Ticker

10/recent/ticker-posts

GOLD MEDALIST | MZU M.Sc Zoology Gold Medalist 2022 Mahlutei Chhakchhuak

Mizoram University (MZU) M.Sc (Zoology) Gold Medalist 2022 Mahlutei kan belchiang.


MZU in M.Sc Zoology 2022 result a tihchhuah taka CGPA- 9.023 hmua Gold Medalist ni ta Mahlutei hi a laiah hming chu Lalnunhlui niin, C Vanlalruata leh Laltanpuii te fa pali zing a naupang ber a ni.

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


Mahlutei hi 18th January 1999 khan lo piangin, u mipa pahnih leh hmeichhia pakhat a nei a, Kawnpui khua niin, tunah hian Dinthar, Aizawl-ah chengin an khawsa mek a, UPC (NEI) kohhran a lawi an ni.


Mahlutei'n EXPLORE MIZORAM zawhna a chhanna te i lo thlir ang:
📌 Zirna lam:
• Pawl 10:
~ Pawl 10 Green Hills High School Kawnpui-ah ka kal a. Pawl 3 atang vel hian top 10 ah te ka inhlangkai pha ve tawk tawk a. Kum 2015 khan pawl 10 hi Distinction ah ka pass a ni.

 Pawl 12:
~ School hi ka lut sawn ve nasa em em a,  Pawl 10 thleng hi kan khua Kawnpuia sikul hrang hrang-ah ka zir a. Pawl 11 atang khan Aizawlah awm tan vein, St. Paul's Higher Secondary School-ah pawl 11 chu ka zir a, Pawl 12 chu Greenland Higher Secondary School-ah insawn lehin heta tang hian kum 2017 khan Pawl 12 chu First Division ah ka pass chhuak ve leh a ni.

 Zirna sang zawk i zir leh i zirna hmun leh kum?
~ B.Sc (Zoology) hi Pachhunga University College-ah zirin kum 2020 khan ka pass a, tichuan, M.Sc (Zoology) hi Mizoram University-ah zawmin Kumin (2022) hian Pathian kaihhruainain tluang takin ka zo ve leh a ni.

📌 I lehkha zir dan?
~ Lehkha hi mi dang anga 'zir nasa' tia sawi tur ka ni lem lo ang. Zir hun bik ka intuk hran lem lova, a rem hun hunah ka zir mai a, mahse, zan lamah hian ka zir nasa ber. Exam dawn hnaih te hian ka zir nasa zual bik thin.

📌 harsatna I hmachhawn dan?
~ Engkim hretu Pathian hnenah ka harsatna leh lungngaihna te ka thlen a,  chakna leh chhelna ka neih phah a, thil a eng zawnga thlir theihna leh beiseina ka neih phah thin. Amah-ah rinna ka nghat tawp a, min ti thlawn ngai lova tun hun thleng min kaihruai tawh a, amah hi ka harsat ber leh ka mamawh huna min kalsan lova min hmangaih emem tu thian rinawm ber a ni.

📌 Gold medalist i nihna (Subject) leh CGPA?
~ M.Sc (Zoology) niin, CGPA- 9.023 ka hmu a ni.

📌 Gold medalist ni tura i beih dan?
~ Gold medalist ni tura ka beih dan han sawi em tur chuan a beitham hle awm e, Pathian kaihhruaina vang liau liau a ni. Amaherawhchu, M.Sc ka zawm khan B.Sc aia tihthat duhna rilru kha ka nei lian ve a, keimah leh keimah ka inel a ni deuh ber mai. Tichuan, first semester-ah a titha ber dawttu ka ni ve a, semester dawt leha chu aia thaa tiha hmasawn chhoh zel duhna nei chungin ka zir ve bauh bauh a tichuan Pathianin mal min lo sawmsak a Gold medal hi ka lo dawng ve ta a ni.

📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Tehreng mai, kan zirtirtute hian min pui tha em emin ka hria. A bikin, han ti ila kan supervisor hi a taima in hna a duh uluk ve a, keini pawh kan rima kan hlawkpui em em thung. Kan subject-ah chuan practical te a tam avangin kan hna te tha taka kan tih theih nan theihtawpin min pui a, anmahni pawh an inhawngin thu tha te min hrilh nasa a, an chungah pawh ka lawm em em a ni.

📌 I zirna atana i chhungte pawimawhna:
~ Ka zirna kawngah hian ka chhungte hi an pawimawh em em a, zirna hun tha min pe a, kawng engkimah ka mamawh min phuhruk sakin tlakchham neiloin min siam a, ka zirna kawng engkimah min support em em zel a, bang loin min tawngtaisak thin a, rilru hnual deuh chang pawha min fuih reng tu an ni a, anni tel lo chuan tun hun hi engtikah mah ka thleng thei ngai lo ang.

