NI KHAT ATAN LALPAA RINNA NGHAH

 _Pathian ṭhatna hnuaia nun dan_

*NI KHAT ATAN LALPAA RINNA NGHAH*

— Rick Warren 

— Jan 3, 2023

“Chutichuan, a tuk atan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni.” Matthaia 6:34

I lungngaih miah lohna tur ni hnih a awm: nimin leh naktuk.

Isuan, “A tuk atan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni.” (Matthaia 6:34).

Hun kal tawhah khan i cheng thei lo va. Hma lam hunah pawh i cheng thei hek lo. Vawiinah chiah hian i cheng thei a ni.

Eng vangin nge ṭum khatah ni khat atan chiah i nun theih? Pakhatna, Naktuka harsatna lo thleng turah i lungngai a nih chuan, vawiina malsawmna i dawn tur i hloh ang. Pahnihna, vawiina i theihna hmangin naktuka harsatna hi i chingfel thei lo a ni. Naktuk a lo thlen hun chuan, Pathianin i mamawh theihna, thlirdan dik, khawngaihna leh finnate a pe ang che.

Naupang ka nih lai chuan, ka nuna ka thil mamawh engahmah ka lungngai lo va. Chu ai chuan, ka mamawh hrilhin ka nu emaw ka pa hnenah emaw ka kal zawk ṭhin. Kan mamawh chu engtin nge an ngaihtuah ka hre ngai lo, a chhan chu mawhphurhna an chungah a awm vang a ni.

Pathian pawhin chutiang chuan a kianga awm turin a duh che a ni.

Matthaia 6:30 ah chuan, “Chutichuan, ram hnim, vawiin anga nung, a tuka thuka tuah leh mai tur mah Pathianin chuti kauva a chei chuan, aw nangni rin tlemte u, silhfen a pe zawk em em dawn lo che u em ni?” a ti.

I lungngaihin, Pathianin mawhphurhna i kovah a dah ngai lovin i ring a. Vawiina i lungngaihna te pawh hi Pathian mawhphurhna liau liauah i ruat a ni. Dik tak chuan, i lungngaih apiangin, Pathian i chhaihna leh engkim hi nangmahah a innghat tih i rinna vaukhanna a ni. I van Pathian nangmah hruaitu leh i mamawh apiang petu che nei lo ang maiin i awm a ni.

Biblein heti hian a sawi lo, “Vawiinah karkhat kham khawp min pe la.” Heti hian a ti zawk, “Ni tin kan ei khawpin chaw min pe ang che” (Matthaia 6:11).

Pathianin ni khat atan amah ring turin a duh che a. Vawiin atana i mamawh zawng zawng chu a pe ang che. A chhan chu Lalpa chu a ṭha a, amah chu ring la tlachhamin a siam lo vang che.

Naktuk atana ruahmanna siam chu a ṭha. Mahse lungngaih nan hmang suh! Ni tinin hun lo thleng ang hian Pathianah innghat rawh.

Ngaihtuah zui atan

* Vawiin hian Sam 23 na hi vawi nga aṭanga vawi sawm sawi chhuak la, zir bawk ang che. I lungngaihin eng Bible chang nge innghah nan ṭangkai ang?

* I hun liam tawha i lungngaihna Pathian hnena i hlan ngai te kha eng te nge?

* I hmalam hun tur i lungngaihna avanga vawiina Pathian i rin a ngaihna eng te nge?

*I nunah Isua i la ringlo a nih chuan, eng vangin nge i la nghah?* Heti hian ṭawngṭai rawh: "Duh tak Isu, nang ka rin che chuan, ka tihsual zawng zawngte min ngaidam dawn a ni tih leh i van in nuamah engtik emaw chuan min la pawm dawn a ni tih min tiam a. Ka chhandamna chu keima hlawh emaw thawhchhuah a ngai lo tih ka hriat avangin ka lawm a. Pathian thilpek, krawsa i tawrhna avang a ni tih ka hria e.

"Aw Lapa, misual ka nih ka inhria a, chu vang chuan i ngaihdamna ka dil a che. Isua Krista hi i fapa a ni tih ka ring a. Ka sualna avangin a thi tih leh thihna hnehin i kaitho tih ka hria e. Ka chhandamtu atan ka duh che a, vawiin aṭang hian i hnungzui ka duh a ni. Ka nun min kaihruai la i duhzawng ka tih theih nan min pui ang che. Isua hmingin ka dil e. Amen.”

Isua thlanga i ṭawngṭai thei a nih chuan, hetah hian min lo email mai la Rick@PastorRick.com. Tichuan Isua nena zinkawng i zawh theih nana i mamawhte a thlawnin kan inpe dawnnia.

*[Lettu: Sangpuia]*