Ticker

10/recent/ticker-posts

GOLD MEDALIST | MZU M.Sc Environmental Science Gold Medalist 2022 Lalfakawmi

Mizoram University (MZU) M.Sc Environmental Science Gold Medalist 2022  Lalfakawmi kan belchiang.


MZU in M.Sc Environmental Science 2022 result a tihchhuah taka CGPA- 8.95 hmua Gold Medalist ni ta Nunui tia koh thin hi a laiah hming chu Lalfakawmi niin, Sapnunzira leh Sangchiri te fa pali zing a naupang ber a ni.


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Lalfakawmi  hi February 2, 1999 khan a lo piang a, an unau hi mipa pakhat leh hmeichhia 3 an ni. Chawngte P, Lawngtlai Dist lam mi niin, zirna avangin Salem veng, Aizawl-ah an khawsa mek a, Baptist Church of Mizoram (BCM) kohhran a lawi an ni.



Lalfakawmi'n EXPLORE MIZORAM zawhna a chhanna te i lo thlir ang:
📌 Zirna lam:
•  Pawl 10:
~ Pawl 9-10 hi Govt. Central High School, College veng, Aizawl ah ka zir a. Pawl hniam lamah chuan Top 10 hi chu ka kai ve ṭhin a, ka tichhe viau lo na chu han tiṭha fâl deuh pawh ka ni chuang lo. Pawl 10 hi 1st Division-ah 2014 khan ka pass a ni.

• Pawl 12:
~ Pawl 12 hi Mizoram Institute of Comprehensive Education (MICE) atangin 1st Division ah 2016 khan ka pass.

• Zirna sang zawk i zir leh i zirna hmun leh kum?
~ College hi Pachhunga University College (PUC) ah ka zir zawm a, Ka core subject Environmental Science atangin 2020 khan Distinction (2nd rank) -in ka zova. M.Sc Environmental Science hi MZU-ah kal lehin, kumin hian Pathian hruaina avangin ka zo leh a ni!

📌 I lehkha zir dan?
~ Lehkha hi routine mumal neiin ka zir thin a, exam hnaih lamah chuan ni khatah darkar 8-10 inkar te ka zir, zan lam a zir harsa ka tih zawk avangin, khaw en lai hian ka zir deuh ber a, a bik takin zing lamah hian ka zir nasa, amaherawhchu, exam dawn hnaihah hi chuan zanah pawh ka zir lui ve ṭhin.

📌 Harsatna I hmachhawn dan?
~ Ka zirlai kaihhnawih leh harsatna dang eng pawh alo thlen hian Pathian hnenah ka thlen hmasa ber a, chumi hnuah a ṭha ber ni a ka hriat angin ka tâwn ve mawp mawp mai zel, a eng zawng a thlir hram hram ka tum bawk ṭhin.

📌 Gold medalist i nihna (Subject) leh CGPA?
~ M.Sc Environmental Science niin, CGPA- 8.95 a ni.

📌 Gold medalist ni tura i beih dan?
~ Class ṭan tirh phat atangin tlem tlemin ka inzir ve a, exam dawn hnaih leh exam lai vel hi chuan ka zir sa ka enlet a ni deuh ber. Kan zirlai mai bakah a kaihhnawih thil te pawh ka en tel ve bawk ṭhin.

📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Aw, pui tehreng mai. Kan faculty-te hi an inhawng em em a, an puihna leh kaihhruaina tel loin he vanneihna hi chang thei ka ni lo, an hnenah lawmthu sawi sen loh ka ba in ka hria.

📌 I zirna atana i chhungte pawimawhna:
~ Kawng engkimah min support em em a, ṭhiante ka phak ve loh hlauin leh lehkha ka zir theih loh hlauin an theihtawp an chhuah a, lehkha ka zir chuan inchhung chet leh ṭul dangah min awl hneh em em a, bâng lova min ṭawngṭaisak ṭhinna te avang a he vanneihna pawh hi chang thei ka ni.

📌 I zirna atana i ṭhiante pawimawhna:
~ Ka zirnaah hian ka thiante pawh hian min pui em em a, kan zirlai a hriatthiam loh leh chian loh ka neih chang pawhin ṭhiante nen sawi ho na te kan nei ṭhin a, class ka kal theih loh changin an zir ang ang te min share ve zel a, ka hlawkpui ṭhin in an chungah pawh ka lawm em em a ni.


📌 I duhzawng leh ngainat zawngte:
• Rawng - Purple
• Chawhmeh  - Alu leh chakai
• Incheina - Hak nuam leh simple, nu deuh hnâp lam hi ka ngaina.
• Rimawi – Mood a zirin ka ngaithla kual vek.
• Mizo Ziaktu zingah - Mafaa hauhnar
• Hla - Lalpa a ṭha
• Hla phuahtu - C Lalzarmawia

📌 Mize ngainat zawng:
~  Mahni nihna ang a lang ngam, dawhthei, hriatthiamna ngah leh rilru zau.

📌 Mize ngai nat loh zawng -
~ Mahni nihna ang ni loa lan tum, mahni ṭanghma hai leh chapo.

📌 Hobby - Hla ngaihthlak, zai leh thil lem ziah.

📌 Relationship status - Single

📌 Kawppui atan duhzawng
~ Pathian ṭih mi, rilru zau, dawhthei, mi inring zo tak, rinawm leh inngahna tlak.


Zawhna dang:::
1. A tel lova i awm theih loh:
~ Pathian leh ka chhungte.


