Ticker

10/recent/ticker-posts

ARGENTINA TEAM THLIRNA

 ðŸ‡¦ðŸ‡· (La Albiceleste)🇦🇷
- K. Remruatfela


Coaching Staff:
Lionel Scaloni hi Manager tha anga sawi thin ni ngai lo mah se, tunah Argentina team a kaihhruai dan en hi chuan khawvela Manager tha berte zinga mi a ni a tih loh theih loh! A kaihhruaina hnuaiah hian Argentina team hian game 50 an hmachhawn tawh a. Chung zingah chuan vawi 34 hnehna chang tawhin vawi 12 an tumpuite an inhnehtawk pui a. Vawi 4 chiah hneh loh an la tawng a ni. Tin., chumai bakah game 36 ngawt a zawnin hneh lo nei lovin an kaltluang mek bawk a. Heng zawng zawng avang hian Manager fak hlawh a ni chho mek a, kumin World Cup ah pawh fiahna a hmachhawn zawh ngei a rinawm.



​Tin, chumai bakah Scaloni hian amah pui turin Argentine player tawhriat ngah tawh tak tak te a hung teuh a. World Cup tawnhriat nei tawh thiau – Roberto Ayala, Walter Samuel leh Pablo Aimar ten a hnung an dawl tlat dawn avangin team enkawltute lam pawh an rintlak hle. Sawi tawh angin Roberto Ayala hi Argentine Captain hlui a ni mai bakah leadership quality nei tha leh Argentine mipuite pawhin an zah rawn a ni a. Tun tum World Cup-ah pawh hian Argentine thluak bur ber pakhat ni tura ngaih a ni. Ani mai bakah hian tactic thiam Pablo Aimar leh game control thiam ti-a sawi lar, Walter Samuel a la awm cheu bawk a. Heng zawng zawngte avang hian Argentina team te hian kuminah World Cup lo awm turah hian khawvel mipuite rin an kai phah hle a ni.


Goal Keeper:

​Argentina hian World Class goal keeper an nei khat khawp a. An goal keeper hming kan hriat lar tak takte pawh hi World Cup chhunga kan hriat lar thar leh hming chher chawpte an ni tlangpui. Kum 1978 World Cup trophy an chawi tuma an keeper, Ubaldo Matildo Fillol kha Argentina team ten keeper an neih tawh zawng zawnga la tha ber anga ngaih a ni a. Chu lo lehah chuan World Cup 1990 final an luh tuma, penalty save thei vanga hmingthang, Sergio Goycochea kha a lar zual pui chu a ni mai awm e.

​Ani pawh kha first choice goal keeper Nery Pumpido inhliam avanga starting line up chang mai mai kha a ni a. Nimahsela, round sang zawnga penalty a save theih em avang leh a save loh pawh a kut hmawr tala a khawih phak zel avang khan vawilehkhatah a hming a chher phut a nih kha! A hnu leh zela an goal keeper Carlos Roa, Pablo Cavallero, German Burgos, Christian Romero etc te kha chu world class goal keeper tak tak anga ngaih theih an ni lova. Chet that chang nei, langsar hlen ngai lo an ni tlangpui.

​Tun tumah erawh world class goal keeper anga ngaih theih, Emiliano Martinez an nei tlat tawh a. Ani hi penalty saver a nih mai bakah timing hria, ball kang leh a lir pawh dang zung zung thei, a hmaa lehlam player te au zam thian a nih avangin kumin World Cup lo awm turah pawh hian Argentina chhanhimtu ropui a nih ngei a beiseiawm. A dam that phawt chuan start zel tura ngaih a ni a. Vanduaithlak taka a lo inhliam phut a nih pawhin, experience goal keeper Franco Armani a la awm cheu bawk a. Argetina team tantute tan chuan a thlamuanthlak hle.
 

Defenders:

​Argentina football team hi tun hma atang tawha tlar hnung khawng anga sawi an hlawh khat khawp a. A bik takin tun hnai World Cup chhoah phei chuan khawvel mipui hmaa an mit ti mim ber thintu pakhat a ni. Kum 1978 World Cup khan Daniel Passarella an nei a. Ani kha khawvel Defender tha berte zinga mi ni-a ngaih a ni a. Ani awm tawh loh hnuah erawh tlar hnung a pawp chho thin hle.

