Aizawl | March 1, 2023: February 6, 2023 a Melthum, Aizawl-a ruang chhe tawh tak chhar, a chhungten, Zahleipari, Kum 28 a ni ngei e, an tih avanga February 9, 2023 a Lawngtlai Vengpui thlanmual a vuiliam tawh chu alo ni leh silo tih hriatchhuah a ni!
Tarlan tawh angin February 6 2023 khan Melthum dai-ah hmeichhe ruang chhe tawh ang reng tak, tunge anih tih hriat loh chhar a ni a. He ruang hi ZMC-ah post mortem te tih niin tunge anih tih hriatchhuah anih mai loh avangin ni ZMC-a ruang dahna hmunah ni 3 lai dah anih hnu-ah, Lawngtlai Vengpui lam atangin he mitthi hi Zahleipari (Partei) ni ngeia hria in, a unaupa'n ZMC-ah hian a rawn finfiah a. Ruang hi a chhiat deuh tawh avangin a ke a ser awm atangin a unaupa hian an farnu ngei niin a ngai a ni. Tichuan February 9, 2023 khan Lawngtlai Vengpui lamah ruang hi phurh phei niin Vengpui Thlanmualah vuiliam a ni ta a ni.
Hetia Partei ni ngeia ngaia vuiliam anih hnu-ah Partei hi vawiin khan ruang an vui liam tak hi Partei a ni lo tih hriatchhuah a ni a. Partei diktak hi tunah hian TBCC Home-ah dam takin a awm mêk tih hriat a ni.
He thilthleng chungchangah hian Lawngtlai Vengpui YLA te chuan, Parteii ruang ni a ngaih phum tâk chungchang hi Police lam pawh an hriattir tawh a, Lawngtlai Vengpui thlanmuala phum a nihna hmunah hian ruang hi dah a ni rih dâwn a. Amah hretu emaw a chhungte an awm anih chuan ruang hi phawrh leh theih a ni ang a, ngaihventu an awm lo anih chuan Lawngtlai Vengpui thlanmualah hian a ruang hi dah hlen tur niin, Branch YLA in a thlan hi a enkawl chhunzawm dawn a ni tih thuchhuah an siam.
- Kiddy Vanchhawng @ Mizo Special Report
Post a Comment
He post chungchanga i ngaihdan lo sawi ve rawh: