_Hringnun i nun chhuahpui ngei tur chu_
— Rick Warren
— Mar 1, 2023
I nun kha muangtea kaltir i duh chuan, Pathian hun tiam chu nghah i zir a ngai a ni.
Thil hi beisei anga a thlen zung zung loh chuan, dawhtheih hi a harsa thin. Mahse, eng nge dawhtheihlohna chu ni reng reng? Hei hi rinna tlakchhamna a ni.
I dawhthei lo viau a nih chuan, Pathian chu, “Lalpa, ka ring chiah lo che a. Ka rilru ang hi min tuipui lovin ka hria. Kei ka hmanhmawh tawh si a, ka duh hun hi i hre lo a ni,” i ti a ni. I mangang a, i hmanhmawh a, a hun taka Pathian hun ruat leh ruahmanna chu i ring zo lova nangma duh danin ke i pen tan a. Amaha innghah ai chuan, buai takin i bei a i sual thin a ni.
Mi dang ang ve tho i nih chuan, thil tih i tumin, i hmanhmawh em em a. Mahse hmanhmawh reng hi a tha ber em? That loh chang a awm ve tho.
Bible-in Thuhriltu 3:11 ah chuan, “Engkim hi an hun theuhvah chuan mawi takin a siam a … mahse chuti pawhin anni chuan Pathianin a tir ata a tawp thleng a tih chu an hmu chhuak thei chuang lo,” a ti a ni.
Pathianin i tan ruahmanna a nei a. Chu chu i hre mai thei e. Amaherawhchu i nun atan pawh hunbi a tuk a ni. Chu chu hei hi a ni: Pathianin a hunbi tuk chu a sawifiah ngai lo. A chang chuan chu thil chu pawm thiam a har thin khawp mai.
Hringnuna hrehawm ber pakhat chu i hmanhmawh viau laia Pathian a hmanhmawh ve lo lai hi a ni. Naupang an thang a, an lo puitlin hian, “aih’ leh “aw” te thliarhran an zir a. Tihkhawtlaina chu hnawlna a ni lo a ni.
Isua zuitu i nih angin, nang pawhin i zir a ngai a: Pathianin a tihkhawtlaina chu a hnawlna a ni lo tih hi. Ani chuan ruahmanna neiin hun bituk a nei a. Chu a hun ruat chu hun tha ber a ni.
Saddleback Kohhran kha kum 15 chhung Biak in nei lova a kal lai khan, Pathianin he thu hmang hian min fuih thin a: “Hmathlir hi hun ruat chhung atan mai a ni nghe nghe si a, a kin ni chu a hnai tial tial a, a thlawn lo vang. Rei deuh mah se nghak rawh. A lo thlen ngei dawn avangin a tlai chuang lo vang.” (Habakuka 2:3 NLT)
Pathianin hmathlir, tuna la hlawhtling lo a neihtir che em? A lo thleng mek – Mahse Pathian hun ruatah a ni ang. Chutihlai chuan, hmanhmawh lo la, ring tlat ang che.
Ngaihtuah zui atan
* I hun chhuikir la, Pathianin a tihkhawtlai nia i hriat mahse i tana tha ber si kha engtik hun nge?
* Pathianin hmathlir a pek che, mahse a lo thlen hun i nghah mek eng nge ni?
* Pathian hun ruat i rin leh i innghah mek lai hian, a tikhawtlai niin a lang em?
*“Vawiin hian Isua i zui dawn em?”*
Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16.
Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che, Amen.”
Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.
*[Lettu: Sangpuia]*
Post a Comment
He post chungchanga i ngaihdan lo sawi ve rawh: