Zawlkhawpui senmei chan ni

byAdmin — 0
- Dr Vanlalremruata Tonson


March 5, 1966 khan chunglam aṭangin Aizawl beih a ni a, beih lêt ngaihna awm miah lo a ni. Chu ni chu ‘Zawlkhawpui senmei chan ni’ tia sawi a ni ṭhin. Aizawl bomb ni tih pawh a ni bawk. He thil thleng chungchangah hian ngaihdan a inang lo fo a, khati taka Aizawl khawpui leh a chhunga chengte han beih tak mai demtu an awm laiin âwm ti ngawih ngawihtu leh phu ve renga ngai an awm bawk.

‘Kan do a, kan cho a, min ti let a ni mai,’ te an ti ve tlat a ni a. Sairawkherhin mi va perh ila, AK 47-in min kap let ta ang se, a âwm nge âwm lo a inhnial theih viau ang. Dem leh dem loh emaw phu leh phu loh emaw chu inhnialna tawp thei lo tur a ni ang. Ṭan lam, rilrua âwn lam nei kan ni a, kan inhnial nasat poh leh kan ṭanna tinghettu tur kan dap mai dawn a ni. Aizawl khawpui thil tawn kha a rapthlak a ni te han ti dawn ila rapthlak kan tih chin pawh a inang lo leh nuai ang chu.

Mahse, hei hi chu a sawi ngam âwm e. Aizawl khawpui hi khawvel pumpuia Zofate zawng zawng beiseina meichher (symbol of hope) neitu a ni. Chumi sawp a han ni hi chu lainat a awm ngawih ngawih.

London-ah zu kal ila a tam ber chuan English hlir emaw kan hmuh kan ti ang. A chhan chu United Kingdom khu kan hre chiang lo tlat a, a hre chiangtute erawh chuan English, Welsh, Irish leh Scottish te an hmuh a rinawm. Aizawl khawpuiah pawh mi tam ber chuan Mizo an hmu ang. Mahse, Zofa, Zohnahthlak, Mizo hre chiangtute erawh chuan Zofa/Zohnahthlak/Mizo hnam peng hrang hrang an hmu ang a. Thil sawi fiah har deuh, hnam chanchin tuipuitu tana hmuh nawm leh ngaihnawm tak a ni si ang. Chumi hmutu leh hrethiamtute chauhin Aizawl khawpui ropuina, hlutna leh beiseina meichher kengtu a nihna an hmu theiin a rinawm. Aizawl khawpuiah chuan Mizo i hmu ang, uluk taka i en chuan a chhunga ze hrang hrang inchawih mawi em em mai hi i hmu thei bawk ang. Chutiang i hmuh tawh chuan Zofa emaw Zohnahthlak emaw tih hman i duh a ni hial thei, mahse, i thlêk nawn leh chuan Mizo chauh hmuin i inhre leh tlat si ang. I ngaihtuah ang a, Mizo han tih ngawt chu a dik em tiin i ngaihtuahna a insual ang a, thutlukna chu i ta liau liau a ni ang. Kil hrang hrang leh hmun hrang hrang aṭanga beiseina nena kalkhawmte an inlungrual em vang chauh a ni.

International politics inlet vel avangin Sap kan tihin Zofate min awp a; an tâna remchang leh senso tlem tur ngaihtuah ranin ṭhuthmun hrang hrang aṭangin min awp nghe nghe. Chung an ṭhuthmun te zingah hian Aizawl chu he khawvela damkhawchhuak tura Zofaten an pan nasat ber ṭhin a ni awm e. Vansang aṭanga bomb hmanga beih a nih hma pawhin chhak leh thlang, chhim leh hmar aṭangin sumdawngin an pan a; khawsaknaa inbenbel tumin an pan bawk a, sorkar hnuaia inhlawhna zawngin an pan bawk kha a ni. Tuna Aizawla khawpui neitu bera ngaihte hi an chhungkaw chanchin te, Aizawl khawpuia hmun leh mual hming hrang hrangte hi chhui ila beiseina neia miten an pan ṭhin, an tlawh ṭhin a ni tih kan hre thei ang. Paite hian Mizo an er emaw i ti a nih chuan Aizawlin i ngaihdan a thlak ang a; Hmar, Pawi, Mara etc Mizo nih an duh emaw i tih chuan Aizawl i hre lo hle a ni ang. Hei hi chu a tlanglawn deuh zawk a, Zofate hnam hrang hrang zinga mi ni si i hriat ngai mang lohte, an ṭawng nen lam Aizawlah chuan i hmu thei ang!

Mizoramah ‘Paihte sumdawng’ tihte ‘Pawih sumdawng’ tih ṭawngkam te a awm, rambuai hma daih aṭang tawhin a ni. Chumi awmzia chu India-in Aizawl a bomb hmain Zoram khawchhak aṭangin beiseina neiin mi an lo kal ṭhin a ni. Beiseina nena Aizawl pankhawm chu he khawpuiin lainatna tel hauh loa suasam a tawh hma aiin a hnuah a nasa zawk. Mizoram chhunga miten an pankhawm chhan chu thuhranah lo dah ila, a pawna miten an pankhawm nasa hi a ni a ropui leh hlutna. Zofate awp darhna ṭhuthmun hrang hrangte kha mi hual veltu leh Sap ro luah a min awpzuitute politics boruak dik lo avangin hmun dang aṭanga pan vang vang tlak an ni hlawm lo. Falam, Hakha, Tedim, Lamka, etc hmunpui deuha Zofaten kan neih leh han pankhawm ve deuh lai kan neihte hi mangang tlukluh theihna tur ang an ni ta reng reng lo a, mi tam takin an chhuahsan zawk chu a nih hi. Khawthlang, chhim leh hmara Zofate phei chuan hetianga han belh chhin tur khawpui sawi tham an nei ve lo bawk a, Aizawl hi an thlir ber tur a ni lo thei lo.

Chutianga Zofate nun, politics leh ei-bar zawnnaa hmun pawimawh tak, tunthlenga kan thlamuanpui, mangan nia damkhawchhuah beiseia kan pan ṭhin chu India laka independent puang an awm avangin India sorkarin senmei a chantir hmiah a nih chu. ‘A bomb’ te pawh kan ti ṭhin. India chuan lamṭangte pawh zuah emaw chhanchhuah emaw a tum lo, chunglam aṭanga vaihmain a ṭum hmiah hmiah mai a ni.

Kan khawpui hlu tak thil tawn rapthlak lutuk kha, theihnghilh rual kan ni em le? Zofa tu pawhin Aizawl nen hian inzawmna a langin emaw lang loin emaw nei tur kan ni a, kha thil thlengah khan bâng tur kan awm âwm lo ve.  Khami ṭum khan Aizawl kha lo tlu hlen se Zofate tana beiseina meichher hi khawiah nge a dêt ang le?







(Khawngaihin, Explore Mizoram hi mi dang i lo hmelhriattir zel dawn nia!)
 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(He website kal zel theih nan hian fakna lo langte hi i lo hmet ve thin dawn nia.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post