Nau chunga thi ngawr ngawr ni lovin lungphu chawl a ni thei!

Aizawl | Sept 12, 2022: Thla kalta, August ni 18-a Civil Hospital, Aizawla Pi Zoramthari, nau chunga a thih chungchangah Hospital & Medical Education Director chuan Mizoram State Commission for Women hriattirna chhangin, nau chunga thi ngawr ngawr niloin, lungphu chawl (cardiac arrest) ni theia an ngaih thu an sawi.

DD News Mizoram-in a tarlan danin, Mizoram State Commission for Women-in Pi Zoramthari, Pu Isak Malsawmsanga nupui, Hortoki khua thihna chungchang, Hospital & Medical Education Director hnena thil thlen dan kimchang ziaka hriattir tura a tih angin, Hospital thuneitute chuan an chhang a, Pi Zoramthari hi admit a nih atanga a thih thlenga a dinhmun chik leh uluk taka Doctor Specialist ten an sawiho hnuah, nau hrin dawn hnai tak tak a la awm loh avangin nau chunga thi ngawr ngawr ni lovin, heart attack (cardiac arrest) a ang zawka an hriat thu an sawi a, a chhungte Post-mortem an remtih chiahloh avangin post-mortem tih a ni lova, hei vang hian a thih chhan tak hriat a harsa hle tih an sawi bawk.

Women Commission chuan Pi Zoramthari thihna chhan tak chu eng pawh ni se, a beisei ang ngaihsakna a dawng chiah lo nia a hriat thu an sawi a, hetih lai hian, a thihna chhan ber hre tura Post Mortem tih a nih loh avangin nau chunga thihna emaw, thawktute dawngdahna emawa puh tluk mai theih tur niin an ngai lo tih an sawi a, a thihna ah thil tih sual palh a awm nia lang thei tur hnuhma thar hmuh chhuah a awm chuan, hmala chhunzawm turin damdawi in thuneitute an beisei tih an sawi a ni.

Women Commission chuan, Civil Hospital, Aizawla nau neihnaa thawktu indaih lohna chu an ngai thu tak hle tih an sawi a, hei vang hian Principal Director, Health & Family Welfare Department chu ni 30 chhungin Mizoram puma sawrkar leh mimal enkawl damdawi In zawng zawnga nau neihna ward dinhmun kimchang, thawktu leh khum awm zat bakah kumin January atanga September thla thlenga Damdawi In-a nau piang zat leh nau chunga thihna thleng zat chiang takin Women Commision hnenah ziaka thlen turin a hriattir bawk a ni.