📌 I zirna atana i ṭhiante pawimawhna:
~ Thiante hi chu kawng engkimah an pawimawhin an hlu em em a, ka zirna kawngah pawh hian ka thiante ka classmates te hi an pawimawh em em a, thiante nena zirlai harsat deuh bik lai kan han sawi ho leh idea kan han sawi ho ve thin te hi a hlawkthlak. Kan zirlaia hna kan thawhhona te pawh a thain ka hlawkpui takzet a,  ka classmates lem lo min fuih thintu thian tha tak tak ka neih te pawh hi an hlu takzet a, vannei ka inti hle a ni.


📌 I duhzawng leh ngainat zawngte:
• Rawng - a senno💕
• Chawhmeh  - chawhmeh hi chu duh loh ka nei vaklo, sa hi ka ngaina!
• Incheina - Hak nuam bakah nû deuh hnapa inchei hi mawi ka tiin ka ngaina.
• Rimawi – rimawi tum theih chu ka neilo nain metal lampang tih loh hi chu ka ngaithla peih deuh vek mai.
• Mizo Ziaktu zingah - Mafaa Hauhnar
• Hla - Mizo hla hi chu ka ngaithla kual veka, pop song lam hi ka ngaithla hnem leh bawk.
• Hla phuahtu - K Hminga leh Lalnunpuia Hrahsel
• Teacher - Kan zirtirtute hrim hrim hi an felin an inpe zo thei em em a, puih kan ngaihna laia inhawng taka min pui reng thin niin an ngainatawm em em vek mai. Elementary school kan kal lai daih tawha teacher ten duhsakna tawngkam hmaichhanah leh phone hmang te a min han hlan ve  te kha a nuam ka ti a min ti hlim a, kan zirtirtute hian min lo ngaihsak zui ve nasa thin hle alo ni.
• Leader - Dr. Apj Abdul Kalam, scientist ropui tak a nihna leh thil tam takah a ngaihsanawm takzet ka ti. (India President a nih lai vel khan kan la naupang ve hle kum 6-7 emaw bawr vel chauh ka la ni ang, khang hunlai naupangte ka nih lai te khan ka lo ngaisang ve em em tawh).

📌 Mize ngainat zawng:
~ Mi inngaitlawm, fiamthu duh ve tak, zaidam, a nachang hria leh a dera nung lo; mahni nihna tak tak ang taka lang thin mi.

📌 Mize ngai nat loh zawng:
~ Chapo, rinawm lo, aipui leh aite nei, mi chanchin chhe lai sawi peih deuh te hi ka ngaina lo.

📌 Hobby:
~ Hla han ngaihthlak te, thil eitur siam neuh neuh te leh thiante nena han teihawi vel (trekking) te hi nuam ka ti.


📌 Relationship status:
~ Single

📌 Kawppui atan duhzawng:
~ Pathian tih mi, ruihtheihthil laka fihlim, mi rinawm leh rintlak, mahni inringtawk tak mawhphurhna hriaa hlenchhuak thin mi.


Zawhna dang:::
1. A tel lova i awm theih loh:
~ Pathian

2. I nun kaihruaitu:
~ Pathian thu leh mahni nun inenleta a tha lo lai leh diklo lai atanga insiamthat zel tum hi a ni deuh ber.

3. Hringnuna i hlauh ber:
~ Beidawn hi ka hlau ber.

4. I tih ngai miah loh tur:
~ Mite hmuhsit.

5. Mizo Tualzal nuna ṭha i tih:
~ Mizo Tlawmngaihna hi a mawi in a hlu ka ti em em a, chhiatni that niah kan in chhawmdawl thin te hian mizo nih a tinuam ka ti em em a, tichuan aia upa kan zahna te hi a tha ka tiin a mawi ka ti em em bawk a, vawn nun zel i tum theuh ang u.