​World Cup 2002 kha kum 1978 hnua tlar hnung an la nei that leh ber ni maiin a lang a. Amaherawhchu, khami tum pawh khan an innghahna ber leh an Captain, Roberto Ayala a inhliam leh tak phut si avangin beisei an pha leh lo chho ta viau a nih kha! World class defender anga chhal theih, Javier Zanetti leh Walter Samuel te meuh pawh Roberto Ayala tello chuan eng ruai an lo ni lo!

​Javier Zanetti leh Walter Samuel te an chawlh hnuah lek phei chuan Argentina team hi world class defender anga chhal theih hi an la nei ta reng reng lova. A bik takin World Cup hnuhnung berah ngat phei kha chu an mualpho chiang hle a nih kha! Defensive midfielder, Javier Mascherano kha an mualphona zualpui tur a hliah khuh hram hram a tih theih a. Awm lo ngat phei se la chuan khang aia nasa khan Argentina defence ho kha khang hunlai aia nasa zawk kha dem an hlawh nasa lehzual ngawt ang tih a rin theih.

​Nimahsela, tun tum World Cup-ah zet zawng, World Cup awm tirh ata Argentina tlar hnung khawng ber tum a la ni tih theih turin tlar hnunga ding tur an nei tha em em a. Hei vang hian champion nomawi chawi thei mai tura rinna pawh a len phah hle. Tum dangah chuan tlar hma lam vung viau mah se, tlar hnung a pawp leh thin avangin rin an hlawh tak tak thei lo thin a. An forward ten goal an nawr viau thin mah se, a sawhkhawk an dawl zo lo leh viau thin a nih kha!

​Kumin World Cup-ah zet zawng tlar hnung lai taka ding thei tur, Chrisian Romero an nei a. Ani hi chu uncontested ti tura ngaih a ni. A dinpui turah hian tun hnaia che tha tak, ground ball specialist - Lisandro Martinez nge ni ang, tawhriat ngah tawh zawk, Benfica Captain Nicolas Otamendi tho hi tih hriatthiam a har hle. Tun hnaia Manager game plan en hi chuan Nicloas Otamendi hi a hman a rinawm mah zawk. Tlar hnung vel lama ding turin experience player pahnih tho – Nicolas Tagliafico leh Marcos Acuna an nei a. Anni pahnih pawh hi world class defender ti-a han sawi theih tur an ni ve ve. Nimahsela, ngun taka an game an zir chian chuan tul lo taka foul nei ve mai mai ngai lo, tackle hun leh inpawhfan hun hria, Nicolas Tagliafico hi khelmuang chhungah bul han tan zawk se Argentina team hian an tangkaipui zawk mah ka ring.

​Manager Lionel Scaloni buaina ber tur chu tunge tlar hnung ding lamah ding ang tih hi a ni awm e. Duhthlan tur player tha tak tak pahnih – Gonzalo Montiel leh Nahuel Molina an awm a. Tun hnaiahan khel dan enin an tha dun si a, thlan tur zawk pawh hriatthiam a har khawp ang. Amahehrawhchu, ngun taka han khaikhin chuan thluak fing zawk leh accurate passing nei ngah zawk, Nahuel Molina hi lut zawk se team pawhin an tangkaipui zawk ngei a rinawm a. Bul a tan zawk ngei pawh ka ring.

​Chutiang chuan kumin World Cup chu Argentina team hi tlar hnung lamah mak tak maiin  duhthlan tur player khawng an ngah em em a. Bench lama awm tura ngaihte pawh hi han en ila game ti danglam pha vek an la ni cheu! Chuvangin, tun tum World Cup zet zawng Argentina tlar hnung hi sut tlang mai mai theih a nih a rinawm hauh lo!


Midfielders:

​Argentina chhul chhuak reng rengte hi ball thiam, mahni tawk pawha ball keng thei leh han chawkkual thei, awlsam taka mi 2/1 te chu han bum mai mai thei, an duhthusama ball han vawrh thei an nih tlangpui vek hlawm avangin engtiklai mah hian midfielder hi an nei chhe ngai lo hrim hrim a. Kumin World Cup lo awm turah pawh hian field laihawla game control thei tur an nei tha thawkhat leh hle.

​Mizo mipuiten World Cup kan en phak chinah ringawt pawh midfilder tha tak tak – Fernando Redondo, Juan Sebastian Veron, Ariel Ortega, Juan Pablo Sorin, Juan Roman Riquelme, Esteban Matias Cambiasso, Javier Mascherano etc te an lo nei tawh a. Anni hovin ball boot an khai hnuah pawh players chawr thar tha tak tak an la nei chho zel a. Khawvel hi a tawp a nih ngawt loh chuan hnah hlui lo til thin mah se, midlfielder ah ngat chuan hnah thar hi an lo chawr leh nghal zel a rinawm.

