Ticker

10/recent/ticker-posts

PATHIAN CHHUNGKUAA TEL TURA DUAN I NI

 _Kohna mila nun: Engvangin nge khawvelah hian ka lo pian ve?_

— Rick Warren 

— 13 Sept, 2022


“A khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin." Ephesi 1:5

He leilung hi Pathianin a din nachhan chu Pathianin chhungkua a mamawh a ni. Naupang an awm a duh ve a. Min mamawh lo va, mahse a hmangaihna lantir nan min duh a ni.

Kan planet hi axis ah a ṭhu a. Chu axis chu degree khat lek pawhin lo insawn ta se la, kan alh vek ang. A ni lo lamah degree khat lekin tawlh leh ta sela, vur angin kan khal vek thung ang. Kan awmna planet hi nunna kan neih theihna tura a awmna dik takah a awm a ni.

Pathian tan hian i hlu em a chuvang chuan he Lei hi i nun theihna turin a awmna tur takah a dah a ni. Leilung hi a ngaihtuah hmain a ngaihtuah lawk diam tawh che a. A hmangaihna avang chuan ngaihtuah bik i ni.

Bible chuan Ephesi 1:5 ah a sawi a, “A khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin.”

Pathianin chhungkua a duh a, chu chhungkuaah chuan tel ve turin a duh che a ni. Pathian chuan nangmah chauha hringnun paltlang turin a ruat lo che a ni.

Pathianin Adama a hrilh hmasak ber chu, “Mihring amah chauhva awm hi a ṭha lo ve” a ti a. (Genesis 2:18). Kawppui i neih leh neih loh lam a ni lo va. Pathianin thlarau lam chhungkua a ruatah tel tur leh nangmah enkawl tur a ruat lawk tawh a — chuvang chuan nangmah chauhin i awm lo.

Pathian chhungkuaa tel chu vanneih thil thu a neih tur a ni lo. Duhthlanna hmanga thlan ngai a ni. Pathian chhungkuaa tel tur chuan i duhthlanna kha a ngai ve a ni. Kan za hian Pathian siam kan ni vek a. Pathianin min hmangaih vek a ni. Amaherawhchu a chhungkuaa tel leh tel loh chu i duhthlannaah a awm a ni.

Pathian chhungkua chu eng nge ni?

Bible chuan, “Pathian chhungte chu Pathian nung Kohhranho, thutak ban leh innghahna chu an ni” a ti. (1 Timothea 3:15).

Pathian chhungkua chu kohhran hi a ni. Pathian fate kan ni a, Pathian chhungkuaah chuan unaupa leh laizawn te kan ni hlawm a ni.

Pathian chuan a chhungkuaah tel turin a siam che a. Pathian chuan awih ringawt turin a duh lo che a; a ta ni turin a duh che a ni. Kristian ni si kohhran lawina nei lo chu fahrah a ni.

Pathian chuan mi dang te an sualna leh an fel lohna te ang anga hmangaih turin a duh che a ni. Chuvang chuan vanah ni lo vin he planet-ah hian i awm a ni. A harsat pawhin hmangaihna zir turin a duh che a ni.

Kohhran chhungkua te nen in inzawm ṭha em? In inzawm loh chuan, engin nge dal che?

Ngaihtuah zui atan

* Pathianin a chhungte ni turin a siam che a ni tih engtin nge i hriat?

* Chhungkaw inlaichinna pawh a chang chuan a harsa ṭhin. Kristian dangte nena in inlaichinna harsa tak karah eng nge i zirchhuah le?

* In kohhran chhungkua nena inlaichinna ṭha zawk neih theihna tur engin nge dal che?

*Pathian chhungkua te zinga mi nih chu i thlang ve dawn em?*

Bible chuan Fapa Isua kaltlang chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

Bible “Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngṭai a nih chuan, Rick@PastorRick.com ah hian email min lo thawn la. Isua nena zinkawng i zawh ṭanna atana pawimawh te a thlawnin ka lo thawn ang che.

[Lettu: Sangpuia]

Post i hmuh dan

Post a Comment

0 Comments