6.  Quote i duh ber:
Engah mah mangang suh u; engkimah ṭawngṭai leh dîlin, lâwm thu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.
Philippi 4:6‭-‬7


7. Mizoram leh Mizo tualzal nuna Mizo hmeichhiate dinhmun:
~ Mizo chhungkua-ah chuan Mipa hi a lu ber ni mahse inchhung khawsakna ah chuan Nu hi a pawimawhna a tam zawk em em thung kan ti thei awm e, fa te enkawl kawngah leh inchhung sekrek khawihna ah nu te mawhphurhna a sang em em a, sorkar hna a ni emaw, eizawnna dangte pawh thawk ve mahse inchhung ah a mawhphurhna a la hlen thei fo thin mai te hi hmeichhia te hi mawhphurhna tam tak neia tikawp thiam vek, ropui taka siamtu'n a duan niin ka hria a, hna thawhna kawng hrang hrang ah thâ ah tihloh chuan mipa tih theih ang theih ve deuh zel te hian hmeichhia te hniam bik loh zia a hriat a ni, kan ramah hi chuan tûnhma ngaihtuah chuan hmeichhe dinhmun pawh a tha chho ve zelin a hriat a, hmeichhia dikna leh chanvo humhalh sak thina thlamuantu tha tak MHIP kan nei ve leh zel te pawh hi a hlu ka ti hle.


8. Hnam hmingṭhat leh hmingchhiat kawngah Hmeichhiate'n mawhphurhna:
~ Hnam hmingchhiat leh hmingthat hi chu mi tin mawhphurhna niin ka hria a, hmeichhiaten mawhphurhna kan nei lian bikin ka hre em em hran lo, mi pakhat vangin hnam a hmingchhe thei a, a hmingtha thei thung bawk.

9. Hnam ziarang chawinun kawnga Hmeichhiate mawhphurna:
~ A hmasa berah chuan chhungkua hi zirna in hmasa ber kan ti fo thin a,chuvangin nu berin inchhungkhur atanga fa te zirtirna a pek that hi a pawimawh hle in ka hria a, entirnan - Kan Mizo thuamhnaw puan bih te hi Mizo hmeichhia chuan uar se tha ka ti hle a, nu berin Mizo chawhmeh siam fate zirtirna a pek bakah mahni hnam thil ngaihhlutna chang an hriat theihna tura an thinlunga tuh te hi chhungkhat nu (hmeichhia) hian mawhphurhna a nei sang hle in ka hria. Chung chu faten an than len chhohpui tur anih avang hian nu hi an pawimawh em em a ni.  Hetianga hmeichhia tena tan kan lak phawt chuan kan hnam ziarang hi a nung reng thei ngei ang.

10. Mizote tan 'Fa neih tlem' inzirtir hi a ṭulin i hria em?
~ Mizo te hi kan la tlem hle a inthlahpung zel hi chu a pawi lo khawp mai thei. Chutih rualin fa neih tam leh tlem hi chu chhan hrang hrangah a innghat ve bawk a; Nu hriselna te, chhungkaw khawsak te, tha taka enkawl thei tura rilru inpeih te hi a ngai a, chuvangin fa neih tlem inzirtir tawp lovin chhan hrang hrang a innghahna te hi inzirtir that a ngai zawkin ka hria. 

11. Mizo hnam ṭhanmawh bawk nia i hriat?
~ Tih tak tak peihna te hi kan tlachham ve hle in ka hria a, a nuam lam ringawt leh mi thlekna lam apianga thlek ve ringawt te, tha taka kan tihtur ang ang te kan tihloh hian mahni mimal nunah pawh hma a sawn theih loh ang bawk hian, mi mal tinte hian tih tak tak peihna te taimakna nun te kan neih theuh loh chuan kan hnam hi chu a thang tha thei dawnlo in ka hria a ni.


12. Mizo hnam damna atana  kawng awm nia i hriatte?
~ Mizoram hmangaihna tak tak thinlung pu chunga DIKNA leh RINAWMNA kan neih theuh tlat chuan kan ram leh hnam hi a dam ngei ang.


13. Hnam chhan nana Hmeichhiate ṭangkaina leh mawhphurna?
~ Hmeichhiate hi mipa te aiin zirna lamah kan duai bik reng reng lo a, hna sang tak tak chelh leh hruaitu tha tak tak pawh an awm fur a, heng atang te hian hmeichhia te hian hnam tan theihtawpin hna an thawk ve bawka mipa te chauh tih ni bikloin, chuvangin zirna bawk hi a lo pawimawh a hmeichhia nih avanga zir sang lo tur bika indah ngawt lo hian zirna lam atanga hma kan lak ve zel te hian hnam chhan nana mi tangkai tak kan ni thei dawn a, tha taka zira hnam tana theihtawk kan chhuah ve hi kan mawhphurhna a ni.