​Kumin World Cup lo awm turah pawh hian Argentina hian world class midfielder a hung leh tuar tawh zu nia! Manager Scaloni hian 4-2-3-1 formation a lo hman chhoh leh ngei a rinawm a. A system hi a thlak a nih ngawt loh chuan starting line up tur pawh a rin theih nghal riak ruak. Field tlar lai atanga Defence lam pui pah turin Real Betis Defensive midfielder, Guido Rodriguez a awm a rinawm a. A hma lama dinga, defence leh forward lamte link zung zung turin Rodrigo De Paul a la awm cheu bawk a. Hun lo takah an inhliam a nih ngawt loh chuan anni pahnih hi inkawp chho ngei tura ngaih an ni. Anni pahnih hi la liga player ve ve an ni a. Game khelh dan in man tawh sa leh khelh dan system pawh inang tak tak an nih duh avangin tlar lai chu a ngaihtuahawm lo hle ang.

​Anni hnung lo dawl turin Bayern Leverkusen rinrawl - Exequiel Palacios te, tun hnaia che tha chho tak, Brighton player Alexis Mac Allister bakah experience player Leandro Parades te an la awm cheu bawk a. An ngaihtuahawm lo hle. Tun hnaiah Parades hi a chet that chhoh em avangin Guido Rodriquez hi a luahman mai ring tawk pawh an awm nual a. Nimahsela, khelh chhiat tak tak nei ngai lo, Guido Rodriguez hi team chuan an tangkapui zawk ngei ka ring.
 

Forward/Winger:
Argentina team te hian forward/winger hi an nei chhe ngai lo mai a ni lova, World Cup apiang hian world class forward/winger tha ber berte an la nei zel zawk a ni. Diego Armando Maradona hunlai atan tawh goal nawtu leh khungtu lam hi an intodelhna lam tak a ni char char a. An tlar hnung lam a pawp thin em avanga beisei ang thleng pha ta ngai lo chauh zawk a ni.
​Kum 1994 World Cup khan Diego Armando Maradona, Claudio Caniggia leh Gabriel Omar Batistuta te kan hmu tawh a. World Cup 1998 leh 2002 ah te pawh Gabriel Omar Batistuta, Claudio Lopez, Hernan Crespo te hmu chhovin kum 2006, 2010, 2014 leh 2018 World Cup chhoah te pawh khan khawvel huap pawha forward lar thiau – Javier Savilloa, Carlos Tevez, Julio Cruz, Lionel Messi, Gonzalo Higuan, Ezequiel Lavezzi, Sergio Aguero etc an lo awm chho nuk tawh tawh a. Kan han sawi lan tak player ho te hi an vanglaia a top ni pha thiau, club tan pawha rinrawl leh innghahna ni phak vekte an ni a. Khawvel mipui thlir rawn an hlawh thin a nih kha!

​Heng kan sawi tak hranghlui player tha tak tak ho te kha chawl deuh vek tawh hlawm mah se, hnah hlui chu hnah tharin an thlak thin tih ang deuhin kumin World Cup-ah pawh hian hmatawng an intodelh leh hle. Captaion Lionel Messi hi chu sawi lova lengah han dah ta ila, ani han puibawm turin Inter Milan forward, Lautaro Martinez te, tawhriat ngah Angel Di Maria te, Juventus legend hlui, Pablo Dybala te, Manchester City forward Julian Alvarez te bakah Correa pahnihte an la awm cheu a. An tumpuite tan chuan tawrhhlehawm tak tur an ni ringawt.


Overall:
Heng zawng zawng han thlir hian Argentina player te hi formation tinah an in balance tawk em em a. Keeper atanga tlar hma ber thlengin world class player thiau inhlawmkhawm an ni. Tlar hnung lamah start tui chiang lo awm deuh mah se, tlar lai leh tlar hma lamah erawh bul tan tur a chiang nghal tih theih deuh thaw a ni a. Substitute players tura ngaih hote pawh hi team dangah chuan khel sa an innghahna ni pha deuh vek thei tura ngaih an ni hlawm. Chuvang chuan kumin World Cup na na na chu Argentina team te lansarh hun a inher chhuak ngei dawn tih a chiang a. Nomawi an chawi hun tur nghakhlel takin i han thlir phawt mai teh ang u.






(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post i hmuh dan

Post a Comment

0 Comments