Aizawl | Feb 15, 2023: ZPM PAC member TBC Lalvenchhunga chuan vawiin khan Aizawl Press Club-ah thuthar thehdarhtute kawmin, ""Minister Robert Romawia Royte hi a department hnuaia hna hrang hrang thawktute phenah a biru niin kan ngai a, insawifiah turin kan phut!" a ti.
TBC Lalvenchhunga chuan, "February ni 13, 2023 khan Tourism Dept hnuaia hnathawh, 'Component 1 of Development of Immediately Required Infrastructure for Tourist Development at Reiek tlang,' tuna thawh mek chu a hmunah kalin ZPM chuan kan enfiah a. He hna atana estimate chu Rs. 560.00 lakh a ni a. Sum hi Ministry of DoNER atanga hmuh a ni. He hna hmutu hi DJ Consultancy Services, Peter Street, Sikulpuikawn a ni a, Restricted Tender hmanga hna hi pek a ni." a ti.
ZPM PAC member TBC Lalvenchhunga chuan, "July 30, 2020 atanga thawh ṭan a ni a. Thla 18 chhung, December 2021 ral hmaa thawh zawh tur tihna a ni. Hun tiam chhungin an zawh theih loh avangin extension an dil a, thla 13 chhung pek belhin January 2023 a thawh zawh tura tih a ni. Chutah pawh chuan an zo leh thei chuang lo a, RTI atanga a lan dan chuan nikum December 7, 2022 khan 87% zo tawh anga sawi a ni. Pawisa pekchhuah tawh zat pawh Rs 356.485 lakh a ni." a ti a.
"He hna hi Works Components 12-ah ṭhen a ni a, Sanction Amount leh hnathawhte a inmil lo hle ah kan ngai a. Hna ṭhenkhat chu a taka min kawhhmuh tur an nei lo. An hnathawh zawh tawh nia sawi leh department-in sum an pekchhuah hi a inphu lo hle."
"He hna hi DJ Consultancy Services hminga hmuh a ni a, a hmuna kal a kan zawh chuan hnathawktute leh viltute hi NECS hnuaia thawk vek an ni. Kan kal laia hna an lo thawh mek Architechture & Structure Drawing pawh NECS siam a ni. He hna hi a inziak danah DJ Consultancy Services hming ni mah se, a tak takah chuan Minister fapa consultancy firm NECS thawh ngei a ni tih a lang chiang hle a. A department chan hnuaia hna hrang hrang te pawh hi duhsak taka restricted tender hmanga pek vek niin, heng hna thawktu hrang hrang consultancy firm te hi a kawr mai niin a phenah hian Minister hi a biru ngeiah kan ngai a ni." a ti bawk.
"Restricted tender, hnathawh hmanhmawhthlak leh specialist ngaia hna thlan thawktute hi hming hriat ngai loh, office pawh nei mumal lo, an experiences leh work done pawh la hmuh loh an ni tlangpui a. Hetiang a hna hmanhmawhthlak thawk tura hna pek ni si, an thawk muang em em a, bul la ṭan loh pawh tam tak a la awm a ni."
"Hetiang mai maia hna thawh an chin avangin PMJVK hnuaia hna ngawt pawh Vbc 107 zet Utilization Certificate (UC) an pek theih loh vangin, sum lo kal leh zel tur pawh central sorkarin min block ta vek a ni. Heng harsatna kan tawh meka mawh phurtu lian tak chu Tourism Minister fapa hminga firm, NECS hi a ni."
"NECS hi District Council & Minority Affair (DC&MA) chuan duhsakna uchuak, 'Single Source Selection' hmangin Memorandum of Understanding a ziah pui a. Hei hi Mizoram Public Procurement Act leh Rules hnuaiah hman pawh a la ni ngai lo a ni."
"Minister Pu Robert Romawia Royte hian Assembly House-ah ngei NECS hi a fapa ta a nih thu a sawi a. District Council & Minority Affair (DC&MA) changtu Minister nena an inlaichin dan pawh tlang hriat a ni. Kum 2015-ah khan MNF Party hian khatih laia Minister Pu Lalthanzara chu a chhungte company HP Flour Mills-in Social Welfare Department hnuaiah hna an hmuh avangin conflict of interest a puhin FIR hial an thehlut a nih kha!"
ZPM Party chuan Minister Pu Robert Romawia Royte hi insawifiah tur leh a insawifiah thei lo a nih chuan moral responsibility la a bang ngam turin an phut a. District Council & Minority Affair (DC&MA) Minister Pu R Lalzirliana pawh he hna special taka an inpek dan sawifiah turin an phut tel bawk.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: