184-in an tam zawk!

Aizawl | May 11, 2023: Mizoram Board of School Education (MBSE) chuan vawiin chhun dar 12 khan High School Leaving Certificate (HSLC) Examination 2023 result a tichhuak a, Zirlai 71.14% an pass.

Vawiina HSLC result tihchhuah-ah hian Cynthia Lalhlupuii Shangpliang, D/o Kyrshanbor Shangpliang, St Paul's Higher Secondary School chu 500 ah 485 hmuin topper a ni a, English, Maths, Science, Ss, Mizo leh IIT ah te letter a hmu.

MBSE Chairman JH Zoremthanga chuan, "Kum 2023 HSLC result chu Pathian hruaina avang liau liau in kan tichhuak leh thei ta a, a lawmawm takzet a ni." a ti a, "Mizoram sawrkar leh Education Minister-in zirna an ngaihpawimawh avangin state dangte leh keini aia Exam tan hma zawk CBSE leh ICSE (Indian Certificate of Secondary Education) te aiin result kan peih hma leh thei a, a lawmawm hle a ni." a ti bawk.

MBSE Chairman chuan, "Kuminah hian compartment 63, an awm a, heng naupangte hian admission an tlai lohna turin compartment exam hi buatsaih thuai kan tum a, chuvangin HSLC result complaint hun ni 15 kan hawn thin chu ni 7 chauh kan hawng leh dawn a ni." a ti.

JH Zoremthanga chuan, "Zawhnate hi LOTS atangin 60% siam a ni a, a bak 40% hi Application leh HOTS atanga siam a ni bawk. Zima in hma a sawnzel theih nan HOTS question hi telh tam deuh deuh tura ruahman a ni," a ti bawk.

Mizo Zirlai Pawl (MZP) Geneal Headquarters, Aizawl chuan thuchhuah siamin, MBSE-in HSLC 2023 result felfai tak, a tichhuak thei chu lawmawm an tih thu sawiin, MBSE thawktute thawhrimna leh inpeknaah lawmthu an sawi.

MZP chuan, ram leilungfa top ten-ah mi sawmpali (14) an lang chu lawmawm an tih thu sawiin, HSLC Top-10 a Mizo tlingte hi an chhuan zia leh duhsakna lantir nan,  May 17, 2023 hian Vanapa Hall-ah anmahni chawimawina hun buatsaih an tum a ni.

HSLC 2023 result i lo thlir ang:

HSLC 2023-ah hian Exam Centre 124-ah exam a ni a, School 697 atangin zirlai (Candidate) 18708 an inziaklut a, exam ta lo 606 awmin,  exam zat hi zirlai 18,102  an ni.

HSLC 2023 exam hmachhawn Zirlai 18,102 atang hian zirlai 12878  an pass a, Pass Percentage hi 71.14% a ni. Heng zing atang hian Distinction-a pass hi 1,302 niin, First-ah 3488, Second-ah 4731 leh Third-ah 3357 te an pass a ni.

A pumpui thuah mipa aiin hmeichhia 1184-in an tam zawk a. Pass zat pawh hmeichhia 710 in an tam zawk.

Management wise-ah chuan Deficit School-in an titha ber a, 92.18 % an pass a. Purely Private candidates pass percentage a hniam ber thung a, 33.95 % a ni. 

Subject malah chuan Science-ah fail an tam ber a, 4449 an fail a, Mizo/Language subject-ah fail an tiem ber thung a, 751 an fail.

District malah chuan Aizawl District pass percentage a sang ber a, 82.96 % a ni.

Ram puma pakhatna hian mark 485 a hmu a, nikum aiin mark 1-in a hmu sang 

Sikul-ah hian Candidate zawng zawng pass school hi 107 an awm a, Candidate zawng zawng Fail vek school hi 14 an awm bawk.

Chairman Press Statement Kimchang:

https://www.exploremizoram.com/2023/05/hslc-2023-result-chungchanga-mbse.html

Share it with your friends!

 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