VANRAM I THLEN THEIH NANA HUN ṬHA BAWHPELH SUH

  _Chatuan Nihphungte_

— Rick Warren 

— 20 Sept, 2022


"Muang takin kan awm, ka ti, taksaa awm lova Lalpa hnena awm kan duh zawk.” 2 Korinth 5:8

Tunlai chu, chatuan nihphung te kan sawi mek a ni a, a chhan chu vanram i kaina chhan tur hrethiam la tih ka duh vang a ni. Chatuan nihphung hriat tur dang i nei leh: i thih hnuah hun remchang dang a awm leh tawh dawn lo tih hi.

Chatuana i chawlhna tur chu i thlan a ngai a ni. I thih hnuah ni lo vin, i damlai ngei hian i thlan a ngai a ni. Chuta ṭang chuan kir lehna a awm tawh lo! Pathianin i damchhung zawngin duhthlanna dik i siam theih nan hun a pe che a. Chu hun ṭha chu i bawhpelh chuan, i thih hnuah chuan siamṭhat leh ngaihna a awm tawh lo a ni.

Vanram leh hremhmun inkarah kawng chanvea chawlhna in a awm lo va.  Ram daidangtu pawh a awm hran lo. Hremhmun kotlang a awm lo va. Mitthi khua pawh a awm chuang lo. 

Mitthi khua kan tih mai “purgatory” hi Bible-ah a awm lo tih i hria em? Bible thu aṭanga lak a ni lo va. Kum 800 kalta hun laihawl vela ngaihdan an siamna mai a ni. Dik tak chuan, Catholic ho phei chuan an ring tawh lo. Pope John Paul II chuan vantlang hmaah purgatory kan tih hi thil awm tak tak a ni lo a ti a. Tuna Catholic thurinah phei chuan “purgatory” hi a awm lo nghe nghe a ni.

Isua kha krawsa a thih khan, misual damchhunga hrem hmabak a awm a. A hnukchah hma hretin, a nun chu Isua hnenah a lo hlan fel diam a, hetiang hian Isua hnenah a sawi a, “Isu, i ram i thlen hunah min hrereng ang che” a ti a. (Luka 23:42). Chhandamna chungchanga a hriat zawng chu Isuan a chhandam thei tih hi a ni. Doctrine emaw theology emaw chungchang thil hriat dang a nei lem lo. Ṭawngkam dik hman tur pawh a hre hranpa chuang lo. Isua hnenah a inhlan tawp mai a ni. 

A rinna avang chuan, Isuan a hnenah, “Vawiinah hian ka hnenah paradise-ah i awm ve ang” a ti a ni (Luka 23:43).

Vanram i thlen theihna tura, nangma lama i tih theih awm chhun chu Isua Krista hnena inhlan mai kha a tawk. Chu zawng chu a ni mai! Thutiamah chuan i thih pawhin Pathian hnenah i awm ve nghal ang a, chatuanin amah nen hlimin i leng tawh dawn a ni.

Amaherawhchu Isua zui tura duhthlanna siam tur hian nunna pakhat leh duhthlanna vawi khat chiah i siam thei a ni. Bible in 2 Korinth 5:8 ah, “Muang takin kan awm, ka ti, taksaa awm lova Lalpa hnena awm kan duh zawk” a ti.

Pathian chuan vanram i thlen ngei theihna turin a tih theih zawng zawng a ti a. Tunah erawh chuan a thutiam chu i chan theih nan i tih tur lam i tih ve a ngai ta a ni.

Duhthlanna i siam theih nan hun remchang vawi khat i nei a. Bawhpelh suh ang che!

Ngaihtuah zui atan

* Engvangin nge mi tam tak hian Kristian nih emaw nih loh emaw chungchanga thutlukna siam hi an hnawl nia i hriat?

* Engtiangin nge Isua ruala krawsa an khenbeh ve chanchin khan beiseina a pek che le?

* Tunkar chhung hian, Isua thlang tura duhthlanna siam a hmanhmawhthlakzia hi tu hnenah nge i sawichhuah ang?

*Isua hnenah i inhlan ve thei ang em?*

Bible chuan, “Pathian felna, Isua Krista rin avanga a ring apiangte hnena tihlana awm chu a ni; (danglamna reng a awm lo va)” a ti (Rom 3:22). I sualna te hawisana Isua hnena inpumpek i duh chuan, he ṭawngṭaina mawlte hmang hian han ṭawngṭai teh le:

"Aw Lalpa, misual ka nih ka inhria a, chuvang chuan i ngaihdamna ka dil a che. Isua Krista hi i fapa a ni tih ka ring a. Ka sualna avangin a thi tih leh thihna hnehin i kaitho tih ka hria e. Ka chhandamtu atan ka duh che a, vawiin aṭang hian i hnungzui ka duh a ni. Ka nun min kaihruai la i duhzawng ka tih theih nan min pui ang che. Isua hmingin ka dil e. Amen.”

Isua thlanga i ṭawngṭai thei a nih chuan, hetah hian min lo email mai la Rick@PastorRick.com. Tichuan Isua nena zinkawng i zawh theih nana i mamawhte a thlawnin kan inpe dawnnia.

*[Lettu: Sangpuia]*

Post a Comment

He post chungchanga i ngaihdan lo sawi ve rawh:

Previous Post Next Post