I DUHTHUSAM PUITLIN TURA ṬANPUI THEI TUR CHE KAWNG LI

 _Nun duhawm zawk nei tura inbuatsaih dan_

— Rick Warren 

— Nov 16, 2022

“Tin, anni chuan, "I tho vang u khai; i din teh tak ang u," an ti a. Chutichuan chu hna tha thawk tûr chuan an kut an tichak a." Nehemia 2:18

Pathianin a pek che i duhthusam thleng turin midang ṭanpuina lak zir a ngai.  

I duhthusam puitlin turin engtin nge mi dang ṭanpuina i lak ang? Nehemia bung 2 chuan mi dang inpuihtir dan tur kawng li min kawhhmuh.

*Pakhatna, zirlawk hmasa rawh* I duhthusam chu i chhungte leh i ṭhiante i hrilh hmain i lo zirchiang hmasa tur a ni. I hriat loh thil chu mi dangin zawhna pawh rawn zawt lo se tih i duh ang, a chhan chu chhanna dik i hriat loh miau avangin.

Nehemia pawhin Jerusalem a thlen hlima hna a ṭan dawn khan a hrechiang hle a ni. “Jerusalem tana ka tih tûr ka Pathianin ka rilrua a dah chu tumah ka hrilh lo va...Tin, zanah chuan ruam kawngkaah ka chhuak a, ... Jerusalem kulh chim leh a kawngkhâr kangte chu ka en vêl a.” (Nehemia 2:12-13). Nehemia chuan mi dang ka aṭanga thu hriat a duh lo. Amah ngei kalin a zirchiang a ni.

*Pahnihna: Tihdanglam ngai thil chu ruahman lawk rawh.* Mi dangin siamṭhat theih thil an hmuh loh chu siamṭhat a nih hmain an dinhmun chu a lungawithlak loh thu an hriat phawt a ngai a. A chhan eng nge? Mi harsatna karah an awmrei lutuk chuan an dinhmun pangngai chu duhtawkin an lungawi mai chang a awm ṭhin a ni.

Nehemian a thil ruahman mipui a hriattir khan, an dinhmun kha a sawinep sak hauh lo a ni. Chutichuan an hnênah, "Kan chan a chhiatzia hi in hmu a, Jerusalem a ram tih te, a kawngkhâr te a kang tihte pawh in hria a: hawh u, sawichhiat kan nih tawh loh nân Jerusalem kulh chu i din leh ang u," a ti a.” (Nehemia 2:17). An dinhmun chu chiang takin a hre hmasa phawt a ni.

*Pathumna: Mipui hnenah ngenna a siam* Miin ngaihdan an siam reng rengin an finna leh ngaihtuahna aṭangin ni turah kan ngai ṭhin a. Mahse an rilru aṭangin a ni zawk ṭhin. Chuvang chuan mi dang ṭanpuina kan dil dawn chuan an rilru chhungril chawh thawh a pawimawh a ni.

Nehemia mipui rilru chawk tho tura a ngennaah chuan, “hawh u, sawichhiat kan nih tawh loh nân Jerusalem kulh chu i din leh ang u," a ti a” (Nehemia 2:17). Hei hi an zahawmna humhim tura ngenna a ni a, Pathian ṭanpuinain an kal ang a, zahthlak taka an awm tawh loh nana hriattirna a ni. Nehemian mipui a ngaihsakna a takin a lantir a ni.

*Palina: Midang fuih turin i chanchin sawi rawh.* Miin i duhthusam chu i tan eng nge a pawimawhna hriat an duh a ni. Pathianin i nunah hna a thawk a ni tih hriat an duh a. Pathianah i innghat a ni tih mi dang i hrilh chuan, rinnaa kal ve miin an chak phah dawn a ni. 

Nehemian ama nunah leh a ruahmannaah Pathian hnathawh ropui tak a sawichhuak a. “Pathianin a duhsak thute a hrilh a, a hnêna lal thu sawite pawh. Tin, anni chuan, "I tho vang u khai; i din teh tak ang u," an ti a. Chutichuan chu hna tha thawk tûr chuan an kut an tichak a. Nehemia 2:18).

I mit han meng la, Pathian hnathawhzia hi han thlir teh. I duhthusam thleng tura rinnaa ke i penna kawngah ṭanpuina leh thlawpna kawng tinrenga i dawn theih nan amah chu ring ang che.

Ngaihtuah zui atan

* Mi dang ṭanpuina te nen Pathian hnathawh ropui tak i nunah i beisei thei ang. Chu chu i nunah engtin nge a thlen dik tawh ṭhin le?

* I duhthusamah mi dang ṭanpuina dil ngaiin i awm ve em? Vawiinah hian Nehemia ruahmanna kawngli zing aṭang khan eng ber nge ṭan i mamawh le?

* Miin a duhthusam an hrilh hnu che a i ṭawmpui lai kha han ngaihtuah teh. Engvangin nge an ruahmanna chuan a hneh em em che?

*[Lettu: Sangpuia]*