14. Zirna, Khawtlang leh Kohhran hi?
~ A pawinawh em em veka, pakhatah chauh kan inthlurbing thei lo ang. Zirna ringawt thlur bingin khawtlang leh kohhran a ngaihthah theih loh a, kalkawppui vek thei tan chuan harsatna a awm lemlo maithei, amaherawhchu zirna nena tikawp theilo tan chuan zir hmasak phawta zir zawh hnua kohhran leh khawtlang tana kan thiamna leh theihna hman hi a tha zawkin ka hria, kan zir zawh hma chuan khawtlang leh kohhran chuan min phut lo bawkin ka hria.


15. Khawtlang, Kohhran leh nangmah: 
~ Khawtlang leh kohhranah chuan a kul atai chuan ka la inhmang em em lova, ka theihna leh tangkai ve theihnaah chuan theihtawpa inhman chhoh ve zel ka tum.


16. Social Media leh Nangmah:
~ App lar zual ang chi ah hi chuan account chu ka nei ve a, bengvarthlak tak tak te tam ve tho mahse khawih tura pui hun ti hek si a tam ve em em bawka, hetiang anih avang hian lehkha zir ngawrh duh hunah te hi chuan ka uninstall ve bap bap a ka in control ve mai thin a ni.


17. Mizoram ṭhalai tam tak tlakchham:
~ Tlakchham ngah ber pawl ka ni hial mai thei awm e😅, hlawhtlinna kawng chu a awlsam loh em avangin kawng nuam lampanga han pensan mai a awl thin em avang te hian hlawhtlinna kawng kan hlat phah thina, a chhia leh a tha hre vek mahni duhthhlanna hmang thei vek kan nih angin a chhe lam kawnga mahni inthunun theih leh hlawhtlin tuma beih tauh tauh na nun neih tum hi kan tlakchham lian ber pakhat chu niin ka hria.


18. Mizo ṭhalaite hian ngaihsan tur dik an ngaisangin i hria em?
~ Ngaihsan tur dik leh tha tam tak chu a awm ngei mai, mahni kawngah theuh mahni tuina kawng theuh ah te kan ngaihsan a inanglo theuh awm e, mahse heng ah te hian pawn lama lang mawi satliah ang ringawt te nge kan ngaihsana diknaa huaisen taka ding ngam te, mahnia ke a din tum , mi rinawm Pathian tih mi te kan ngaihsan zawk tih te hi chu kan in enfiah leh deuh chu a ngai deuh em aw chu ka ti .


19. Ngaihsan tur dik nia i hriat:
~ Pathian tih mi, Huaisen taka Dikna vawnhim duh tlat mi, mahni mawhphurhna hlen chhuak thin mi.


20. Hlawhtlinna tura pawimawh:
~ Tumruhna, chhelna, tih hramhram peihna te leh mahni inthunun theihna te hi an pawimawh hle in ka hria.


21. hloh i hlauh ber:
~ Hmangaihte hloh hi ka hlau.


22. Hnam dang nupui pasal neih hi:
~ Pawlh dal leh chim ral nih kan duhloha, hnam chhan kan duh anih chuan duhthlanna kan kutah a innghat lian hle in ka hria.


23. Nupui pasal inneih hmaa mipat hmeichhiatna hman hi?
~ Pathian thu kalh a nih avangin inneih hma hi chuan mipat hmeichhiatna hman loh hi a tha ka ti a, kan insum hram hram tur a ni.


I thalaipuite tan fuihna--- 
~ Ka thalaipuite fuih tur hian kei tehlul hi ka tling lo ber mai awm e! Tlem ka sawi ve duh chu mi te tana mi tangkai leh malsawmna nih zel hi tum ila, mi kan tanpui vek thei lo a nih pawhin mi dang chhiatna thlentu ni lo hram ang u.
Kan ram neih chhun hi hmangaih takin enkawl ila, kan thil tihna kawng engkimah Pathian tihna nen dik tak leh rinawm takin nun hmang theuh turin ka chah duh a ni.


EXPLOREMIZORAM.COM i hmuh dan:
EXPLOREMIZORAM.COM hi ka luh chhuah ve rengna a nih vangin a bengvarthlak hlein ka hria a, platform nei tha lote tana inphochhuahna tha zawk in siamsak fo thin avang pawhin a hlu ka ti hle. In zawhna te chhanna hun tha kei tehlul min buatsaihsak ve avang te pawhin lawmthu ka sawi nghal a, mi te tana tangkai leh hlawkthlak tak lo ni zel turin duhsakna ka hlan a che u, EXPLORE MIZORAM vul zel rawh se. Ka lawm e!



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)
Post i hmuh dan

Post a Comment

1 Comments

He post chungchanga i ngaihdan lo sawi ve rawh: