ENGTIA REI NGE NI DAWN, LALPA’ TIH HRIAT I DUH HUN CHUAN

 _Nun duhawm zawk nei tura inbuatsaih dan_

*‘ENGTIA REI NGE NI DAWN, LALPA’ TIH HRIAT I DUH HUN CHUAN*

— Rick Warren 

— Dec 6, 2022

“[Mosia chuan] rinnain lal thinurna chu hlau lovin Aigupta ram a kalsan a, hmuh theih lohva chu a hmuh avangin a tuar tan tan a ni” Hebrai 11:27

Natna rei tak tak tuar an awm a, taksa emaw rilru emaw thlarau lam emaw inlaichinna leh sum leh pai thil avang te pawh a ni thei vek a. Natna chu i tuar belh zel a, damchhung daih turah pawh i ngai hial maithei a ni.

Ni engemawti chhung chu Pathian fiahnain a ti thanglian che tih chungchang kan zirho tawh a, tun tuma mi chu zirlai dang a ni leh a. Fiahna chu eng chen nge, “Engtia rei nge ni dawn, Lalpa?” tih lam a ni.

Bible chuan Mosia nghahrei peihzia min hrilh a. Hrehawm tam tak a nunah a paltlang a. Sawiselna leh dodalna a tawk nasa a. “Engtia rei nge ni dawn, Lalpa” titu dinhmunah a ding ve a ni.

Hebrai 11:24-26 chuan, “Rinnain Mosia chuan, a lo puitlin hnu khan Pharoa fanua fapaa vuah a duh lo va; rei lo te atan sual nawmna hlimpui ai chuan, Pathian mite nena tihduhdah tuar a thlang ta zawk a; Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin.” 

Mosia chuan mi tam takin neih chaka an beih — larna, vanneihna, nuamtawlna, hausakna, leh dinhmun sang zawng zawngte a kalsan vek a ni. A rinna leh a nihna dik tak chu Pathianah a awm a ni tih hriain a kalsan vek a ni. Pathian mite nena tihduhdahna hrang hrang tawk mahse Pathian thutiamah chuan rinna a nghat tlat a ni. Krista avanga an hmuhsitna zawng zawng te chu pawisa lovin, an hmuhsitna te chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin.” 

Rinna chu nghah zel ngai dawn pawh nise nghah zelna hi a ni. A chang chuan a harsa ṭhin a ni. Tuar zel chung chuan engtin nge rinna i neih zel ang? Tuarchhelna chu engtin i neih zel theih ang? Natna chu engtin nge i tuar zel theih ang?

Mosia nun entawn la: Pathian hnaih la, amahah awm la, tichuan a aw i hre thei ang .

Mosia kha hnimbuk kang aṭangin Pathianin a bia a. Mahse nang chuan Bible i neih avangin hnimbuk kang chu i mamawh ve lem lo a ni. Pathianin i hnena a thil sawi duh zawng zawng chu Bible-ah a awm vek a ni. Pathianin hnim buk aṭangin emaw vana ziakin emaw a be dawn lo che - a chhan chu lehkhabuah a ziak vek tawh a ni.

Inlarna ringawt zawng lovin. Pathian inpuanchhuahna, a thurawn, leh a thutiam te chuan tuarna kara fiahna i hmachhawn chu a paltlangtir thei dawn che a ni.

Mosia angin en tur dik en tlat ang che. Bible chuan “[Mosia chuan] rinnain lal thinurna chu hlau lovin Aigupta ram a kalsan a, hmuh theih lohva chu a hmuh avangin a tuar tan tan a ni” a ti a ni. Hebrai 11:27

Hrehawmna i tawrh chauh i en chuan, chunglam i en thei lo vang. Mahse Chhandamtu i en tlat chuan, a khawngaihna avangin harsatna karah pawh i kal zel thei ang.

Ngaihtuah zui atan

* Mumal taka Bible study kaltlanga Pathian nena inzawmna i neih theihna turin eng nge i kalsan ngai? Chu chu a hlawhthlak em?

* Hrehawmna i paltlang laiin, i rilru khawiah nge i dah ṭhin?

* Hrehawmna hun rei tak i hmachhawnin Pathian chungchang eng nge i zirchhuah?

*Isua Krista i nunah ila hawng ngai lo a nih chuan,* amah nena inlaichinna aṭanga i dawn tur inkawhhmuhna emaw venhimna emaw i hmu lo vang.

Naktukah eng nge lo thleng dawn i hriat a ngai lo va. I hmalam hunah eng nge lo thleng dawn i hriat pawh a ngai hek lo. Tu nge hmalam hun kawltu tih hi i hriat ngai zawka chu a ni. I siamtu nena inlaichinna in neih chuan, a hmangaihna dai ngai lo leh a thutiam chhe thei lo chu i nei thei ang.

Isua nena chatuana inlaichinna nghet leh nung neih i duh chuan, ṭawngṭai la: “Aw Lalpa, ka himna hi chhe thei mai mai lo turah awm se ka duh a . Ka himna chu nangmah nena inlaichinnaah nise tih ka duh a, min kalsan lo vang tih min tiam ka ring bawk a, chu chu vawiinah pawh hian sawi thar leh ka duh a. Ka hriatchian poh leh ka nun i tan ka hawng e. Keima duh danin ka nun ka hmanga sual rawng ka lo bawl ṭhin a. Pa Pathian hnena thlenna kawng awm chhun chu Isua Krista, krawsa thi a kan sual man bat min tlaksaktu kaltlang chauh a ni tih ka hria a.  Min ngaidam la, ka Lalpa ni kumkhua ang che. Ka duhzawng, damchhan, kalkawng min thlaksak ang che. Ka nun i hnenah ka hlan a, ni tura min duh ang ngeiin min siam thar ang che. Isua hmingin ka dil e. Amen.”

I ṭawngṭai thei a nih chuan, hetah hian min lo email la Rick@PastorRick.com. Isua nena zinkawng zawh ṭana bul i ṭan ṭheihna turin i mamawh a thlawnin ka lo thawn dawn che nia. 

*[Lettu: Sangpuia]*