ZPM Tuirial Joint Block Conference hmang; Kan policy kalphung thar mipui sawrkarin a ken tel chu danglamna a ni – Lalduhoma

Aizawl | Jan 31, 2023 : Vawiin khan Awithangpa Hall, Kawnpuiah ZPM Tuirial East & West Joint Block Conference neih a ni a; ZPM General Headquarters aṭangin Pu Lalduhoma, Leader; Pu TBC Lalvenchhunga, PAC member; Pu Lalchungnunga, General Secretary; Ms Baryl Vanneihsangi, AMC Corporator leh hruaitu dang ten an hmanpui a; ZPM Leader chuan mi thar 607 a lawmlut nghal a ni.

Pu Lalduhoma chuan, “Kan policy kalphung thar mipui sawrkarin a ken tel chu danglamna a ni. Sawrkar kan hrawn tawh te lakah kan danglam tur a ni. Kan unit te, kan group te leh kan block te thlengin kan danglam tur a ni. Keini chuan a system tihdanglam kan zuar a, Pathian zara kan lo sawrkar a nih pawhin kan danglam loh chuan awmzia a awm dawn lo. System thar hmang turin mi thar a ngai; 

Budget pharh ṭhang leh a pawh pen dan thiam tawh ten he kalphung hi an khawih thei lo; kalphung thar khawih turin party thar, mi thar kan mamawh a ni. Kalphung thar tih awmzia kan sawi ziah chu mipui sawrkar a ni. Kan sawi chhan pawh kan hrawn tawh sawrkar te hi party sawrkar a ni a, an sawrkar pawhin ram tan ni lovin party tan a ni a, thil ṭha pawh ti dawn se an party-in a ṭhatpui dawn loh chuan an ti duh lo a ni. Keini ZPM te chuan he party sawrkar hi paihthlain mipui sawrkar kan din dawn a ni,” a ti a.

ZPM Leader chuan, “Sem policy hian kan ram a ti chhe em em a, kan rilru sukthlek thlengin ngawng ṭha lo tak a nei ta a, a nei zel dawn bawk ni te pawhin a lang. Chuvangin, Kan ram politics-ah hian lungphum thar phûm turin kan insawm a ni. ZPM hian party-a rinawm kan inzirtir lo a, policy-a rinawm tur erawh chuan kan inzirtir thin. Pathian leh mipui hmaa kan thutiama kan rinawm lo a nih chuan min chhuahsan leh ngam turin kan inngen a, tupawh lo sawrkar se thlan leh tlak a nih chuan thlang leh mai ila, thlan leh tlak an nih loh chuan kan thlak leh mai tur a ni,” a ti. 

Kan ram tichhetu te chu ruling party an ni zel; an sawrkar chhungin ṭha taka hnathawk chu awm ve bawk mah se a tam zawkin hna an thawh ṭhat loh avangin kan ramin a tuar ta a ni. Keini ZPM-te chu kan ram tichhetu kan ni ve thiang lo; chuvangin, kan pawimawh satliah mai a ni lo a, kan ram leh hnam dinchhuah lehna tur atan pawl ropui tak kan ni,” a ti. “Politics hi khel fuh ni lovin khel dik turin kan inzirtir ṭhin a, mi ṭha te tel ve theihna turin politics hi kan siam tur a ni. Party ruihchilhna hi ṭhalai teah a awm tawh lo a, kum upa lamah hian hetiang mi hi kan la awm deuh zawk a; ṭhalai zawkte hian thil hi an buk a, thil ṭha leh ṭha lo an hre tawh em em a ni. Neutral mipui kan tam tawh em em a, hei hian kan ram politics-ah a ṭha zawngin nghawng a neih ngei kan beisei,” a ti bawk.

Pu TBC Lalvenchhunga chuan, "Rorelna kan chelh theihna tur kawngah ZPM-in kan zawrh chu thawhrimna a ni. Thlan tla khawpa hnathawk turin kan insawm a, hei hi Zoram dung leh vanga kan tlangaupui ber a ni. Chutih lai chuan kan Chief Minister-in a thusawiah party dang aia MNF chanṭhat bikna tur nia a sawi chu sum leh paiah a ni a, ram hruaitu lu ber thusawiah chuan a atthlak tak zet a ni.

Pathian leh kan ram tan titute hmachhuan ber chu sum leh pai a ni tih a chiang ta hle; sum leh pai hmanga intlansiak kawngah chuan kan cho rual an ni lo. ZPM hi party rethei ber kan ni. Kan thawkrim em em a, kan thawhrimna hi kan hmachhuan awmchhun leh a rah kan seng tura kan beisei neihchhun a ni. He ram hi chhan tlak a la awm a, sawrkar fel fai, dan rorelna tungding ngam  siam kan tum tur a ni,” a ti.

ZPM Tuirial Joint Block conference hun hniha ṭhen niin hun khatna hi Pu R Tlangkhuma, President, ZPM Tuirial West Block chuan a kaihruai a; Lt. Lalchhanchhuaha, Salvation Army chuan hunserh hmangin Block pahnihte aṭangin reports ngaihthlak a ni a. Mi thar lawmluhte atangin thusawi ngaihnawm tak tak ngaihthlak a ni a; Pu J Lalngaihawma, President, ZPM Tuirial East Block chuan lawmthu sawiin a khar a ni.

Hun hnihna Thalai programme niin Awithangpa Hall kawt zawlah zaithiamte nen hun hman a ni a; Pu H Lalfakzuala, Treasurer, Music Ministry for ZPM chuan kaihruaiin Baryl Vanneihsangi, Alinery Lianhlawng leh Pu Laltlanmawia ten thu an sawi bawk a ni.

.