2. I nun kaihruaitu:
~ A hmasa berah  Pathian chuan ka nu leh pa.


3. Hringnuna i hlauh ber:
~ Pathian telloa nun hman.


4. I tih ngai miah loh tur:
~ Pasal neih hmaa mipat hmeichhiatna hman.


5. Mizo Tualzal nuna ṭha i tih:
~ Tlawmngaihna


6.  Quote i duh ber: 
~ Engkim tan hun ruat a awm.


7. Mizoram leh Mizo tualzal nuna Mizo hmeichhiate dinhmun: 
~ Kan chhehvel ram ngaihtuah chuan kan dinhmun a ṭha thawkhat viau chuan ka hria, tunhma nun te ngaihtuah phei chuan hma pawh kan sawn zel ka ti.


8. Hnam hmingṭhat leh hmingchhiat kawngah Hmeichhiate'n mawhphurhna:
~ Hmeichhiate hi kan chetzia leh thiltih hi a langsar hma em em a, mipa tan a ho tak tur anga lang si pawh hmeichhe tan chuan mualpho pui tham a tling ṭhin, hmeichhia mah ni ila kan mualphona chu kan hnam pum mualphona ani ve nghal a, chuvang chuan khawi hmunah pawh awm ila kan nun leh chetzia kan fimkhur a pawimawh hle a ni.


9. Hnam ziarang chawinun kawnga Hmeichhiate mawhphurna:
~ Kan hnam thuam leh hnam lam te hi zahpui loin uar sauh sauh zel ila, kan hnam nun ze mawi kan chawinun zel hi kan hnam ziarang phochhuahna leh chawinunna ṭha tak a ni.


10. Mizote tan 'Fa neih tlem' inzirtir hi a ṭulin i hria em?
~ Kan population ngaihtuahin fa neih tlem inzirtir hi a ṭul ka ti lo.



11. Mizo hnam ṭhanmawh bawk nia i hriat?
~ Eirukna, ruihhlo leh duhamna te.


12. Mizo hnam damna atana  kawng awm nia i hriatte?
~ Pathian ṭih, taimakna, inlungrualna leh inhmangaih tawnna.


13. Zirna, Khawtlang leh Kohhran hi?
~ A theih ang ang a inhman vek a ṭha, kan tihmakmawh pawh a niin ka hria. Amaherawhchu keimahni inhrechiang hmasa ila, pakhat a inhman luat avanga a dang kan thlahthlam erawh a ṭha lo.


14. Khawtlang, Kohhran leh nangmah:
~ Zirna avangin khawtlang leh kohhranah ka duh angin ka la inhmang thei lutuk loa, hmasawnna tur ka la ngah hle.


15. Social Media leh Nangmah:
~ Social media hi ka khawih ve nual a, ka nun tichhe khawp leh ka zirlai min tibuai khawpin ka hmang ngai lo.


16. Mizoram ṭhalai tam tak tlakchham:
~ Insumtheihna, taimakna leh teirei peihna.


17. Mizo ṭhalaite hian ngaihsan tur dik an ngaisangin i hria em?
~ Mizo ṭhalai tam zawk te hi chuan ngaihsan tur dik hi kan ngaisangin ka hre lo.


18. Ngaihsan tur dik nia i hriat:
~ Pathian ṭih mi te, taima leh beidawng ngai lo te, kan nun a ṭha lam zawng a min hruai thei tur te hi ngaihsan tur dik an niin ka hria.


19. Hlawhtlinna tura pawimawh:
~ Kan tumah chiang em em phawt ila, Pathian hriatpuina nen taima tak leh chhel takin, beidawng loa beih fan fan te hi hlawhtlinna atan a pawimawh tak niin ka hria.


20. hloh i hlauh ber: 
~ Pasal neih hmaa thianghlimna hloh hi ka hlauh ber ani.


21. Hnam dang nupui pasal neih hi-
~ Hnam dang nupui pasal a neih hi thil ṭha ber ani loa, thilsual pawh ani chuang loa, amaherawhchu culture in-ang lo chuan chhungkua leh chi leh hnamah harsatna a thlen fo a, mizo te kan hnam la tlem dan ngaihtuah phei chuan hmandang nupui pasal a neih pawlh hi thiltih chi loh tak leh kan tih loh tawp tur niin ka hria.


22. Nupui pasal inneih hmaa mipat hmeichhiatna hman hi?
~ A ṭha ka ti lo, Pathian duh loh zawng anih angin kan tih loh tawp tur ani.


I thalaipuite tan fuihna--- 
~ Kan thiltih engkimah Pathian hrereng chung zelin ti ila, hmathlir mumal neiin kan ram leh hnam tan a chhawrtlak nih tum zelin, engthil pawh ti ila tih tak takna nen a beih a, peih lo chung pawh a tihluih hram hram a ngaih chang te pawhin beidawng lo ila, kan thlen chin apiangah lungngawi thiam zel turin ka thalai puite ka chah duh cheu a ni.


EXPLOREMIZORAM.COM i hmuh dan:
EXPLORE MIZORAM hi kan hnam nunphung/ hnam zia leh kan ram a thil thleng mek phochhuahna tha tak pakhat a niin ka hria, a ngaihnawmin a bengvarthlak thin hle a, mimal tak pawhin ka ṭangkaipuiin ka hlawkpui thin hle a ni. In kalzelna turah duhsakna ka hlan mawlh mawlh a che u.




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments