_Nun duhawm zawk nei tura inbuatsaih dan_
Inlo
*DODALNA LEH REMCHANNA HI ENGVANGA KALKAWP NGE A NIH?*
— Rick Warren
— Nov 22, 2022
“Kawngka zau tak leh sawt tak ka tan a inhawng si a, dotute tam tak an awm bawk.” (1 Korinth 16:9)
Nungchang tehna ropui ber pakhat chu dodaltute i hmachhawn danah a ni. Dik tak chuan dodaltute pawh hi Pathianin i nuna a thil ruahman a ni ve tho va, i hmalam hun atana hun remchang inhawnna tur a ni.
Bible chuan, “Kawngka zau tak leh sawt tak ka tan a inhawng si a, dotute tam tak an awm bawk” a ti. (1 Korinth 16:9).
I nunah hmasawnna lian tham a lo thlen dawnah mi zawng zawngin an fak thei kher lovang che. Pathianin i thinlunga hmachhawp lian tak tak a dah nia i hriatte pawh anmahni hna ang maia ngaia sawiseltu an awmin i hmu ang. An ṭawngkam ngainat ber chu, 'ni lo' tih leh 'I thei lovang' tih hi a ni.
I thiltih mek tihtawp an tum dan ber che pakhat chu nuihzat che hi a ni. Nehemia bung 4 a kan hmuh angin miten kawng thumin an nuihsawhna che an lantir thei a ni.
*Miten i nungchang leh i nihna hmangin an bei ang che.* Nehemia 4:1-2 ah chuan Nehemian kulh a siamṭha a ni tih a hriat khan dodaltu Sanbalata a lo lang vat a, “A thinur nasa hle a, Judate a cheksawlh ta a . . . heti hian a sawi a, ‘Heng Judami mi chhiaṭhaho hian eng nge maw an tih le?’” (Nehemia 4:1-2 ISV)
Miin an beih che chuan, an rilru a sosan deuh vang a ni ang, fim taka an ngaihtuah loh vang a ni. An beih lai che khan rilru fim an pu hman lo tihna a ni ber mai. Mi an thinrim emaw an hlauh lutuk emaw chuan dawt pawh an sawi hreh tawh lo a ni. An ṭawngkam a rum em em a, mahse an ṭawngkam chuan i nihna leh i tum chu an tihdangkam thei chuang lo a ni.
*Miten ngaihtuahna dik loah an puh ang che.* Nehemia dodaltute pawh khan Nehemia rilru puthmang kha an zawhna a ni. Sanbalatan heti hian a sawi a, “Heng Juda mi chhiaṭhahote hian eng nge an tih? Anmahniin an siamṭha thei dawn em ni?" (Nehemia 4:2 ESV) Sanbalatan anmahni ropuina tur leh anmahni hma an sial vang mai mai a ni tiin a sawisel bawk..
Dik tak chuan midang rilru puthmang leh tumruhna hi mi tumah hian an hre tak tak lo. Keimahni min tiphurtu ngei pawh hi kan sawichhuak thiam ṭhinlo a nia! Mihringte rilru chu” Pathian chauhin a hria a ni (1 Lalte 8:39 NASB).
*Miten i hlawhchham tur thu an sawi lawk ang.* Mi pakhat khan Nehemia hlawhchham tur thu kha a sawi lawk a ni. Nehemiah kulh siam chu mi pakhat phei chuan heti hian a sawi a, “Sihal pawh han lawn sela an lung kulh chu a tichim mai ang chu!” a ti. (Nehemia 4:3 NLT)
Tum i neih chuan tlangaupui rawh. Sumdawnna emaw bul i ṭan pawhin mi tam takin i hlawhchham tur thu an hrilh ang che. Mahse nang chuan Pathian duhzawng ang zelin i chhanglet tur a ni. Naktuk lamah hmalak dan tur kawng thum kan zir ve thung ang.
Ngaihtuah zui atan
* Engti zawngin nge dodalna leh remchanna i tun dinhmunah a kal kawp? Dodaltute chu engtin nge an lan dan?
* Mi dodalna tawk mek han ngaihtuah teh. Tunkar chhung hian amah fuih turin engtin nge hma i lak ang?
* Midang hlawhchhamna tur sawi ang chuan engtin nge an hlawhtlinna tur i sawi zawk theih ang?
*[Lettu: Sangpuia]*
Post a Comment
He post chungchanga i ngaihdan lo sawi ve rawh: