Ticker

10/recent/ticker-posts

Mizo film 'Brother Zova' Nov 26 zanah



Aizawl | Nov 16, 2022: In-house Production chuan an feature film 3-na 'Brother Zova' chu November 26, 2022 zan hian tlangzarh an tum.


In-house Production hian tuna an tihchhuah tur hma hian feature film pahnih, 'Ka Bialnu' leh 'Driver Kima' tih te an lo tichhuak tawh a, an rin phak bak leh an beisei ai nasa a mipuiin a hlut a, OTT platform lam, Lersia Play-a an dahah pawh entu sing 3 chuang a nei.

'Brother Zova' hi a hma a an film ziaktu ngai tho, Samuel Pachuau in a ziah a ni a, thingtlang unau inhmangaih takte chanchin behchhan niin, khawpui tlangval pakhat an lo tanpui avanga an duhdan loh deuha harsatna a an intahluh dan leh chu an harsatna karah thudik ril zawk, an unau tana thudik lungaihthlak tak ni bawk si an hriatchhuahna thawnthu a ni deuh ber. A film hi Drama leh Comedy huang ami a ni.


Lead role la tur hian Mizo model zinga hriat hlawh, Kimkimi Ralte, Music lama sulhnu nei tha, G'nie bakah, Tommy te an ni a, Mizo Cinema-a hmelhriat lar tawh tak tak, Maruata, Adama leh Hruaia te an awm dawn bawk a, In-House film hmasa lama lo lang tawh zingah Joe te leh mi dang dang hmel thar deuhte pawh an awm dawn a ni.

"tuna kan film hi an siam tawh zinga budget sanna ber a ni a, Rs. 8 lakhs chuang budget a ni a, a tam ber chu cast & crew salary ah a kal a ni." tiin Inhouse lam chuan an tarlang.



In-House Production owner, Drew Pachuau chuan he film hi a direct a, camera leh editing pawh a khawih vek a ni.

Director tawiawm tur hian mi 4 an awm a, MZU Mass Communication dept. atanga MJMC zir zote an ni.

'Brother Zova' hi November ni 26, 2022, Inrinni zan dar 7:30 pm ah Vanapa hall-ah tlangzarh a ni dawn a, hemi zan hian sawm ticket system in a duh apiang tan en theih a ni nghal bawk ang.


An tum dan chuan, Vanapa Hall a Premiere tur ticket hi pre-booking tih theih a ni dawn a, November ni 16 atangin Evok, Tuikual, Vanapa Hall bulah a lei theih dawn a, a hmunah lei theihin a awm bawk ang.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments